इफिसियों 1 - सरगुजिया बाइबिल

नमस्कार

¹ पौलुस कती ले जेहर परमेश्वर कर इक्छा ले प्रभु यीशु मसीह कर प्रेरित है, तुमन मन पवित्र अउ मसीह यीशु मे बिश्वासी लोग मन कर नाव जेमन इफिसुस मे है।

² हमर दाऊ परमेश्वर अउ प्रभु यीशु मसीह कती ले तुमन मन ला अनुग्रह अउ शान्ति मिलत रहे।

मसीह मे छुटकारा

³ हमर प्रभु यीशु मसीह कर परमेश्वर अउ दाऊ कर धन्यवाद होए कि ओहर हमन मन ला मसीह मे स्वर्गीय जगहा मन मे सबेच नियर कर आत्मिक आशीष देहिस आहे।

⁴ जईसन ओहर हमन मन ला जगत कर शुरू ले आगू ओमे चुईन लेहिस, कि हमन मन ओकर नजर मे पवित्र अउ निर्दोष होई।

⁵ अउ प्रेम मे ओहर अपन इक्छा के भला अभिप्राय कर नियर हमन ला अपन बर आगू ले ठहरईस कि यीशु मसीह कर द्वारा हमन ओकर लेपालक बेटा होए हन।

⁶ कि ओकर ओ अनुग्रह के महिमा कर स्तुति होए, जेला ओहर हमन मन ला ओ प्रिय ले सेत-मेत देहिस है।

⁷ हमन मन ला मसीह मे ओकर लहू कर द्वारा छुटकारा, मने कि अपराध मन कर छमा, ओकर ओ अनुग्रह के धन कर अनुसार मिलिस आहे,

⁸ जेला ओहर सबेच ज्ञान अउ समझ सहित हमन मन पर बहुताएत ले करिस।

⁹ काबर कि ओहर अपन इक्छा कर भेद ओ भला अभिप्राय कर अनुसार हमन मन ला बतईस, जेला ओहर अपन आप मे ठाएन लेहे रहिस

¹⁰ कि परमेश्वर के योजना कर अनुसार, समय के पूरा होए कर एसन प्रबन्ध होए कि जे कुछ स्वर्ग मे है अउ जे कुछ हर पृथ्वी पर है, सबेच ला ओहर मसीह मे जुटाही।

¹¹ ओहिच जेमे हमन भी ओकरेच मनसा ले जेहर अपन इक्छा कर मत अनुसार सबेच कुछ करथे, आगू ले ठहराए जाए के मीरास बनीन

¹² कि हमन, जेमन मन आगू ले मसीह पर आसरा रखे रहिस, ओकर महिमा के स्तुति कर कारन होए।

¹³ अउ ओहिच मे तुमन पर भी, जब तुमन मन सत्य कर बचन सुना, जेहर तुमन के उद्धार कर सुसमाचार है, अउ जेमे तुमन मन बिश्वास करेन, प्रतिज्ञा करल गईस पवित्र आत्मा कर छाप लागिस है।

¹⁴ ओहर ओकर खरीदल मन कर छुटकारा बर हमर मीरास कर बयाना है, कि ओकर महिमा कर स्तुति होए।

आत्मिक ज्ञान बर पौलुस कर प्रार्थना

¹⁵ ये कारन, मैहर भी ओ बिश्वास जेला तुमन मन मे जेहर प्रभु यीशु पर है अउ सबेच पवित्र लोग मन प्रति प्रेम कर सुसमाचार सुनाए के,

¹⁶ तुमन बर धन्यवाद करे बर नी छोड़न, अपन प्रार्थना मन मे तुमन मन ला याद करथो

¹⁷ कि हमर प्रभु यीशु मसीह कर परमेश्वर जेहर महिमा कर दाऊ है, तुमन ला अपन पहिचान मे ज्ञान अउ प्रकाश कर आत्मा देहे,

¹⁸ अउ तुमन मन कर आएख ज्योर्तिर मय होए कि तुमन जाएन ला कि ओकर बुलाहट कर आसरा का है, अउ पवित्र लोग मन मे ओकर मीरास कर महिमा कर धन कईसन है,

¹⁹ अउ ओकर सामर्थ्य हमन मे जेहर बिश्वास करथे, केतेक महान है, ओकर शक्ति कर प्रभाव कर ओ बुता कर अनुसार

²⁰ जेला ओहर मसीह कर बिषय मे करिस, कि ओके ला मरल मन ले जिलाए के स्वर्गीय जगहा मन मे अपन जेवनी कती,

²¹ सबेच नियर कर प्रधानता, अउ अधिकार, अउ सामर्थ्य, अउ प्रभुता कर, अउ सबेच नाव कर उपर, जे न केबल ये लोक मे पर आए बाला लोक मे भी लेहल जाही, बईठईस;

²² अउ सबेच कुछ ला ओकर गोड़ तरी कईर देहिस; अउ ओला सबेच चीज पर शिरोमनी ठहराए के कलीसिया ला दे देहिस,

²³ एहर ओकर देह हर है, अउ ओकरेच परिपूरनता है, जेहर सबेच मे सबेच कुछ ला पूरा करथे।