परेरीत 1 - सरगुजिया बाइबिल

प्रस्तावना

¹ हे थियुफिलुस, मैहर आगू कर पुस्तक मे ओ सबेच गोएठ मन कर बिषय मे लिखे जेला यीशु हर शुरू ले करत अउ सिखात रहिस,

² ओ दिन तक ले जब ले यीशु हर ओ प्रेरित मन जेमन मन ला यीशु हर चुने रहिस, पवित्र आत्मा कर द्वारा हुकूम दे के उपर उठाल नी गईस।

³ यीशु हर दुख उठाए कर बाद ढेरेच पक्का सबूत मन ले अपन आप ला ओमन मन के जीवित दिखईस, अउ चालीस दिन तक ले ओमन मन ला दिखाई देहत रहिस, अउ परमेश्वर के राएज कर गोएठ करत रहिस।

पवित्र आत्मा कर वादा

⁴ अउ चेला मन ले भेटाए के ओमन मन ला हुकूम देहिस, “यरूशलेम शहर ला झिन छोड़ीहा, लेकिन दाऊ कर ओ वादा ला पूरा होए कर बाट जोहत रईहा, जेकर चर्चा तुमन मन मोर ले सुईन लेहे हा।

⁵ काबर कि यूहन्ना हर त पानी ले बपतिस्मा देहत रहिस, लेकिन कुछ दिन कर बाद मे तुमन मन पवित्र आत्मा ले बपतिस्मा पईहा।”

⁶ तले ओमन मन जुईट के यीशु ले पूछिन, “हे प्रभु, का तय एहिच समय इस्राएल के राएज ला फेर देबे?”

⁷ यीशु हर ओमन मन ले कहिस, “ओ समय अउ काल मन ला जाने बर, जेला दाऊ हर अपन ही अधिकार मे रखिस है, तुमन मन कर बुता नी है।

⁸ लेकिन जब पवित्र आत्मा तुमन पर आही त तुमन मन सामर्थ्य पईहा; अउ यरूशलेम शहर अउ सबेच यहूदिया परदेस अउ सामरिया नगर मे, अउ जगत कर आखरी तक ले मोर गवाह होईहा।”

यीशु मसीह कर स्वर्गारोहन

⁹ एला कही के यीशु हर ओमन कर देखते देखत स्वर्ग मे उपर उठाए लेहल गईस, अउ बदरी हर ओला ओमन मन कर आएख ले लुकाए लेहिस।

¹⁰ यीशु कर जात समय मे जब ओमन मन अकाश कती ला ताकत रहिन, त देखा, दुई लोग मन उज्जर कपरा पहिनल ओमन मन कर लिघे मे आए ठड़होईन हे।

¹¹ अउ ओमन मन ले कहिस, “हे गलील परदेस कर मैनसे मन, तुमन काबर ठड़होए के अकाश कती ला देखत हा? एहिच यीशु जेहर तुमन जग ले स्वर्ग मे उठाए लेहल गए रहिस, जे नियर तुमन मन ओला स्वर्ग मे जात देखे हवा ओहिच नियर यीशु हर फिर आही।”

सामूहिक प्रार्थना

¹² तब ओमन मन जैतून नाव कर पहार ले जेहर यरूशलेम शहर कर लिघे एक सब्त के दिन कर दुरी मे है, यरूशलेम शहर फिरिन।

¹³ जब हुवा पहुचिन त ओ छत मे गईन, जिहा पतरस, यूहन्ना, याकूब, अन्द्रियास, फिलिप्पुस, थोमा, बरतुल्मै, मत्ती, हलफई कर बेटा याकूब, शमौन जेलोतेस अउ याकूब कर बेटा यहूदा रहत रहिन।

¹⁴ ये सबेच अउ कई झन अउ महिला अउ यीशु कर दाई मरियम अउ ओकर भाई मन कर संग एक चित होए के प्रार्थना मे लगे रहिन।

एक नावा प्रेरित कर चुनाव

¹⁵ अउ ओहिच दिन मन मे पतरस अउ ओकर भाई मन कर मांझा मे जेमन एक सौ बीस मैनसे के लगभग रहिन, ठड़होए के कहे लागिस।

¹⁶ “हे भाई मन, जरूरेच रहिस कि पवित्रशास्त्र कर ओ लेख हर पूरा होए, जेला पवित्र आत्मा हर दाऊद कर मुंह ले यहूदा इस्कारियोती कर बिषय मे, जेहर यीशु ला धरवाए बाला मन कर मुखिया रहिस, आगू ले कहे रहिस।

¹⁷ काबर कि ओहर त हमन मन मे गिनल गईस, अउ ये सेवकाई मे सहभागी होईस।

¹⁸ (ओहर अधर्म कर कमाई ले एक खेत खरीदिस; अउ मूड़ के बल गिरिस, अउ ओकर पेट हर फईट गईस, अउ ओकर सबेच पोटा मन हिकेल गईस।

¹⁹ ये गोएठ ला यरूशलेम शहर कर सबेच रहे बाला मन जाएन गईन, अउ हिया तक कि ओ खेत कर नाव ओमन मन कर भाषा मे ‘हकलदमा’ मने कि ‘लहू कर खेत’ पईड़ गईस)।

²⁰ काबर कि भजन संहिता मे लिखल आहे, ‘ओकर घर उजेड़ जाही, अउ ओमे कोनो झिन बसे’ अउ ‘ओकर पद ला दूसर कोनो ले लेही।’

²¹ एकरे बर जेतेक दिन तक प्रभु यीशु हर हमर संग मे आत-जात रहिस मने कि यूहन्ना कर बपतिस्मा ला ले के ओकर हमर जग ले उठाए जाए तक जे लोग मन बरोबर हमर संग मे रहिन,

²² उचित है कि ओमे ले एक मैनसे हमर संग ओकर जी उठे कर गवाह होए जाए।”

²³ तब ओमन मन दुई झन मन ला खड़ा करिन, एक यूसुफ ला जेहर बरसब्बास कहलात रहिस, जेकर उप नाव यूस्तुस है, दूसर मत्तियाह ला,

²⁴ अउ ये प्रार्थना करिन, “हे प्रभु, तय जे सबेच कर मन ला जानथस, एला परगट कर कि ये दुयोच झन मे ले काके चुने हस,

²⁵ कि ओहर ये सेवकाई अउ प्रेरिताई कर पद ला लेही, जेला यहूदा हर छोएड़ के अपन जगहा रेंग देहिस है।”

²⁶ तब ओमन मन ओकर बर चिठ्ठी डालिन, अउ चिठ्ठी मत्तियाह कर नाव मे हिकलिस, तले ओहर ओ ग्यारह प्रेरित मन कर संग मे गिनल गईस।