तीतुस 1 - सरगुजिया बाइबिल

नमस्कार

¹ पौलुस कती ले जेहर परमेश्वर कर कमिया अउ यीशु मसीह कर प्रेरित है, परमेश्वर कर चुनल मन लोग कर बिश्वास अउ ओ सत्य कर पहिचान कर अनुसार जेहर भक्ति कर अनुसार है,

² ओ अनन्त जीवन कर आसरा पर, जेकर प्रतिज्ञा परमेश्वर हर, जेहर झूठ गोठियाए नही सनातन ले करिस है,

³ पर ठीक समय पर अपन बचन ला ओ प्रचार कर द्वारा परगट करिस, जेहर हमर उद्धारकर्ता परमेश्वर के हुकूम कर अनुसार मोला सौपल गईस है।

⁴ तीतुस कर नाव, जेहर बिश्वास कर सहभागिता कर बिचार ले मोर सच्चा बेटा है: परमेश्वर दाऊ अउ हमर उद्धारकर्ता मसीह यीशु कती ले तुमन ला अनुग्रह अउ शान्ति मिलत रहे।

प्राचीन मन कर योग्यता

⁵ मैहर एकरे बर तोला क्रेते मे छोएड़ आए रहे, कि तय बाचल गोएठ मन ला सुधारबे, अउ मोर हुकूम कर अनुसार नगर-नगर प्राचीन मन ला नियुक्त करबे।

⁶ जेमन मन बिन दोष के अउ एक ही घरदारिन कर घरदार हो, जेमन कर लईका मन भी बिश्वासी होए, अउ ओमन मे लुचपन अउ नुरंकुशता कर दोष झिन हो।

⁷ काबर कि अध्यक्ष ला परमेश्वर कर भण्डारी होए कर कारन बिन दोष कर होए बर चाही; न हठी, न क्रोधी, न पियक्कड़, न मार पीट करे बाला, अउ न नीच कर कमाई कर लोभी होए,

⁸ पर पहुना करे बाला, भलाई कर चाहे बाला, संयमी, न्यायी, पवित्र अउ जितेन्द्रिय होए;

⁹ अउ ओ बिश्वास योग्य बचन पर जेला धर्मोपदेश कर अनुसार है, जमे रहे; कि खरा शिक्षा ले उपदेश दे सके; अउ बिरोधी मन कर मुह ला भी बन्द कईर सके।

बिन काम कर गुरू जी

¹⁰ काबर कि ढेरेच ले अनुशासन हिन लोग मन, निरंकुश, बकवादी अउ धोखा देहे बाला है; बिशेष कईर के खतना बाला मन ले।

¹¹ एमन कर मुह बन्द करे बर चाही: ये लोग मन नीच कमाई बर अनुचित गोएठ मन ला सिखाए के घर कर घर ला बिगाएड़ देथे।

¹² ओहिच मन ले एक झन हर, जे ओहिच मन कर अगमजानी है, कहिस आहे, “क्रेती लोग मन हमेसेच झूठा, दुष्ट पशु, अउ आलसी पेटू होथे।”

¹³ ये गवाही सहिच है, एकरे बर ओमन ला कड़ाई ले चेतावनी देहे कर कि ओमन बिश्वास मे पक्का होए जाए,

¹⁴ अउ यहूदी मन कर कथा कहानी मन अउ ओ मैनसे मन कर हुकूम मन पर मन झिन लगाबे, जेमन सत्य ले भटेक जाथे।

¹⁵ शुद्ध लोग मन बर सबेच चीज हर भी शुद्ध है, पर अशुद्ध अउ अबिश्वासी मन बर कुछ भी शुद्ध नी है, बरन ओमन कर बुईध अउ बिवेक दोनोच हर अशुद्ध है।

¹⁶ ओमन मन कहथे, कि हमन परमेश्वर ला जानथन पर अपन बुता मन ले ओकर इनकार करथे, काबर कि ओमन घृनित अउ हुकूम नी माने बाला है, अउ कोनो बड़िया बुता करे लाएक नी है।