2 थिस्सलुनी 1 - सरगुजिया बाइबिलआशीर्वाद 1 पौलुस अउ सिलवानुस अउ तीमुथियुस कती ले थिस्सलुनीकियों मन कर कलीसिया कर नाव, जेमन हमर दाऊ परमेश्वर अउ प्रभु यीशु मसीह मे है: 2 हमर दाऊ परमेश्वर अउ प्रभु यीशु मसीह कती ले तुमन ला अनुग्रह अउ शान्ति मिलत रहे। न्याय कर दिन 3 हे भाई मन, तुमन कर बिश्वास हमन मन हर समय परमेश्वर कर धन्यवाद करे बर चाही, अउ ये उचित भी है, एकरे बर कि तुमन मन कर बिश्वास ढेरेच बड़हत जात है, अउ तुमन सबेच कर प्रेम अपनेच मे अउ भी ढेरेच बड़हत जात है। 4 हिया तक कि हमन अपन परमेश्वर कर कलीसिया मे तुमन मन कर बिषय मे घमण्ड करथन, कि जेतेक उपद्रव अउ क्लेश तुमन मन सहथा, ओ सबेच मे तुमन मन कर धीरज अउ बिश्वास परगट होथे। 5 एहर परमेश्वर कर सच्चा न्याय कर स्पष्ट प्रमान है; कि तुमन परमेश्वर कर राएज कर लाएक ठहरा, जेकर बर तुमन मन दुख भी उठाथा। 6 काबर कि परमेश्वर कर लिघे ये न्याय है, कि जेमन तुमन मन ला क्लेश देथे, ओमन ला बदला मे क्लेश दे। 7 अउ तुमन ला, जेमन क्लेश पाथा, हमर संग मे चैन देहे; ओ समय जब कि प्रभु यीशु अपन सामर्थी स्वर्गदूत मन कर संग, धधकत आगी मे स्वर्ग ले परगट होही। 8 अउ जेमन मन परमेश्वर ला नी पहिचाने अउ हमर प्रभु यीशु मसीह कर सुसमाचार ला नी माने ओमन ले बदला लेही। 9 ओमन मन प्रभु कर आगू ले, अउ ओकर शक्ति कर एश्वर्य ले दुरिहा होए के अनन्त बिनाश कर दण्ड पाही। 10 एहर ओ दिन मे होही, जब ओहर अपन पवित्र लोग मन मे महिमा पाए अउ सबेच बिश्वास करे बाला मन मे आश्चर्य कर कारन होए बर आही; काबर कि तुमन हर हमर गवाही पर बिश्वास करा। 11 एकरे बर हमन हमेसेच तुमन बर प्रार्थना भी करथन, कि हमर परमेश्वर तुमन ला बुलाहट कर लाएक समझे, अउ भलाई हर एक इक्छा, अउ बिश्वास कर एक बुता ला सामर्थ्य कर संग मे पूरा करही, 12 ताकि हमर परमेश्वर अउ प्रभु यीशु मसीह कर अनुग्रह कर अनुसार हमर प्रभु यीशु कर नाव तुमन मे महिमा पाए, अउ तुमन मन ओमे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation