Ester 1 - WÄNYI KWËRØ 2011

Pyemi Kwøbbi Rɑ̈dh Kerkes yi Bɑ̈rɑ̈dh Bɑctì

^1-2 Kì bøli keny-ɑ ɑ́jyɑ̈ɑ̈g Rɑ̈nhdwøng Kerkes, e bëëd ɑ Susɑ̀, ɑ́jɑɑg-ɑ pödhh 127 cɑ̈gi kì Ïndì gïti Kuc.

³ Kì dɑ̈ɑ̈g runni Kerkes kì yij lɑwø, ɑ ɑ́gööge ki thyëg me dwøng, e ryej-ɑ jɑggi mïïre geki pëjji liny. Jøliny Pɑres kí Mɑdɑy, kí jøgdøngø geki jyɑ̈ggì bënn ɑ́bëëd ge nud thyew.

⁴ Átyëg-ɑ dwɑ̈tt ɑ́bïkyel e nyodh-ɑ kɑ̈re, kí dhwɑ̈nge, kí tege.

⁵ Kì bɑng ryëj menɑni ɑlunyi rɑ̈nhɑni ki ryeji tyëng kɑɑldwøng Susɑ̀. Áryej-ɑ ji bënn; tyëngkɑ̈rì kí ɑbuur. Ryënyɑni ɑ́tyëg-ɑ cyɑ̈ng ɑ́bïryew, ji otugø kì yethi bɑ̈ggi gøldwøng.

⁶ Kɑ ódɑ̈ri gøldwøng cørri ki sitɑrr mø kïddi gen bɑ ówɑw kí óbøw møg-ɑ ócwɑ̈jø ki kor-ɑ yöm, ge ómɑɑg ri löjji kïtt-ɑ myër ki yëlli ɑ́tegg, kí thølli kor-ɑ yöm mø kïddi gen bɑ ɑ́cwïcwïl. Kɑ ódɑ̈rɑni cïbi ki kwømm møg-ɑ ógwøgø ki dhɑb kí ɑ́tegø, o piny ótɑgø kɑ ópɑddi kïtt-ɑ myër e kïddi gen bɑ̈nni, ge ógwelø ki tigg mø per gen teg, mø ceg orɑ̈ng.

⁷ Møgø ɑ́mɑdh kɑ óthɑ̈ggi dhɑb mø bëëdi gen bɑ̈nni; bong ɑ́ryew mø pɑ̈r kinni tek. Møgø ɑ́gwøg kì gøldwøng e gïïr cɑrø.

⁸ Gïg mɑdh ɑ́bëëd ge gïïr ki mendwøng, mɑ́ rɑ̈dh bɑ̈ngge ɑ́cege kinni gwøøg jɑmmì ge gïïr, o bëëd e bong ngɑn pɑ yɑ̈ng.

⁹ Bɑ̈rɑ̈dh Bɑctì tyëng-ɑ mɑ̈nn ɑ́ryeje thyew kì gøldwøng, kì bøli kenyɑni.

¹⁰ Kì bïryeew cyɑ̈nggi ryëj, Rɑ̈nhdwøng Kerkes ɑ́bëëd e omɑ̈dhø, kɑ pyëwe ómïnø ki mendwøng, kɑ jøg-ɑ bɑ órøj møg-ɑ göögø kì gøldwøng gɑ ɑ́bïryew gï cwööle. Jøgɑni nyingi gen bɑ: Meumɑn, Bidhthɑ̀, Arbönɑ̀, Bigthɑ̀, Abɑgthɑ̀, Dhethɑr kí Kɑrkɑs.

¹¹ Kɑ bɑ̈nggɑni köbbi yi rɑ̈dh kinni i kɑ̈ɑ̈l gen Bɑ̈rɑ̈dh Bɑctì, e orugø ki ógudhi rɑ̈ɑ̈dhø, kí yɑ̈r kì wïje. Bɑ̈rɑ̈dh menɑni ɑ́bëëd e myëër cɑrø, o rɑ̈dh ɑ́dwɑdd-ɑ nyudhi jyɑ̈gge bënn ki myëri Bɑ̈rɑ̈dh Bɑctì.

¹² De kɑ ɑ́köbbi Bɑ̈rɑ̈dh Bɑctì yi bɑ̈ngg ki møg-ɑ ɑ́ceg yi rɑ̈dh, ɑbɑ̈nye ki bëën yï rɑ̈dh. Kɑ rɑ̈dh pyëwe órënyø ki mendwøng.

¹³ Codhe, kɑ jøgdøngø møg-ɑ ngɑ̈nyi cigg pyëj yi rɑ̈dh, mɑ́ e ɑ́bëëd ɑ́ kwöng ceth kinni rɑ̈dh nyii pëjjø ki tyëng-ɑ ngɑ̈ny wøw kidøøj.

¹⁴ O jøg-ɑ ɑ́bëëd ge nud kì kenyɑni bɑ Kɑrcenɑ̀, Cethɑr, Admɑthɑ̀, Tɑrcic, Meres, Mɑrsenɑ̀ kí Memukɑn. Bene gen jɑgg-ɑ døngø gɑ ɑ́bïryew kì Mɑdɑy geki Pɑres.

¹⁵ Kɑ jøgɑni köbbe kinni, “Yɑ Rɑ̈dh Kerkes, bɑ̈nggɑ ɑ́örɑ be cwööli Bɑ̈rɑ̈dh Bɑctì, de ngɑnɑni ɑ́bɑ̈nyi lïngi kwøbbɑ! Cigg okööbø kinni i göggi ngø?”

¹⁶ Kɑ Memukɑn ólöggø kinni, “Bɑ̈rɑ̈dh Bɑctì nuti bɑɑny-ɑ kwøbbi rɑ̈dh kete; dɑ́ rɑ̈dh kí jyɑ̈gge, kí ji-ɑ yethi pödhh-ɑ jɑɑg yi rɑ̈dh bënn ɑ ɑ́bɑny yi en.

¹⁷ Tyëng-ɑ mɑ̈nn møg-ɑ yethi pödhh-ɑ jɑɑg yi rɑ̈nhdwøng bënn, ceg-ɑ døøg be pëmø ki kwøbbi gen, keny-ɑ ólïngi gen gïn-ɑ ɑ́gwøg yi bɑ̈rɑ̈dh. Ge ókööbø kinni, ‘Bɑ̈rɑ̈dh Bɑctì ɑ́cwøl yi Rɑ̈dh Kerkes kɑ óbɑ̈nyø ki kedhi yïe.’

¹⁸ Keny-ɑ ólïng mɑ̈nni jɑggi Pɑres geki Mɑdɑy ki gïn-ɑ ɑ́gwøg yi bɑ̈rɑ̈dh, ge ódøøg be pëmø ki kwøbbi jyɑ̈ggi rɑ̈dh, o bong keny-ɑ ócöög yi linyɑni!

¹⁹ Keløg e døøj kì yïí wuö, gwëdí piny ki cigg kinni Bɑ̈rɑ̈dh Bɑctì pɑ cigi bëën bøli rɑ̈dh. Kɑ møgɑni gweed piny gɑ ciggi Pɑres kí Mɑdɑy, o ge cög ge pɑ wil. Kɑ kej Bɑ̈rɑ̈dh Bɑctì mëggi ngɑndhɑjø megø me lɑ̈w kibøle.

²⁰ Keny-ɑ óyood ciggɑni yi pödhh-ɑ jɑɑg yi rɑ̈nhdwøng bënn, tyëng-ɑ mɑ̈nn cwøwi gen ówør yi gen ki mendwøng, cɑgg cwøwɑni kɑ̈rø wɑlɑ̀ ge jɑdø.”

²¹ Kɑ møg-ɑ ɑ́kwøb yi Memukɑn yïëy yi rɑ̈dh geki jyɑ̈ggì bënn.

²² Kɑ pödhh-ɑ jɑɑg yi rɑ̈nhdwøng gwëdi ki wɑ̈j bënn, men gwëdi kɑ dhøge, kinni jɑlø bɑ en ɑ bɑ jɑgø kì gøle, o en ɑ kwøbbe lïngi.