रोमियो 1 - सरगुजिया बाइबिलनमस्कार 1 पौलुस कती ले जेहर यीशु मसीह कर कमिया है, अउ प्रेरित होए बर बुलाल गईस है, अउ परमेश्वर कर ओ सुसमाचार बर अलगेच करल गईस है। 2 जेकर बर ओहर आगू ले अपन अगमजानी मन कर द्वारा पवित्र शास्त्र मे, 3 परमेश्वर हर अपन बेटा हमर प्रभु यीशु मसीह कर बिषय मे प्रतिज्ञा करे रहिस; ओहर देह कर भाव ले त दाऊद कर बंश ले जनम लेहिस। 4 अउ पवित्रता के आत्मा कर भाव ले मरल मन ले जी उठे के कारन सामर्थ कर संग परमेश्वर कर बेटा ठहरिस। 5 ओकर द्वारा हमन मन अनुग्रह अउ प्रेरिताई मिलिस कि ओकर नाव के कारन सबेच जाएत कर मैनसे मन बिश्वास कईर के ओकर मानब, 6 जेमे तुमन मन भी यीशु मसीह कर होए बर बुलाल गए हन। 7 ओ सबेच झन कर नाव जेमन मन रोम मे परमेश्वर कर प्यारे है, अउ पवित्र होए बर बुलाल गए हन। हमर दाऊ परमेश्वर अउ प्रभु यीशु मसीह कती ले तुमन मन ला अनुग्रह अउ शान्ति मिलत रहे। रोम जाए कर इक्छा 8 आगू मैहर तुमन सबेच झन बर यीशु मसीह कर द्वारा अपन परमेश्वर ला धन्यवाद करत हो, काबर कि तुमन मन के बिश्वास कर चर्चा सबेच जगत मे होवत आहे। 9 परमेश्वर जेकर सेवा मैहर अपन आत्मा ले ओकर बेटा के सुसमाचार कर बिषय मे करथो, ओहिच मोर गवाह है, कि मैहर तुमन मन ला कोन नियर हमेसेच याद करथो, 10 अउ हमेसेच अपन प्रार्थना मन मे बिनती करथो कि कोनो रीति ले अब तुमन मन कर लिघे आए के मोर यात्रा परमेश्वर कर इक्छा ले सफल होए। 11 काबर कि मैहर तुमन मन ले मिले कर इक्छा करथो। कि मैहर तुमन मन ला कोनो आत्मिक बरदान देहू, जेकर ले तुमन मन जमे रईहा; 12 मने ये कि जब मैहर तुमन मन कर मांझा मे होहू, त हमन मन ओ बिश्वास कर द्वारा जेहर मोर मे अउ तुमन मन मे है, शान्ति पाहू। 13 अउ हे भाई मन, मैहर नी चाहत हो कि तुमन मन एकर ले अनजान रहा कि मैहर बार-बार तुमन मन कर लिघे आए बर चाहे, कि जईसन मोला दूसर जाएत मे फर मिलिस, ओहिच कस ही तुमन मे भी मिले बर चाही, लेकिन अब ले रोके रहे। 14 मैहर यूनानी मन अउ दूसर भाषा मन कर, अउ बुईधमान अउ बिन बुईधमान कर करजदार हो। 15 एकरे बर मैहर तुमन मन ला भी जेमन रोम मे रहथा, सुसमाचार सुनाए बर भरसक तियार हो। धर्मी हर बिश्वास ले जीही 16 काबर कि मैहर सुसमाचार ले नी लजाथो, एकरे बर कि ओहर हर एक बिश्वास करे बाला मन बर, आगू त यहूदी फिर यूनानी मन बर, उद्धार कर निमित परमेश्वर कर सामर्थ है। 