Dɑniel 1 - WÄNYI KWËRØ 2011

Wɑ́ji Dɑniel geki Mɑ̈dhhe Wøbbɑni kì Buri Nebukɑdnesɑr

¹ Kì dɑ̈ɑ̈g runni Yöyɑkim rɑ̈ɑ̈dh Yeudiyɑ̀ kì yij lɑwø, ɑ ɑ́bëën Nebukɑdnesɑr rɑ̈ɑ̈dh Bɑbïlöniyɑ̀, kɑ Yerusɑlem tyege.

² Kɑ wëggi mɑgi Rɑ̈dh Yöyɑkim yi Jwøng-ɑ Ácwɑ̈ɑ̈j, kɑ kwï jɑmmi Kengø kwɑnye. Ákɑ̈ɑ̈d ki ɑmɑgg møg kïdhe kengi jwögge kì Bɑbïl, kɑ kɑ̈r-ɑ ɑ́kwɑnye cïbe yethi kɑ̈nni kengɑni.

³ Kɑ Acpenɑdh, jɑng-ɑ dwøng kì kelli jyɑ̈ggi rɑ̈dh köbbe kinni, i yïënye kì kelli yɑɑg-ɑ ɑ́kɑ̈ɑ̈l kì Isrɑil, kì gøl rɑ̈ɑ̈dhø geki kwï kɑ̈ll-ɑ døngø.

⁴ Bëëd gen gɑ yɑɑg mø myër, wɑ̈thi gen pel, o ge dïdø, møg cuggi pwönyø kɑ ge jwɑn-ɑ dïdø, o ge ócuggø jwɑn dïdø ki dhøg tyëng Bɑbïl, o dëlli gen døøj, gɑ møg cuggi gwøg kì gøldwøng.

⁵ Rɑ̈dh ɑ́kööb thyew kinni i kɑ ge nyi thödhi ki gïncɑm geki møgi oløg mø pɑ̈r ki gïgcɑmm-ɑ nyi mëggi tyëng-ɑ gøldwøng. Orum gen ki pwönyø ki runn ɑ́dɑ̈g, o ge kïdhi bøli rɑ̈dh.

⁶ Dɑniel, Anɑniyɑ̀, Micɑil kí Adhɑriyɑ̀ ge nud kì kelli yɑɑg-ɑ ɑ́yieny kì kelli wɑ̈ddi Yeudɑ̀.

⁷ Kɑ ge cɑ̈ggi ki nying mø nyɑ̈n yi jɑng-ɑ dwøng; Dɑniel ɑ́cɑge ɑ́ Beltecɑdhɑr, kɑ Anɑniyɑ̀ cɑge ɑ́ Cɑdrɑk, kɑ Micɑil cɑge ɑ́ Micɑk, kɑ Adhɑriyɑ̀ cɑge ɑ́ Abednegö.

⁸ Dɑniel ɑ́bɑ̈nyi bwöli ree ki gïgcɑmm geki møgi oløøg gøldwøng. Kɑ jɑng-ɑ dwøng kwɑjje kipe kinni ko wëggi bwöli ree,

⁹ kɑ pyëw Acpenɑdh wëggi medø ki Dɑniel yi Jwøk.

¹⁰ Acpenɑdh ɑ́bëëd e óböggø yi rɑ̈dh, ɑköbbe Dɑniel kinni, “Rɑ̈dh ɑ ɑ́kwøb gïn-ɑ cɑm yi wun geki gïn-ɑ mɑdh yi wun, o keløg wu ónënni wu gwɑ̈lø kibøli yɑɑg-ɑ kyeelø, yɑ bɑ men nɑ̈g yi en.”

¹¹ Codhe, kɑ Dɑniel kedh-ɑ yï jɑl-ɑ ɑ́cïb yi Acpenɑdh, ɑ́ ngɑn nyi kɑ̈lli gïgcɑmmi gen geki mɑ̈dhhe, kɑ gø köbbe kinni,

¹² “Pɑ̈nyí wøn ki cyɑ̈ng pyɑ̈rø, wø cɑm-ɑ lùm, o wø mɑdh-ɑ pïg tïl.

¹³ Codhe, othumi cyɑ̈nggɑni kɑ wø pɑ̈ɑ̈r ki yɑɑg-ɑ cyɑ̈mø ki gïgcɑmmi gøldwøng, kɑ wø liidh men-ɑ óbëëd wøn kidï, o yï óngɑ̈ɑ̈ny löggø.”

¹⁴ Ayïëy jɑlɑni ki kwøbbi gen, kɑ gï pɑ̈nye ki cyɑ̈ng pyɑ̈rø.

¹⁵ Keny-ɑ ɑ́thumi cyɑ̈nggɑni, yɑɑgɑni ɑ́nënni dëlli gen døøj, o ge teg kibøli yɑɑg-ɑ cyɑ̈mø ki gïgcɑmmi gøldwøng.

¹⁶ Codhe, kɑ ge ocögø ge nyi muuj-ɑ lùm yi jɑl-ɑ kɑ̈lli gïgcɑmmi gen.

¹⁷ Yɑɑgɑni gɑ ɑ́ngwen, ge ɑ́thödhi yi Jwøk ki dïdø geki peli wïj, kí ngɑ̈nyi kwøb. Kɑ Dɑniel thödhi yi Jwøk ki dïdø kí nyodhi gïg-ɑ kømmi yi lɑ̈g, geki cyɑ̈rø kí gïg-ɑ óbï dhuki megø.

¹⁸ Keny-ɑ ɑ́thumi runn ɑ́dɑ̈g møg-ɑ ɑ́kwøb yi rɑ̈dh, ɑkïdhi yɑɑgɑni bënn bøli Nebukɑdnesɑr yi Acpenɑdh.

¹⁹ Kɑ rɑ̈dh okööbø ki gen bënn. Kɑ møg-ɑ kømmi yi Dɑniel, kí Anɑniyɑ̀, kí Micɑil kí Adhɑriyɑ̀ reng-ɑ pyëw rɑ̈dh, kibøli møg-ɑ ɑ́kømmi yi yɑɑg-ɑ kyeelø bënn. Codhe, kɑ ge gwøg gɑ jø tøg buri rɑ̈dh.

²⁰ Cɑgg rɑ̈dh pyëj ngø wɑlɑ̀ ngø, nyi yod e ngɑ̈nyi yi yɑɑgɑni gɑ ɑ́ngwen; ge lod-ɑ ɑ́jwögg-ɑ rɑ̈ngø kí møg-ɑ bɑ̈gø kì yethi pödhh-ɑ jɑɑg yi rɑ̈nhɑni bënn.

²¹ Dɑniel ɑ́cög e ying-ɑ tøg burø gïti run-ɑ ɑ́mɑɑg Bɑbïlöniyɑ̀ yi Körec, rɑ̈nhdwøøng Pɑres.