2 तीमुथियुस 1 - सरगुजिया बाइबिल

नमस्कार

¹ पौलुस कती ले जेहर ओ जीवन के प्रतिज्ञा कर अनुसार जेहर मसीह यीशु मे है, परमेश्वर कर इक्छा ले मसीह यीशु कर प्रेरित है,

² प्रिय बेटा तीमुथियुस कर नाव। परमेश्वर दाऊ अउ हमर प्रभु मसीह यीशु कती ले तुमन ला अनुग्रह अउ दया अउ शान्ति मिलत रहे।

बिश्वास योग्यता बर उत्साहित करई

³ जे परमेश्वर कर सेवा मैहर अपन दाऊ-ददा मन कर रीति पर शुद्ध बिवेक ले करथो, ओकर धन्यवाद होही कि मैहर अपन प्रार्थना मन मे तुमन ला हमेशा याद करथो कि मैहर,

⁴ अउ तोर आसू मन कर सुधि कईर-कईर कर राएत दिन तुमन ले भेंट करे कर लालसा रखथो कि आनन्द ले भईर जाहू।

⁵ मोला तोर ओ निष्कपट बिश्वास कर सुईध आथे, जेहर आगू तुमन कर नानी लोईस अउ तुमन कर दाई युनीके मे रहिस, अउ मोला निश्चिन्त हे कि तुमन मे भी हे।

⁶ एहिच कारन मैहर तुमन ला सुईध दिलाथो, कि परमेश्वर कर ओ बरदान ला जेहर मोर हाथ रखे कर द्वारा तुमन ला मिलिस है जलाए के (प्रज्वलित) कईर दा।

⁷ काबर कि परमेश्वर हर हमन ला भय कर नही पर सामर्थ अउ प्रेम अउ संयम कर आत्मा ला देहिस हे।

सुसमाचार बर लज्जित झिन होईहा

⁸ एकरे बर हमर प्रभु कर गवाह ले, अउ मै जेहर ओकर बर कैद हो, लल्जित नी हो, पर ओ परमेश्वर के सामर्थ कर अनुसार सुसमाचार बर मोर संग मे दुख उठा।

⁹ जेहर हमर उद्धार करिस, अउ पवित्र बुलाहट ले बुलईस, अउ ये हमर बुता कर अनुसार नही; पर ओकर उदेश्य अउ ओ अनुग्रह कर नियर है जेहर मसीह यीशु मे सनातन ले हमर पर होईस है।

¹⁰ पर अब हमर उद्धारकर्ता मसीह यीशु के परगट होए कर द्वारा प्रकाशित होईस, जेहर मृत्यु ला नाएस करिस अउ जीवन अउ अमरता ला ओ सुसमाचार कर द्वारा प्रकाश मान करिस।

¹¹ जेकर बर मैहर प्रचारक, अउ प्रेरित, अउ उपदेशक भी ठहरे।

¹² ये कारन मैहर ये दुख मन ला भी उठात हो, पर नी लजाव, काबर कि मैहर ओला जेकर पर मैहर बिश्वास करे, जानथो; अउ मोला निश्चय है कि ओहर मोर धरोहर कर ओ दिन तक ले रखबली कईर सकथे।

बिश्वास कर प्रति जिम्मेदार

¹³ जे खरा गोएठ तय हर मोर ले सुने हस ओमन ला ओ बिश्वास अउ प्रेम कर संग, जेहर मसीह यीशु मे है अपन नमूना बनाए के रख।

¹⁴ अउ पवित्र आत्मा कर द्वारा जेहर हमन मे बसिस हे, ये बड़िया धरोहर कर रख रखाव करा।

¹⁵ तय जानथस कि एसिया देश बाले मन सबेच झन मोर ले फिर गईन है, जेमन मे फूगिलुस अउ हिरमुगिनेस है।

¹⁶ उनेसिफुरुस कर घराना मन पर प्रभु हर दया करे, काबर कि ओहर ढेरेच तोर मोर जीव ला ठण्डा करिस, अउ मोर जंजीर मन ले नी लजईस।

¹⁷ पर जब ओहर रोम मे अईस, त बड़ेच यत्न ले खोएज के मोर ले भेंट करिस।

¹⁸ (प्रभु करे, कि ओ दिन मे ओकर पर प्रभु कर दया होए)। अउ जे-जे सेवा ओहर इफिसुस नगर मे करिस है ओमन मन ला भी बड़िएच जानथस।