Ester 5 - WÄNYI KWËRØ 2011

Ryeji Rɑ̈dh geki Ämɑn yi Ester

¹ Kì dɑ̈ɑ̈g cyɑ̈nggi thuumi Ester, kɑ ógudhi rɑ̈ɑ̈dhø møge lønye ree, ɑkedhe kɑ ócungø kì ódɑ̈ri gøldwøng kì tuung rɑ̈dh, e nenn-ɑ øn-ɑ di kwøøm jyɑ̈gø. Rɑ̈dh ɑ́bëëd e nud kì ønɑni e obëëdø kì wïj kwøm e nenn-ɑ dhøng-ɑ yïëbbi ódɑ̈rɑni.

² Kɑ ɑ́liidh Bɑ̈rɑ̈dh Ester yi rɑ̈dh e ócungø kì wɑ̈g, ɑtyerii yi pyëwe, kɑ loodh dhɑb tïnge, ɑkedh Ester kɑ wïj lodh nywɑle.

³ Kɑ pyëj yi rɑ̈dh kinni, “Á gïn Bɑ̈rɑ̈dh Ester? Köbbí yɑn gïn-ɑ dwɑddi yi yïn, cɑgg ɑ́ budi pödhɑ, mëgg-ɑ yïn.”

⁴ Alöggi Ester kinni, “Keløg e ócuggø wuö, yɑ dwɑdd-ɑ kinni rɑ̈dh geki Ämɑn bï gen gølɑ keny-ɑ ryejɑ wun tïn kì thyënhø.”

⁵ Kɑ Rɑ̈dh öd-ɑ yï Ämɑn kinni jwɑne bëënø, o ge kedhi gen kej ryëëj Ester. Codhe, kɑ rɑ̈dh kedh-ɑ kej ryëëj Ester geki Ämɑn.

⁶ Kɑ̈ng-ɑ ɑ́mɑ̈ɑ̈dh gen ki møgø, ɑpyëëj ngɑnɑni yi rɑ̈dh kinni, “Köbbí yɑn gïn-ɑ dwɑddi yi yïn, o mëgg-ɑ yïn ceth. Gïn-ɑ dwɑddi yi yïn mëggɑ’ yïn, cɑgg ɑ́ men-ɑ́ budi pödhɑ.”

⁷ Alöggi Ester kinni, “Gïn-ɑ kwɑjjɑ; ɑ yɑb yi yɑn bɑ kinni,

⁸ keløg pyëwí med ki yɑn wuö, yɑ dwɑdd-ɑ døøgi yïn ki ryejø dhuki wuki Ämɑn. Yï óköbbɑ gïn-ɑ dwɑddɑ kì bøli kenyɑni.”

Dwɑddi Mordekɑy Nɑ̈gø yi Ämɑn

⁹ Ämɑn ɑ́dhwödh kì kej ryëj e pyëwe ceg-ɑ medø ki mendwøng. De kɑ ɑ́lidhe Mordekɑy kì dhø gøldwøng, kɑ Mordekɑy ocögø e pɑ dhwödhi mɑl kipere, wɑlɑ̀ wïje nuti kuul en piny e wør-ɑ gøn, kɑ Ämɑn pyëwe ceg-ɑ rënyø ki mendwøng ki en.

¹⁰ De pyëwe ɑ́mɑge kɑ kedh-ɑ gøle. Kɑ mɑ̈dhhe cwøøle gøle, kɑ cyëge me cwøl ɑ́ Dherec, cwøle o bëëde kì buti gen.

¹¹ Kɑ othwøgø kì bøli gïn kipe kɑ̈re, kí ngenyi wɑ̈dde, kí kër-ɑ ɑ́tïngii mɑl yi rɑ̈dh, kɑ røny ɑ́ jɑngi dwøng. Kí kinni pere teeg kibøli jyɑ̈ggi rɑ̈dh møg-ɑ kyeelø.

¹² Kɑ okööbø kinni, “Cɑgg ɑ́ men-ɑ́ Bɑ̈rɑ̈dh Ester, bong ngɑn mɑ ɑ́ryeje geki rɑ̈dh, den-ɑ́ yɑ ketɑ. O wø ócige ryejø dhuki.

¹³ De bong gïn wɑngi yi møgɑni bënn, mɑ́ pyëwɑ pɑ med kenyi nennɑ Mordekɑy wɑ̈d Yeud, e obëëdø kì dhø gøldwøng.”

¹⁴ Kɑ köbbi yi cyëge Dherec geki mɑ̈dhhe bënn kinni, “Yïde ɑ pɑ cwödhí piny ki gïn-ɑ nyi ngɑɑb ji, me bɑ̈re bɑ mïtïr pyɑ̈r ɑ́ryew wïdɑ́ryew? O Rɑ̈dh köbbi yi yïn dhuki kì mwøl, kinni ngɑɑb Mordekɑy wïje. Codhe, o yï kedhí kej ryëj pyëwí omedø.” Kɑ Ämɑn pyëwe ómïnø yi kwøbbɑni, ɑcwödhhe piny ki gïn-ɑ ree nyi ngɑ̈bbi.