raɛut 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tahjjalt nuɛmi d‑tslatin‑ns

¹ ġ‑uwssan lli‑ġ‑a‑tḥkamn iriyasn, illa‑uġʷni ġ‑wakal n‑israyil. iddu yan‑urgaz gu‑bitlaḥm ġ‑yahuda a‑igawr ġ‑tmazirt n‑muwab, ntta d‑tmġart‑ns d‑sin tarwa‑ns.

² iga ism‑ns alimalik, ig ism n‑tmġart‑ns nuɛmi, gn ismawn n‑sin tarwa‑nsn maḥlun d‑kilyun. gan ntni zġ‑tagʷmat n‑ayt‑afrata. ffuġn zġ‑bitlaḥm ġ‑wakal n‑yahuda, ddun kšmn s‑tmazirt n‑muwab zdġn gis.

³ izri ma‑izrin immt alimalik argaz n‑nuɛmi, tqama nttat d‑sin tarwa‑ns.

⁴ awin ntni tislatin zġ‑ist‑muwab, iga ism n‑yat ɛurfa, ig ism n‑tis snat raɛut. zdġn ġin ma‑itggan mraw isggʷasn.

⁵ immt ilmma maḥlun d‑kilyun s‑sin. ġmkan a‑s‑tqama‑tmġart, mmutn‑as sin tarwa‑ns d‑urgaz‑ns.

⁶ lliġ tlla nuɛmi ġ‑tmazirt n‑muwab, tsfld is‑d‑yakmur sidi rbbi s‑mddn‑ns ifk‑asn amššu. tskr f‑a‑di‑twrri s‑tmazirt‑ns, nttat d‑tslatin‑ns.

⁷ tffuġ‑d zġ‑ġin nttat d‑tslatin‑ns s‑snat, munnt‑d d‑uġaras lli‑itawin s‑wakal n‑yahuda.

⁸ tsawl nuɛmi s‑snat‑tslatin‑ns tini‑asnt: «wrryamt kunninti kud yat s‑tgmmi n‑innas. ad‑didunt‑iskr sidi rbbi s‑tayri iḥnnan, ġmklli tskrmt d‑willi mmutnin ula didi nkki.

⁹ ad‑awnt‑ifk sidi rbbi rraḥt i‑kud yat ġ‑tgmmi n‑urgaz‑ns.» tssudn‑tnt tiri a‑didsnti‑tmsifiḍ. imṭṭawn a‑s‑ullnt awal‑nsnt ġakudan,

¹⁰ inint‑as: «uhu, ra‑dim‑nmun s‑dar ayt‑darm.»

¹¹ tini‑asnt nuɛmi: «ġir wrryamt a‑isti. mah̬ aylliġ ra‑didi‑tmunmt? is‑sul dari tarwa ġ‑waḥlig‑inu ad‑awnt‑gn islan?

¹² wrryamt a‑isti d‑uġaras‑nunt. ha nkki uwssrġ, ur‑sul‑giġ i‑littihal. iġ‑akkʷ‑dari rrja, yawi‑yyi kra n‑urgaz ġ‑iḍ‑ad, aruġ dids tarwa,

¹³ is‑ra‑tqlmt ard mqqurn? is‑ra‑tqamamt bla littihal f‑ssibt‑nsn? uhu a‑isti, ha tasa‑nu ar‑tbrri f‑ssibt‑nunt, ašku hati iffuġ‑d‑sri‑ufus n‑sidi rbbi.»

¹⁴ allnt daġ awal‑nsnt s‑imṭṭawn. tssudn ɛurfa tafqqirt‑ns tmsafaḍ dids, imma raɛut tumẓ sul gis.

¹⁵ tini‑as nuɛmi: «han tanuṭṭ‑nm twrri s‑dar ayt‑dars d‑id‑rbbi‑ns. zayd tmunt dids.»

¹⁶ trar‑as raɛut: «ad‑ur‑iyi‑tssġwit a‑km‑flġ dduġ zġ‑tama‑nm. ašku innas tddit a‑s‑rad‑dduġ, d‑innaġ tgawrt a‑ġ‑rad‑gawrġ. ayt‑darm ra‑tn‑gġ d‑ayt‑dari, d‑rbbi‑nm ra‑t‑gġ d‑rbbi‑nu.

¹⁷ d‑innaġ tmmutt a‑ġ‑rad‑mmtġ, d‑ġin a‑ġ‑rad‑tyawmḍalġ. ggulliġ s‑sidi rbbi a‑yyi‑iɛddb s‑uggʷar, iġ‑illa ma‑yyi‑dim‑yaṭṭun abla lmut.»

¹⁸ lliġ tẓra nuɛmi raɛut mamnk ad‑bahra‑tumẓ a‑dids‑tmun, ur‑sul‑as‑tnni yat.

¹⁹ ftunt s‑snat aylliġ lkmnt bitlaḥm. lliġ‑n‑kšmnt s‑bitlaḥm, ar‑ttmussu‑tmdint ar‑kullu‑ssmqsant‑tmġarin: «izd s‑ṣṣaḥt nuɛmi ayad?»

²⁰ trar‑asnt: «a‑ur‑iyi‑taqramt s‑‹nuɛmi›, walaynni aqramt‑iyi s‑‹mara›, ašku wasmmum išqan a‑flla‑izzri rbbi itjhhdn.

²¹ ddiġ nkki s‑ifassn ɛmmrnin, irar‑iyi‑d sidi rbbi s‑ifassn h̬wanin. mah̬ a‑yyi‑ttinim ‹nuɛmi›? sidi rbbi ur‑sri‑irḍi. imzi‑yyi walli itjhhdn.»

²² ġmkan a‑s‑di‑twrri nuɛmi, nttat d‑tslit‑ns raɛut ullt‑muwab. uškant‑d zġ‑tmazirt n‑muwab, lkmnt‑d bitlaḥm ġ‑uwssan imzwura n‑tmgra n‑ṭmẓin.