गलातियों 1 - सरगुजिया बाइबिलपौलुस कती ले नमस्कार 1 पौलुस कती ले जेहर न लोग मन ले अउ न लोग मन कर द्वारा, बरन यीशु मसीह अउ परमेश्वर दाऊ कर द्वारा, जेहर ओला मरल मन ले जीलईस, प्रेरित है। 2 अउ सबेच भाई मन कती ले जेमन मोर संग मे है, गलातिया परदेस कर कलीसिया मन कर नाव। 3 परमेश्वर दाऊ, अउ हमर प्रभु यीशु मसीह कती ले तुमन मन ला अनुग्रह अउ शान्ति मिलत रहे। 4 ओहिच हर अपन आप ला हमर पाप मन बर दे देहिस, ताकि हमर परमेश्वर अउ दाऊ कर इक्छा कर अनुसार हमन मन ला ये बर्तमान बुरा संसार ले छोड़ाए। 5 ओकर स्तुति अउ बड़ाई हमेसेच होवत रहे। आमीन। एकेच ठे सुसमाचार 6 मोला आश्चर्य होथे, कि जेहर तुमन मन ला मसीह कर अनुग्रह मे बुलईस ओकर ले तुमन मन एतेक जल्दी फिर के अउ ही नियर कर सुसमाचार कती झुके लागा। 7 लेकिन ओ दूसर सुसमाचार है ही नही, पर गोएठ ये है, कि केतेक झन एसन है, जब तुमन मन ला घबराए देही, अउ मसीह कर सुसमाचार ला बिगाड़े बर चाहथे। 8 लेकिन अगर हमन मन या स्वर्ग ले कोनो अउ दूत हर भी ओ सुसमाचार ला छोएड़ जेला हमन मन हर तुमन मन ला सुनाए हन, कोनो अउ सुसमाचार तुमन मन ला सुनाए, त शापित है। 9 जईसन हमन मन आगू ले ये कह दारे हन, ओ मैनसे मन कस मैहर अब फिर कहथो कि ओ सुसमाचार ला छोएड़ जेला तुमन मन गरहन करे हा, अगर कोनो अउ सुसमाचार सुनाथे, त शापित है। 10 अब मैहर का मैनसे मन ला मनात रहो या परमेश्वर ला? का मैहर मैनसे मन ला खुश करे बर चाहथो? अगर मैहर अब तक ले मैनसे मन ला ही खुश करत रहते, त मसीह कर कमिया नी होथे। सेवा बर बुलावा 11 हे भाई मन, मैहर तुमन ला बताए देहथो कि जे सुसमाचार ला मैहर तुमन मन ला सुनाए हो, ओहर मैनसे मन कती ले नी है। 12 काबर कि ओहर मोला मैनसे मन कती ले नी पहुचिस, अउ न मोला सिखाल गईस, पर यीशु मसीह कर प्रकाशन ले मिलिस। 13 यहूदी मत ले आगू मोर चाल-चलन रहिस, ओकर बिषय मे तुमन मन सुईन दारे हा; कि मैहर परमेश्वर कर कलीसिया ला ढेरेच ही सताए अउ नाएस करत रहे। 14 अपन ढेरेच जाएत बाला मन ले जेमन मोर समय कर रहिन, यहूदी मत ले ढेरेच बड़हत जात रहिन अउ अपन बाप दादा मन कर परमपरा मन बर ढेरेच ही उत्साहित रहिन। 15 लेकिन परमेश्वर कर, जेहर मोर दाई कर पेट ले ही मोला ठहरईस अउ अपन अनुग्रह ले बुलाए लेहिस, 16 जब इक्छा होईस कि मोर मे अपन बेटा ला परगट करे कि मैहर दूसर जाएत मे ओकर सुसमाचार सुनाहू; त न मैहर मांस अउ लहू ले सलाह लेहे, 17 अउ न यरूशलेम शहर मे ओमन मन कर लिघे गए जेमन मोर ले आगू प्रेरित रहिन, पर तुरतेच अरब देश मे चईल गईन अउ फिर हुवा ले दमिश्क नगर मे फिर अईस। 18 फिर तीन दिन कर पीछू मैहर कैफा ले भेंट करे बर यरूशलेम शहर गए, अउ ओकर जग पन्द्रह दिन तक ले रहे। 19 लेकिन प्रभु कर भाई याकूब ला छोएड़ अउ प्रेरित मन ले कोनो ले नी मिले। 20 जे गोएठ ला मैहर तुमन मन ला लिखथो, देखा, परमेश्वर ला उपस्थित जानए के कहथो, कि ओमन मन झूठा नी है। 21 एकर पीछू मैहर सीरिया अउ किलिकिया कर प्रान्त मन मे आए। 22 पर यहूदिया परदेस कर कलीसिया मन हर जेमन मसीह मे रहिन मोर मुह ला कभो नी देखे रहिन। 23 लेकिन एहिच सुने रहेन कि जेहर हमन मन ला सतात रहिस, ओहर अब ओहिच बिश्वास कर सुसमाचार सुनाथे जेला आगू नाश करत रहिस। 24 अउ ओमन मन मोर बिषय मे परमेश्वर कर महिमा करथे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation