परकासितवाक्य 1 - सरगुजिया बाइबिल

परिचय

¹ प्रभु यीशु मसीह कर प्रकाशितवाक्य, जेहर ओला परमेश्वर हर एकरे बर देहिस कि अपन कमिया मन ला ओ गोएठ ला जेमन जलदिच होए बर जरूरेच हे, दिखाही, अउ ओहर अपन स्वर्गदूत ला भेज के ओकर द्वारा अपन कमिया यूहन्ना ला बतईस।

² जरूरेच परमेश्वर कर बचन अउ यीशु मसीह कर गवाही, मने कि जे कुछू ओहर देखे रहिस, ओकर गवाही देहिस।

³ धन्य हे ओमन जेमन ये अगमजानी कर बचन ला पढ़थे, अउ ओहर जेहर सुनथे, अउ एकर मे लिखल गोएठ मन ला मानथे, काबर कि समय लिघे हे।

सातोच कलीसिया मन ला यूहन्ना कर नमस्कार

⁴ यूहन्ना कती ले एसिया देश कर सात कलीसिया मन कर नाव; ओकर कती ले, जेहर है, अउ जेहर रहिस, अउ जेहर आए बाला है; अउ ओ सात आत्मा मन कती ले, जेहर ओकर सिंहासन कर आगू मे है,

⁵ अउ यीशु मसीह कती ले, जेहर बिश्वास लाएक गवाही अउ मरल होवल मे ले जी उठे बाला मन मे बड़खा बेटा अउ पृथ्वी कर राजा मन कर मालिक है, तुमन मन ला अनुग्रह अउ शान्ति मिलत रहे। ओहर हमर ले प्रेम रखथे, अउ ओमन अपन लहू कर द्वारा हमर पाप मन ले छोड़ईस है।

⁶ अउ हमन ला एक राज्य अउ अपन दाऊ परमेश्वर बर याजक भी बनाए देहिस, ओकरेच महिमा अउ पराक्रम हमेसेच होवत रहे। आमीन

⁷ देखा, ओहर बदरी मन कर संग मे आए बाला है; अउ सबेच आएख हर ओला देखही, बरन जेमन हर ओला बेधे रहिन, ओमन मन भी ओला देखही, अउ संसार कर सबेच कुल मन ओकर कारन छाती ला पीटही। हा आमीन।

⁸ प्रभु परमेश्वर, जेहर है, अउ जेहर रहिस, अउ जेहर आए बाला हे; जेहर सर्वशक्तिमान हे: ये कहथे, “मैहर ही अलफा अउ ओमेगा हो।”

यूहन्ना ला यीशु मसीह कर दर्शन

⁹ मै यूहन्ना, जेहर तुमन कर भाई, अउ यीशु मसीह कर दुख, अउ राएज अउ धीरज मे तुमन कर सहभागी हो, परमेश्वर कर बचन अउ यीशु कर गवाही कर कारन पतमुस नाव कर टापू मे रहे।

¹⁰ मैहर प्रभु कर दिन मे आत्मा मे आए गए, अउ अपन पाछू तुरही कसन ढेरेच शब्द ले ये कहत सुने,

¹¹ “जे कुछ ला तय हर देखथस, ओला पुस्तक मे लिख के सातो कलीसिया मन कर लिघे भेज दे, मने कि इफिसुस, अउ स्मुरना, अउ पिरगमुन, अउ थुआतीरा, अउ सरदीस, अउ फिलदिलफिया, अउ लौदीकिया ला।”

¹² तब मैहर ओला, जेहर मोर ले गोठियात रहिस; देखे बर अपन मुह ला फेरे; अउ पाछू घुईम के मैहर सोना कर सात दीवट मन ला देखे;

¹³ अउ ओ सात दीवट मन कर मांझा मे मैनसे कर बेटा नियर एक आदमी ला देखे, जेहर गोड़ तक ले कपरा पहिरे अउ छाती मे सोना कर पटुका बान्धल रहिस।

¹⁴ ओकर मूड़ अउ चुन्दी हर उज्जर ऊन बरन पाला कर नियर उज्जर रहिस; अउ ओकर आएख आगी कर ज्वाला कर नियर रहिस।

¹⁵ ओकर गोड़ उत्तम पीतल के नियर रहिस, जेहर माना भट्ठी मे तपाल गए रहिस; अउ ओकर गोएठ ढेरेच पानी कर शब्द कर नियर रहिस।

¹⁶ ओहर अपन जेवनी हाथ मे सात तरई मन ला लेहल रहिस, अउ ओकर मुख ले तेज दुई धारी तलवार हिकलत रहिस; ओकर मुह हर एसन जलत रहिस, जेकस कि सूरज हर कड़ी धूप कर समय मे चमकथे।

¹⁷ जब मैहर ओला देखे, त ओकर गोड़ मे मुरदा मन कस गिर परे। ओहर मोर पर अपन जेवनी हाथ रईख के कहिस, “झिन डर; मैहर पहला अउ आखरी, अउ जीवता हो,

¹⁸ मैहर मईर गए रहे, अउ अब अझे देख मैहर युगानुयुग जीवित हो; अउ मृत्यु अउ अधोलोक कर कुंजी मन मोरेच जग है।

¹⁹ एकरे बर जे गोएठ ला तय हर देखे हस अउ जे गोएठ मन होवत है; अउ जे गोएठ एकर पाछू मे होए बाला है, ओ सबेच ला लिख ले।

²⁰ मने कि ओ सातो तरई मन कर भेद जेमन ला तय हर मोर जेवनी हाथ मे देखे रहे, अउ ओ सातो सोना कर दीवट मन कर भेद: ओ सात तरई सातोच कलीसिया मन कर स्वर्गदूत हे, अउ ओ सात दीवट सात कलीसिया मन हे।”