3 यूहन्ना 1 - सरगुजिया बाइबिलनमस्कार 1 मुझ प्राचीन कती ले ओ प्रिय गयुस कर नाव, जेकर ले मैहर सच्चा प्रेम रखथो। 2 हे प्रिय, मोर ये प्रार्थना है कि जईसन तय आत्मिक उन्नति करथस, ओहिच कस तय सबेच गोएठ मे उन्नति कर अउ भला चंगा रह। 3 काबर कि जब भाई मन आए के तोर ओ सत्य कर गवाही देहिन, जेमे तय हर सहिच मे रेंगथस, त मैहर ढेरेच ही आनन्दित होए। 4 मोला एकर ले बईढ़ के अउ कोनोच आनन्द नी है कि मैहर सुनो, कि मोर लईका मन सत्य मे रेंगथे। भरल मन ले सरहाना 5 हे प्रिय, जे कुछ तय ओ भाई मन कर संग करथस, जेमन परदेसी है, ओमन ला बिश्वासी कर रूप मे करथस। 6 ओमन मन कलीसिया कर आगू मे तोर प्रेम कर गवाही देहे हो। अगर तय ओमन ला ओ नियर बिदा करबे जे नियर परमेश्वर कर मैनसे मन ला उचित है त बड़िया करबे। 7 काबर कि ओ नाव बर हिकले हन, अउ दूसर जाएत मन ले कुछ नी लेथन। 8 एकरे बर एसन मन कर स्वागत करे बर चाही, जेकर ले हमन भी सत्य कर पक्ष मे ओमन कर सहकर्मी होअब। दियुत्रिफेस अउ दिमेत्रियुस 9 मैहर कलीसिया ला कुछ लिखे रहे, पर दियुत्रिफेस जेहर ओमन मे बड़खा बने बर चाहथे, हमन ला गरहन नी करे। 10 एकरे बर जब मैहर आहू, त ओकर बुता मन कर जेला ओहर करथे, सुधि दिलाहू, कि ओहर हमर बिषय मे बुरा-बुरा गोएठ बकथे; अउ एकर पर भी सन्तोष नी कईर के अपन ही भाई मन ला गरहन नी करे, अउ ओमन ला जेमन गरहन करे बर चाहथे मना करथे अउ कलीसिया ले हिकाएल देथे। 11 हे प्रिय, बुराई बर नही, पर भलाई कर माने बाला होवब। जेहर भलाई करथे, ओहर परमेश्वर कती ले है; पर जेहर बुराई करथे, ओहर परमेश्वर ला नी देखिस हे। 12 दिमेत्रियुस कर बिषय मे सबेच मन हर, बरन सत्य हर भी अपन ये गवाही देहिस: अउ हमन भी गवाही देथन, अउ तय जानथस कि हमर गवाही सहिच है। आखरी नमस्कार 13 मैहर तोला ढेरेच अकुन कुछ लिखे बर त है; पर स्याही अउ कलम ले लिखे बर नी चाहथो। 14 पर मोला आसरा है कि तोर ले जलदिच भेंट करहू: तब हमन आमने-सामने गोठियाबो: 15 तोला शान्ति मिलत रहे। हिया कर संगता मन तोला नमस्कार करथे। हुवा कर संगता मन कर नाव ले ले के नमस्कार कह देबे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation