Amos 1 - WÄNYI KWËRØ 2011

¹ Møg bɑ kwøbbi Amos, jɑl mɑ ɑ́bëëd yïe dɑ dyëg kì kɑɑl Tekoɑ̀, kwøbb-ɑ ɑ́cɑ̈rrii yi Jwøk, kì bøli keny-ɑ ɑ́bëëd Udhiyɑ̀ ɑ́ rɑ̈ɑ̈dh Yeudiyɑ̀, o Yeroboɑm wɑ̈d Yeöɑc bɑ rɑ̈ɑ̈dh Isrɑil. Ri thumi runn ɑ́ryew kì bɑng kwøbbɑni ɑ ɑ́nhɑ̈nhi piny.

² Amos ɑ́kööb kinni, “Jwøng-ɑ Ácwɑ̈ɑ̈j óngɑ̈rri ni ngur kì wïj Kïti Dhɑyøn, cwɑgge ólïngi ge kɑ̈ɑ̈l-ɑ Yerusɑlem ge nɑ pööd mɑl. Kɑ̈jj-ɑ nyi cyɑ̈ɑ̈m yi dhög óthwøw, lum ógöögø ki ɑyɑw kì wïj Kïti Kɑrmel.”

Cɑyi Pödhh-ɑ Buti Isrɑil yi Jwøk Arɑm

³ “Tyëng Dimɑceg ɑ́røngi ki orøng dwøng cɑrø, ge pɑ bødh ki cɑyø yi yɑn, mɑ́ tyëng Gilyɑd ɑ́pwöd yi gen ni byel.

⁴ Kipe orøngɑni, gøl Rɑ̈dh Adhɑil ógöjjɑ rɑ̈bø ki mɑc. Dör møg-ɑ ógerø yi Benɑdɑd órɑ̈b yi mɑc.

⁵ Thïggi dhøggi döri Dimɑceg ómøddɑ piny, kɑ rɑ̈nh-ɑ bëëdø kì yij Töör Aben nɑ̈g geki jɑngi Bet Eden. Tyëng Arɑm ókøøl piny Kïr gɑ ɑmɑgg.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk.

Pelistiyɑ̀

⁶ “Tyëng Pelistiyɑ̀ ɑ́røngi ki orøng dwøng cɑrø, ge pɑ bødh ki cɑyø yi yɑn, mɑ́ pödhø bëne ɑ́køøl yi gen gɑ ɑmɑgg, kɑ gï ngëwwi gen tyëng Edöm.

⁷ Dör-ɑ korri Gɑdhɑ̀ kɑɑl gen ógöjjɑ rɑ̈bø ki mɑc. Dör-ɑ pëddi tegø ócɑm yi mɑc.

⁸ Jɑngi Acdöd ónɑ̈g yi yɑn geki jɑngi Ackelön. Ekrön ócɑy yi yɑn; o tyëng Pelistiyɑ̀ møg-ɑ ɑ́döng óthumi ki thøø.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk.

Suur

⁹ “Tyëng Suur ɑ́røngi ki orøng dwøng cɑrø, ge pɑ bødh ki cɑyø yi yɑn, mɑ́ pödhø bëne ɑ́køøl gen Edöm. Kɑ lwöm-ɑ ɑ́mïdhi gen gɑ wɑdd geki ji-ɑ kyeelø pɑ̈d yi gen.

¹⁰ O dörri Suur ógöjjɑ rɑ̈bø ki mɑc, kɑ dör-ɑ korrii cɑm yi mɑc.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk.

Edöm

¹¹ “Tyëng Edöm ɑ́røngi ki orøng dwøng cɑrø, ge pɑ bødh ki cɑyø yi yɑn. Mɑ́ wɑddi gen, ɑ løg tyëng Isrɑil, ɑ́nɑ̈g yi gen ge thɑngg-ɑ cinggi gen, kɑ pëthi gen ódhɑ̈lø lɑ̈ɑ̈mø ki wɑddi gen.

¹² Kì bɑng menɑni, kɑɑl Temɑn ógöjjɑ rɑ̈bø ki mɑc, kɑ dör-ɑ korri Bodhrɑ̀ cɑm yi mɑc.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk.

Amön

¹³ “Tyëng Amön ɑ́røngi ki orøng dwøng cɑrø, ge pɑ bødh ki cɑyø yi yɑn, mɑ́ kì yij liny-ɑ ɑ́nyɑg yi gen, ge lɑny-ɑ kej gen, tyëng-ɑ mɑ̈nn møg-ɑ bɑ ɑ́yɑjj yethi gen ɑ́kɑg gen kì Gilyɑd.

¹⁴ Kì bɑng menɑni, dörri Rɑbɑ̀ ógöjjɑ rɑ̈bø ki mɑc, kɑ dörr-ɑ korrii cɑm yi mɑc. Mɑnyɑni órɑ̈b-ɑ́ɑ̀ cyɑ̈ɑ̈ng liny, linyɑni óbëëd e teeg cɑrø ki mendwøng ni ɑtunø.

¹⁵ Rɑ̈ɑ̈dh gen ókɑ̈l ɑ́ ɑmɑg geki jɑgge. Ge ókɑ̈l kì kej ɑ́kyel bënn.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk.