Agɑy 1 - WÄNYI KWËRØ 2011

Kwøbbi Jwøng-ɑ Ácwɑ̈ɑ̈j kinni Døøg Kengø ki Gerø

¹ Kì ryeew runni jyɑ̈gi Rɑ̈nhdwøng Dɑryøs, kì kyeel cyɑ̈nggi bïkyeel dwɑ̈tt, ɑ ɑ́öni Jwøng-ɑ Ácwɑ̈ɑ̈j ki wöödø e kwøbbɑni kwøb-ɑ yi Agɑy jɑltöng, e köbb-ɑ Dherubɑbïl wɑ̈d Ceɑltiel, jɑngi mïïri kì Yeudiyɑ̀, geki Jöcwø wɑ̈d Yödhɑdɑk Ókwër-ɑ Dwøng.

² Agɑy jɑltöng ɑ́köbbi yi Jwøng-ɑ Ácwɑ̈ɑ̈j kinni, “Ji møg okööbø i men pɑth ki bøli kej døøgi Kengø ki gerø.”

³ Aköbbi Agɑy jɑltöng yi Jwøng-ɑ Ácwɑ̈ɑ̈j i köbbe ji wöödø men kinni,

⁴ “Wun ɑ jiɑ, wude ɑ bëëd wun kì yethi ud mø thøø yi gerø, o Kengɑ bɑ thur?

⁵ Gïg-ɑ nyi cwöb kiper wun pɑ nenni yi wun?

⁶ Wu kɑ̈g-ɑ jɑmmì mø gïïr, de wu kɑj-ɑ mø nøg. Wu ocyɑ̈mø, de wu pɑ yɑ̈ng. Wu omɑ̈dhø, de röödhø pɑ thøw. Wu orugø ki ógudh, de dëlli wun pɑ lënhi. O ngɑn-ɑ göögø ngyënye pɑ rømmi ree, ge nɑ gïn-ɑ ócïb yij kidhø me twïyø.

⁷ Gïn-ɑ́ pere ɑ́cwöb møgɑni, pɑ yod yi wun?

⁸ Kedhu wïj kït, kɑ wu kɑ̈ni wun ki pɑ̈mmì, kɑ Kengø ger wun, codhe o pyëwɑ mïne, o yɑ mɑlli ni kenyi bëëde ceth.

⁹ “Wu nyii rumø kinni wu ókɑ̈jø ki jɑmmì mø gïïr, de ge nyi yod ge nøg kenyi kɑ̈ɑ̈l wun gen pɑc, ge nyi rënyɑ’ rënyø. Á kipe ngø ɑ göögɑ kinøw? Kipe kɑ̀ bëëd wu göög ɑ ri gyer ki uddi wun, de Kengɑ bɑ thur.

¹⁰ Bene ɑ bëëd e bong kødh, o bong gïn twïy.

¹¹ Piny bëne; wɑ̈thi kïttì, kí pwödh, kí bɑ̈ggi oløg kí yenh dhetun, kí gïg-ɑ twïy bënn, kí ji geki lɑ̈yy, ge ɑ́göjjɑ mel.”

Lïngi Kwøbbi Jwøng-ɑ Ácwɑ̈ɑ̈j yi Ji

¹² Codhe, ɑlïngi kwøbbi Jwøng-ɑ Ácwɑ̈ɑ̈j yi Dherubɑbïl geki Jöcwø kí tyëng-ɑ ɑ́dwöög kì yïnø kì Bɑbïlöniyɑ̀ bënn. Kɑ gïn-ɑ ɑ́köbbi gen yi Jwøng-ɑ Ácwɑ̈ɑ̈j, Jwøøg gen gwøg gen. Ge ɑ́bwøg, kɑ dhøg Agɑy, jɑlwööni Jwøng-ɑ Ácwɑ̈ɑ̈j lïngi yi gen.

¹³ Codhe, ɑköbbi wööni Jwøng-ɑ Ácwɑ̈ɑ̈j ji yi Agɑy kinni, Jwøng-ɑ Ácwɑ̈ɑ̈j okööbø kinni, “Yɑ óbëëdø kì kelli wun.”

¹⁴ Acïb kwøbbi gwøøg Kengø pëthi ji yi Jwøng-ɑ Ácwɑ̈ɑ̈j, ɑ løg Dherubɑbïl, jɑngi Yeudiyɑ̀, kí Jöcwø Ókwër-ɑ Dwøng, kí tyëng-ɑ ɑ́dwöög kì yïnø bënn. Acɑ̈gi gen ki geri Kengi Wïlɑ̈bø, Jwøng-ɑ Ácwɑ̈ɑ̈j, Jwøøg gen,

¹⁵ kì pyɑ̈r ɑ́ryew wïdɑ́ngween cyɑ̈nggi bïkyeel dwɑ̈tt, kì ryeew runni Rɑ̈nhdwøng Dɑryøs kì yij lɑwø.