Dhek 1 - WÄNYI KWËRØ 2011

Jii Jwøng-ɑ Ácwɑ̈ɑ̈j Ácwøle kinni Dwöög Gen Kööre

¹ Kì bïdɑ̈ɑ̈g dwɑ̈tt, kì ryeew runni Dɑryøs ɑ́ rɑ̈nhdwøøng Pɑres, ɑ ɑ́ödi jɑltöng, Dhekɑriyɑ̀ wɑ̈d Berekiyɑ̀ wɑ̈d Idö ki wöödø yi Jwøng-ɑ Ácwɑ̈ɑ̈j,

² Wïlɑ̈bø, Jwøng-ɑ Ácwɑ̈ɑ̈j, Dhekɑriyɑ̀ jɑltöng ɑ́köbbe i köbbe ji kinni, “Yɑn yɑ Jwøng-ɑ Ácwɑ̈ɑ̈j, pyëwɑ ɑ́rënyi ki kweyyi wun cøn.

³ De ɑnɑn wu köbbɑ’ kinni, ‘Dwöög wun köörɑ, o yɑ dwöögɑ yï wun.

⁴ Wu ko bëëd ni kweyyi wun ɑ ɑ́köbbi yi jøtöng kɑ̈ge dööng kinni, wïyu bënn ki gwøg ki orøg. De kwøbbɑ nuti lïngø yi gen.

⁵ Kweyyi wun geki jøtöng møgɑni pɑ nudd ge onëënø ɑnɑn.

⁶ De kwøbb-ɑ ɑ́cïgɑ bɑ̈nggɑ, jøtöng, kí gïg-ɑ ɑ́kyerɑ nuti yïëyø yi kweyyi wun, ɑ bɑnge rɑngi gen. Codhe ɑyewi gen, kɑ gø yod gen kinni bɑ yɑn, yɑ Jwøng-ɑ Ácwɑ̈ɑ̈j, ɑ ɑ́cɑy gen, kì bɑng orøøg gen ni kɑ ɑ́dwɑddɑ en.’ ”

Kyëny-ɑ Ácɑ̈rri Jɑltöng

⁷ Kì ryeew runni Rɑ̈nhdwøng Dɑryøs kì yij lɑwø, kì pyɑ̈r ɑ́ryew wïdɑ́ngween cyɑ̈nggi pyɑ̈rø wïdɑ́kyeel dwɑ̈tt, ɑ ɑ́cɑ̈rri yɑn ki kwøb yi Jwøng-ɑ Ácwɑ̈ɑ̈j kì wɑ̈r.

⁸ Yɑ ɑ́lïdhi ki jɑl me ying kömi kyeny me kwɑrø. O cung-ɑ́ɑ̀ kɑɑm yenh bɑlsɑm kì yij tör, o ngɑ̈je dɑ kyënyì møøgø mø kwɑrø, kí møg-ɑ ógwelø, kí møg tɑr.

⁹ Apyëjɑ en kinni, “Wuö, kyënyì møg wɑng-ɑ ngø?” Alögge kinni, “Yï ónyudhɑ gïn-ɑ wɑngi yi gen.

¹⁰ Ge ɑ́ör-ɑ yi Jwøng-ɑ Ácwɑ̈ɑ̈j kinni o ge kedhi gen be yɑgi piny.”

¹¹ Aköbbi wëywödø yi gen kinni, “Wø kɑ̈ɑ̈l-ɑ yij piny bëne, de piny ɑ́yod yi wøn e ree pɑ cuggi nyɑgø yi en, o bɑ ɑtyɑm.”

¹² Codhe, ɑlöggi wëywönɑni kinni “Wïlɑ̈bø Jwøng-ɑ Ácwɑ̈ɑ̈j, pyëwí rɑɑj ki Yerusɑlem geki kɑ̈ddi Yeudiyɑ̀ ki runn pyɑ̈r ɑ́bïryew, yï gït-ɑ wɑɑng pyëwí pɑ lɑ̈ɑ̈m ki gen?”

¹³ Alöggi Jwøng-ɑ Ácwɑ̈ɑ̈j ki kwøbbi cïïjø me døøj.

¹⁴ Kɑ yɑ köbbi yi wëywönɑni kinni, Wïlɑ̈bø Jwøng-ɑ Ácwɑ̈ɑ̈j okööbø kinni, “Yerusɑlem kɑɑl kwërɑ mɑɑr yi yɑn ki mendwøng,

¹⁵ o pyëwɑ rɑɑj cɑrø ki pödhh-ɑ tɑ̈bbi kì yij kɑ̈r. Mɑ́ orɑɑng jiɑ ɑ́coodh yi gen keny-ɑ ɑ́kɑl pyëwɑ rënyø ki gen yøw.

¹⁶ Pyëwɑ ɑ́lɑ̈ɑ̈m ki Yerusɑlem. Kengɑ ódøøg ki gerø, o kɑɑlɑni óger thyew.”

¹⁷ Yɑ ɑ́köbbi yi wëywönɑni i kööbɑ thyew kinni, “Wïlɑ̈bø Jwøng-ɑ Ácwɑ̈ɑ̈j okööbø kinni, kɑ̈dde ódøøg ki dönyø, Yerusɑlem ódøøgɑ ki kønyø këti, kɑ obëëdø ɑ́ pɑɑrɑ.”

Cɑ́ri Tùng

¹⁸ Atïngɑ wïjɑ, kɑ yɑ ólïdhø ki tùng ɑ́ngwen, tùngi wɑ̈dhh.

¹⁹ Apyëjɑ wëywön-ɑ ɑ́kööb wøn kinni, “Á ngø ɑ wɑngi yi tùngɑni?” Alögge kinni, “Ge bɑ nyuudhi kipe tegi pödhh-ɑ ɑ́kedhhi tyëng Yeudiyɑ̀, geki Isrɑil, kí Yerusɑlem.”

²⁰ Codhe, ɑnyudhi yɑn yi Jwøng-ɑ Ácwɑ̈ɑ̈j ki bödhhì ɑ́ngwen ki ɑ́bɑnyyi gen.

²¹ Apëjjɑ kinni, “Jøg, ge ɑ́bï-ɑ be gwøgi ngø?” Alögge kinni, “Ge ɑ́bï-ɑ be göjji böögø pödhh-ɑ ɑ́nyøng Yeudiyɑ̀ kɑ gø kedhhi gen, o gï dhur gen piny.”