Ayub 1 - WÄNYI KWËRØ 2011

Tïmi Ayub yi Cethɑn

¹ Ádɑ jɑl me cwøl ɑ́ Ayub, bɑ jɑl Udh, ɑ́bëëd e nyi mɑll-ɑ Jwøk ki pyëwe bëne, Ciggi Jwøk di mïdhø yi en kidøøj, o pɑ nyi göögø ki gïnrɑj.

² Yïe ɑ́dɑ wɑ̈dd ɑ́bïryew ki womɑ̈nn ɑ́dɑ̈g.

³ Yïe ɑ́dɑ dyëg ɑ́lïp ɑ́bïryew, kí ɑmɑl ɑ́lïp ɑ́dɑ̈g, kí dhög ɑ́lïp ɑ́kyel, kí ɑderr miy ɑ́bïj. Ábëëd yïe dɑ bɑ̈ngg mø ngenyø thyew, ɑ́bëëd ɑ́ en ɑ kɑ̈rø ki mendwøng kì pödhh-ɑ wɑɑng cyɑ̈ɑ̈ng mwøl.

⁴ Wɑ̈ddi Ayub ɑ́bëëd ge nyii göögø ki ryëj kì gøl nyel ɑ́kyel kì kelli gen, gø lunyi ge’ lunyø. Nyiimï gen, womɑ̈nn gɑ ɑ́dɑ̈g, nyii cwølø yi gen o ge nywɑ̈ɑ̈g gen.

⁵ Kenyi thumi cyɑ̈nggi ryëj, Ayub nyii dhwödhø kì mwøl, kɑ ongɑ̈dø ki gëdhhì møg rɑ̈bbe Jwøk, kipe nyige bënn. Ayub nyi rømm-ɑ kinni nyige óbëëd ge göögø ki orøg, wɑlɑ̀ Jwøk yɑɑny gen, ge kwïj wøw mɑwɑnø.

⁶ Keny-ɑ ɑ́wɑ̈nhi cyɑ̈ɑ̈ng bëëni nyigi Jwøk, ɑbëën gen bøli Jwøng-ɑ Ácwɑ̈ɑ̈j, o Cethɑn ɑ́bëëd e nud kì kenyɑni thyew.

⁷ Apyëëj Cethɑn yi Jwøng-ɑ Ácwɑ̈ɑ̈j kinni, “Yï kɑ̈ɑ̈l-ɑ keny?” Alöggi Cethɑn kinni, “Yɑ kɑ̈ɑ̈l-ɑ be wïïnø’ piny.”

⁸ Kɑ Cethɑn pyëj yi Jwøng-ɑ Ácwɑ̈ɑ̈j kinni, “Pyëwí ɑ́di cïb yi yïn kömi Ayub bɑ̈ngɑ? Bong dhɑnhø me døj, me mïdhi cigg ni en kì kömi piny. Yɑ nyii mɑllø yi en, o pɑ nyi göögø ki gïnrɑj.”

⁹ Alöggi Cethɑn kinni, “Yï di wɑ̈dh-ɑ mɑllø yi Ayub, keløg e bong gïn nyi yod yi en kì yïí?

¹⁰ Pɑth kipe kenyi korrií geki gøle, kí jɑmme bënn? Kɑ gïg-ɑ nyi gwøg yi en bënn nyi gyëdh yi yïn, kɑ thödhí ki jɑmmì mø gïïr mø pɑ̈ng yij pödhø bëne.

¹¹ De ke cïb cingí ri jɑmme, yï otøønyø yi en ki yɑnyø!”

¹² Aköbbi Cethɑn yi Jwøng-ɑ Ácwɑ̈ɑ̈j kinni, “Døj, jɑmm-ɑ yïe bënn ɑ́wïyɑ yïn, de Ayub kiree, ko pɑ̈nyí nyïɑ̈gø.” Codhe, ɑkedh Cethɑn kì bøli Jwøng-ɑ Ácwɑ̈ɑ̈j.

Thøwi Nyigi Ayub geki Rënyi Jɑmme

¹³ Cyɑ̈ng ɑ́kyel, keny-ɑ ɑ́ying nyigi Ayub gøl ómï gen nyel-ɑ dwøng, ge ocyɑ̈mø, o ge omɑ̈dhø ki møgi oløg,

¹⁴ Abëën jɑlwöödø yï Ayub kì gøle, ɑkööbe kinni, “Wø ɑ́bëëd wø opurø ki pwödhø ki kwërr-ɑ nyi ywɑjji yi wɑ̈dhh, o ɑderr ocyɑ̈mø kì keny me cyɑ̈gi.

¹⁵ Codhe, kɑ tyëng Cebɑ̀, møg-ɑ nyi wïïnø kì pɑ̈l, ɑ nyi kɑ̈ɑ̈bø ki jɑmmi ji, pɑ̈ɑ̈r-ɑ kömi wøn, kɑ bɑ̈ngg nɑ̈g yi gen, kɑ jɑmmì kɑ̈l yi gen. Yɑ ketɑ ɑ ɑ́bodh, ɑbëënɑ be köbbi yïn èn.”

¹⁶ E ngeti wööni tyeli mɑl nudd e okööbø, ɑbëën bɑ̈ng megø, kɑ okööbø kinni, “Dyëg geki kwɑ̈yyi dyëg ɑ́gøj yi mɑl, ge ɑ́thøw bënn, den-ɑ́ yɑ ketɑ ɑ ɑ́bodh, ɑbëënɑ be köbbi yïn èn.”

¹⁷ E ngeti ryeew wööd nudd e okööbø, ɑbëën bɑ̈ng megø, kɑ okööbø kinni, “Akudd ɑ́dɑ̈g mø tyëng Kildɑn møg-ɑ nyi kɑ̈ɑ̈bø ɑ́pɑ̈ɑ̈r kömi wøn. Kɑ bɑ̈ngg bënn nɑ̈g yi gen, kɑ ɑmɑl kɑ̈l yi gen. Yɑ ketɑ ɑ ɑ́bodh, ɑbëënɑ be köbbi yïn èn.”

¹⁸ E jɑlɑni nudd e okööbø, ɑbëën bɑ̈ng megø thyew, kɑ okööbø kinni, “Nyigí ɑ́bëëd ge ocyɑ̈mø, o ge omɑ̈dhø ki møgi oløg kì gøl ómï gen nyel-ɑ dwøng.

¹⁹ Kɑ ɑtunø ókönø kì yij ryɑng, ɑdhure ød kömi nyigí, kɑ ge othøø bënn. Yɑ ketɑ ɑ ɑ́bodh, ɑbëënɑ be köbbi yïn èn.”

²⁰ Codhe, ɑdhwödhi Ayub mɑl, kɑ ógødhe kɑge, yi ywøøg yije. Kɑ wïje lyele, kɑ ree leenge piny bøle këële’ piny.

²¹ Akööbe kinni, “Yɑ ɑ́nywøl yïɑ bong gïïpiny, o yɑ óthøw yïɑ bong gïïpiny. Jwøng-ɑ Ácwɑ̈ɑ̈j ɑ ɑ́muuj, o en ɑ ɑ́kɑ̈ɑ̈d ɑnɑn. Wiy nyingi Jwøng-ɑ Ácwɑ̈ɑ̈j lejji!”

²² Kì ri jɑmm-ɑ ɑ́cwöb bënn, Ayub nuti pɑ̈nyi gwøg ki orøg, e cɑy-ɑ Jwøk kipe møgɑni.