tiṭus 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بولُس اخدّام ن‑ربّي د‑ورقّاس ن‑ياسوع لماسيح لّي‑يّي‑يژلين اد‑مالاغ ءي‑يمژلاين ن‑ربّي مامنك اد‑تامنّ س‑واوال‑نس، ءيسّانّ كولّو ما‑يگان لحقّ ن‑وغاراس‑نس

² لّي‑يتاوين س‑رّجا ءيصحان ن‑تودرت ءيدومن. ربّي ءور‑ا‑يسّكيركيس. غاكود لّيغ ءور‑تا‑يخلق يات ا‑ينّا راد‑اغ‑تيلي تودرت‑اد.

³ ءيسّبايّن‑تّ‑يد غ‑وزمز‑اد لّي‑يقصاد س‑لخبار لّي‑س‑يّي‑يوصّا ربّي انجّام‑نّغ ا‑سرس‑تبرّاحغ.

⁴ ءي‑تيطوس ءيوي ءيعزّان غ‑تاگُمات لّيمان‑نّغ. اد‑اك‑تيلي لباراكا د‑سّلامت زغ‑ربّي باباتنّغ د‑لماسيح ياسوع انجّام‑نّغ.

اژلاي ن‑يمغارن

⁵ ماياد ا‑ف‑ك‑ين‑فلغ غ‑يگزير ن‑كريت، باش ا‑تكمّلت ما‑يقامان غ‑تووري، تژليت كرا ن‑مدّن غ‑كرايگاتّ تامدينت اد‑گن ءيمغارن ن‑ومناگّار غمكلّي‑ف‑ك‑وصّاغ.

⁶ ءيقّان‑د امغار ا‑يگ واد غ‑ور‑يلّي لعيب، ءيطّاف غير يات‑تمغارت. ءيقّان‑د تاروا‑نس اد‑گن ءيمومنّ بلا‑دا‑سرسن‑تاشتكّان مدّن ءيس‑ا‑سكارن ما‑يُخشنّ ءولا‑دا‑تفّوغن زغ‑واوال ن‑ايت‑دارسن.

⁷ ءيقّان‑د انگابال ا‑يگ واد غ‑ور‑اكُّ‑يلّي كرا لّعيب اشكو تاووري ن‑ربّي ا‑را‑يگابل. ا‑ور‑يگ واد ءيتحگارن وييّاض نغد واد ءيتقلاقالن نغد واد باهرا ءيسّان تيسّي ءيكتين نغد واد ءيتمّاغن نغد واد ءيتّيرين ا‑يسّمون ما‑يگّوتن ءي‑يخف‑نس.

⁸ ءيقّان‑د ا‑يگ واد ءيسّمرحبان س‑ويلّي تمودّونين، ءيگ واد دار ءيعزّا كولّو ما‑يفولكين، ار‑يتنباض غ‑وگايّو‑نس ار‑بدّا‑يسكار س‑لحقّ، ءيغوس‑وول‑نس ءيغوي غ‑يخف‑نس.

⁹ ءيقّان‑ت‑يد ا‑يامژ غ‑يواليون زگانين لّي‑س‑ا‑نسّلماد. غمكاد ا‑س‑را‑ييژضار ا‑يزّعام وييّاض س‑ولمّود يُغژانّ، ءيرار اوال ءي‑وانّا‑ت‑يضاضّن.

توگّا ف‑ايت‑كريت

¹⁰ اشكو گّوتن مدّن ءور‑رين اد‑سفليدن س‑واوال‑نّغ، باهرا غويلّي تّيرينين اد‑ژّالّن ءي‑دّات، ار‑جلّون وييّاض س‑تجمّاعت ءيخوان.

¹¹ ءيقّان‑ك‑يد ا‑تن‑تسّفسّات، اشكو ار‑سّگراوالن كرا ن‑ايت‑تگُمّا كولّوتن. ار‑سّلمادن ما‑ور‑يگين لحقّ باش اد‑تامژن كرا ءي‑يخف‑نسن.

¹² ءيلّا يان گو‑كريت لّي‑مي‑تّينين ‹نّابي›، ءولا نتّا ءيساول فلّاسن ءينّا: «ايت‑كريت ار‑بدّا‑سّكيركيسن. زوند لوحوش أُخشنّين اد‑گان. غير ءيطس د‑ومشّو ا‑ف‑ا‑سكارن.»

¹³ أُغژانّت توگّا‑ياد. غايان ا‑ف‑ك‑يخصّا ا‑تن‑تشّحشّمت س‑لمعقول، باش اد‑زگان غ‑وغاراس لّماسيح،

¹⁴ ا‑ور‑سول‑تّي‑تاوين غ‑تحاجيّين ن‑ايت‑يودايا ءولا لوصيّات ن‑مدّن لّي‑فّوغنين زغ‑لحقّ.

¹⁵ هاتي كولّو ما‑يلّان ءيغوس ءي‑ويلّي دار ءول ءيغوسن، والاينّي ءور‑يغوس يات دار ويلّي مي ركان‑وولاون‑نسن ءور‑رين اد‑امنّ. نتني ءيركا لعاقل‑نسن ءولا ول‑نسن.

¹⁶ ار‑تّينين ءيس‑سّنّ ربّي، والاينّي ءيسكّيرن‑نسن ا‑يمالان ءيس‑ور‑ت‑سّينّ. هان ءيحاشا‑تن ربّي، ءور‑ا‑سكارن س‑واوال‑نس ءولا ژضارن ءي‑ما‑يفولكين.