17 काबर कि ओमे परमेश्वर कर धार्मिकता बिश्वास ले अउ बिश्वास बर परगट होथे; जईसन लिखल आहे “बिश्वास ले धर्मी जन मन जीवित रही।” अधर्म पर परमेश्वर कर गुस्सा 18 परमेश्वर कर गुस्सा त ओमन मन बर सबेच कर अभक्ति अउ अधर्म पर स्वर्ग ले परगट होथे, जेमन सत्य ला अधर्म ले दबाए रखथे। 19 एकरे बर कि परमेश्वर कर बिषय मे ज्ञान ओमन मन कर मन मे परगट है, काबर कि परमेश्वर हर परगट करिस है। 20 ओकर बिन देखल गुन, मने कि ओकर सनातन सामर्थ अउ परमेश्वर, जगत के सृष्टि कर समय ले ओकर बुता कर द्वारा देखे मे आत है हिया तक ले कि निरुत्तर है। 21 एकरे कारन कि परमेश्वर ला जाने पर भी ओमन मन परमेश्वर कर लाएक बड़ाई अउ धन्यवाद नी करिन, लेकिन ब्यर्थ बिचार करे लागिन, हिया ले कि ओमन मन कर बिन बुईधमान मन कर मन हर अन्धार होए गिस। 22 ओमन अपन आप मन ला बुईधमान बताए के मूर्ख बईन गिन। 23 अउ अबिनाशी परमेश्वर कर महिमा ला नाशवान मैनसे मन मे अउ चरई अउ चाएर गोड़ दार, अउ रेंगे बाला पशु मन कर मूरती कर समानता मे बदेल देहिन। 24 ये कारन परमेश्वर हर ओमन मन ला ओमन कर अभिलाषा मे अशुद्ध मन मे छोएड़ देहिस, कि ओमन मन अपन मे अपन देह कर आदर नी करे। 25 काबर कि ओमन मन हर परमेश्वर कर सचाई ला बदेल के झूठ बनाए देहिन, अउ सृष्टि कर उपासना अउ सेवा करिन, न कि ओ सृजनहार कर जेहर हमेसेच धन्य है। आमीन। 26 एकरे बर परमेश्वर हर ओमन मन ला नीच कर लालसा मन कर बस मे छोएड़ देहिस; हिया ले कि ओमन मन कर महिला मन ला भी स्वभाविक बेवहार ला ओकर ले जेहर स्वभाव कर बिरोध मे है, बदेल देहिस। 27 ओहिच कस ही मैनसे मन भी महिला मन कर संग स्वभाविक बेवहार ला छोएड़ के अपनेच मे कामातुर होए के जले लागिन, अउ मैनसे मन मैनसे मन कर संग निरलज बुता कएर के अपन भ्रम कर ठिकेच फर ला पईन। 28 जब ओमन मन परमेश्वर ला चिनहे बर नी चाहिन, त परमेश्वर हर भी ओमन मन ला ओमन कर निकम्मा मन मे छोएड़ देहिस; कि ओमन सही बुता नी रही। 29 एकरे बर ओमन मन सबेच नियर कर अधर्म, अउ दुष्टता, अउ लोभ, अउ बैरभाव ले भईर गिन; अउ डाह, अउ हत्या, अउ झगड़ा, अउ छल, अउ ईर्ष्या ले भईर गिन, अउ चुगली खाए बाला, 30 बदनाम करे बाला, परमेश्वर ले घृना करे बाला मन, दूसर मन कर अनादर करे बाला, अभिमानी, डिंगमार, बुरा-बुरा गोएठ के बनाए बाला, दाऊ-दाई कर हुकूम नी माने बाला। 31 बिन बुईध कर, बिश्वासघाती, मया रहित अउ निरदई होए गईन, 32 ओमन मन त परमेश्वर कर ये बिधी ला जानत रहिन कि एसन-एसन बुता करे बाला मन मृत्यु के सजा कर लाएक है, तबो ले न केबल अपनेच मन एकस बुता करथे, बरन करे बाला मन ले भी खुश होथे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation