कुलुस्सी 1 - सरगुजिया बाइबिलआशीर्वाद 1 पौलुस कती ले, जेहर परमेश्वर कर इक्छा ले मसीह यीशु कर प्रेरित है, अउ भाई तीमुथियुस कती ले, 2 मसीह मे ओ पवित्र अउ बिश्वासी भाई मन कर नाव जेमन मन कुलुस्से मे रहथे। हमर दाऊ परमेश्वर कती ले तुमन मन ला अनुग्रह अउ शान्ति मिलत रहे। धन्यवाद 3 हमन तुमन बर हमेसेच प्रार्थना कईर के अपन प्रभु यीशु मसीह कर दाऊ मने कि परमेश्वर कर धन्यवाद करथन। 4 काबर कि हमन मन सुने हन, कि मसीह यीशु पर तुमन कर बिश्वास है, अउ सबेच पवित्र लोग मन ले प्रेम रखथा; 5 ओ आसरा करल चीज कर कारन जेहर तुमन बर स्वर्ग मे रखल आहे, जेकर बारे मे तुमन ओ सुसमाचार कर सत्य बचन मे सुईन दारे हा। 6 जेहर तुमन जग पहुचिस है, अउ जईसन जगत मे भी फर लाथे, अउ बड़हत जाथे, ओहिच कस जे दिन ले तय हर ओला सुने अउ सच्चाई ले परमेश्वर कर अनुग्रह ला पहिचाने हस, तुमन मे भी एहिच कस करथे। 7 ओकर ले जे शिक्षा ला तुमन मन हमर प्रिय सहकर्मी इपफ्रास ले पाए हा, जेहर हमर बर मसीह कर बिश्वास योग्य सेवक है। 8 ओहिच हर तुमन कर प्रेम ला जेहर आत्मा मे है हमन मन पर परगट करिस आहे। आत्मिक बढ़ोतरी बर प्रार्थना 9 एकरे बर जे दिन ले ये सुने हन हमन भी तुमन बर ये प्रार्थना अउ बिनती करे बर नी छोड़थन कि तुमन सबेच आत्मिक ज्ञान अउ समझ सहित परमेश्वर के इक्छा कर पहिचान मे परिपूरन होए जावा, 10 ताकि तुमन कर चाल-चलन प्रभु कर लाएक होए, अउ ओ सबेच नियर कर खुश होए, अउ तुमन मे हर नियर कर भला बुता कर फर लागे, अउ तुमन परमेश्वर कर पहिचान मे बड़हत जावा, 11 ओकर महिमा के शक्ति कर अनुसार सबेच नियर कर सामर्थ्य ले बलवान होवत जावा हिया तक कि आनन्द कर संग हर नियर कर धीरज अउ सहनशीलता दिखाए सका। 12 अउ दाऊ कर धन्यवाद करत रहा, जेहर हमन ला एकर लाएक बनईस कि ज्योति मे पवित्र लोग मन कर संग मीरास मे सहभागी होए। 13 ओहिच हर हमन ला अन्धार कर बश ले छोड़ाए के अपन प्रिय बेटा कर राएज मे प्रवेश करईस, 14 जेमे हमन ला छुटकारा मने कि पाप मन कर छमा मिलथे। यीशु मसीह कर महानता अउ ओकर काम 15 बेटा हर त नी दिखे कर रूप मे परमेश्वर कर प्रतिरूप अउ सबेच सृष्टि मे पहिलौठा है। 16 काबर कि ओहिच मे सबेच चीज मन कर सृष्टि होईस, स्वर्ग कर हो या पृथ्वी कर, देखल या बिन देखल, का सिंहासन, या प्रभुता मन कर प्रधानता, का अधिकारी, सबेच चीज मन हर ओहिच कर द्वारा अउ ओहिच मे सिरजल गए हन। 17 ओहिच हर सबेच चीज मन मे पहिला है, अउ सबेच चीज मन हर ओहिच मे जमे रहथे। 18 ओहिच देह, मने कि कलीसिया कर मूड़ है; ओहिच हर आदि ले है, अउ मरल मन ले जी उठे बाला मन मे पहिलौठा कि सबेच गोएठ मे ओहिच प्रधान ठहरे। 19 काबर कि दाऊ कर प्रसंता एहिच मे है कि ओमे सबेच परिपूरनता बास करही। 20 अउ ओकर क्रूस पर बहल लहू कर द्वारा मेल-मिलाप कईर के, सबेच चीज मन कर ओकरेच द्वारा अपन संग मे मेल कईर लेहे, चाहे ओहर पृथ्वी पर कर हो चाहे स्वर्ग कर। 21 तुमन जे आगू ले हिकले रहा अउ बुरा बुता मन कर कारन मन के बैरी रहा; 22 ओहर अब ओकर शाररिक देह मे मरल मन कर द्वारा तुमन कर भी मेल-मिलाप कईर लेहिस ताकि तुमन ला अपन सन्मुख पवित्र अउ निष्कलंक, अउ निर्दोष बनाए के उपस्थित करही। 23 अगर हमन बिश्वास कर नींव पर मजबूत बने रहब अउ ओ सुसमाचार कर आसरा ला जेला तुमन हर सुने हा झिन छोड़ीहा, जेकर प्रचार अकाश कर खाल्हे सबेच सृष्टि मे करल गईस, अउ जेकर मैहर, पौलुस, सेवक बने। कलीसिया बर मेहनत 24 अब मैहर ओ दुख कर कारन आनन्द करथो, जेला तुमन बर उठाथो अउ मसीह कर क्लेश कर घटी ओकर देह बर, मने कि कलीसिया बर, अपन देह मे पूरा करथो; 25 जेकर ले मैहर परमेश्वर के ओ प्रबन्ध कर अनुसार सेवक बने जेहर तुमन मन बर मोला सौपल गईस, ताकि मैहर परमेश्वर कर बचन ला पुरा-पूरा प्रचार करहू। 26 मने कि ओ भेद ला जेहर समय मन अउ पीढ़ी मन ले लुकाए रहिस, लेकिन अब ओकर ओ पवित्र लोग मन पर परगट होईस आहे। 27 जेमन पर परमेश्वर हर परगट करे बर चाहिस, कि ओमन ला ज्ञात होए कि दूसर जाएत मे ओ भेद कर महिमा कर दाम का है, अउ ओहर ये है, कि मसीह जेहर महिमा कर आसरा है तुमन मे रहथे। 28 जेकर प्रचार कईर के हमन हर एक लोग मन ला चेताए देथन अउ सबेच ज्ञान ले हर एक लोग मन ला सिखाथन, कि हमन हर एक लोग मन ला मसीह मे सिद्ध कईर के उपस्थित करब। 29 अउ एकरे बर मैहर ओके ला ओकर ओ शक्ति कर अनुसार जेहर मोर मे सामर्थ्य कर संग मे प्रभाव डालथे, तन मन लगाए के मेहनत भी करथो। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation