2 पतरस 1 - सरगुजिया बाइबिलनमस्कार 1 शमौन पतरस कती ले, जेहर यीशु मसीह कर कमिया अउ प्रेरित है, ओ लोग मन कर नाव जेमन मन हमर परमेश्वर अउ उद्धारकर्ता यीशु मसीह कर धार्मिकता कर द्वारा हमर नियर बहुमूल्य बिश्वास हासिल करिन है। 2 परमेश्वर कर अउ हमर प्रभु यीशु मसीह कर पहिचान कर द्वारा अनुग्रह अउ शान्ति तुमन मे बहुतायत ले बड़हत जाए। बिश्वास मे बड़हा 3 काबर कि ओकर ईश्वर सामर्थ्य ला सबेच कुछ जे जीवन अउ भक्ति ले सम्बन्ध रखथे, हमन ला ओकरे पहिचान कर द्वारा देहिस है, जेहर हमन मन ला अपन ही महिमा अउ सदगुन कर अनुसार बुलईस है। 4 जेमन कर द्वारा ओहर हमन मन ला बहुमूल्य अउ ढेरेच बड़खा प्रतिज्ञा देहिस है; ताकि एकर द्वारा तुमन मन ओ सड़ाहट ले छुईट के, जेहर संसार मे बुरा अभिलाषा मन ले होथे, ईश्वर स्वभाव कर सहभागी होए जावा। 5 एहिच कारन तुमन मन सबेच नियर कर यत्न कईर के, अपन बिश्वास पर सदगुन, अउ सदगुन पर समझ, 6 अउ समझ पर संयम, अउ संयम पर धीरज, अउ धीरज पर भक्ति। 7 अउ भक्ति पर भाई चारा कर प्रीति अउ भाई चारा कर प्रीति पर प्रेम बड़हात जावा। 8 काबर कि ये गोएठ हर तुमन मे बर्तमान रही अउ बड़हत जाही, त तुमन ला प्रभु यीशु मसीह कर पहिचान मे निकम्मा अउ निष्फल नी होए देही। 9 काबर कि जेमे ये गोएठ नही, ओहर अन्धवा है अउ धुन्धला देखथे, अउ अपन पाछू कर पाप मन ला धोवाए के शुद्ध होए कर भुलाए बईठिस है। 10 ये कारन हे भाई मन, अपन बुलाल जाए, अउ चुईन लेहल जाए बर सिद्ध करे कर भली भाति यत्न करत जावा, काबर कि अगर एसन करिहा, त कभो भी ठोकर नी खईहा; 11 बरन ये रीति ले तुमन हमर प्रभु अउ उद्धारकर्ता यीशु मसीह कर अनन्त राएज मे बड़खा आदर कर संग मे घुसे पईहा। पतरस कर आखरी समय 12 एकरे बर अगर तुमन ये गोएठ मन ला जानथा, अउ जे सत्य बचन ला तुमन ला मिलिस आहे, ओमे बने रहथा, तबो ले मैहर तुमन ला ये गोएठ मन ला याद दिलाए बर हमेसेच तियार रहू। 13 मैहर अपन बर उचित समझत आहो कि जब तक मैहर जीवित हो, तब तक ले तुमन ला याद दिलाए-दिलाए के उभारत रहू। 14 काबर कि ये जानथो, मोर मरे कर समय जलदिच आए बाला है, जईसन कि हमर प्रभु यीशु मसीह हर मोर पर परगट करिस हे। 15 एकरे बर मैहर एसन यत्न करहू, कि मोर जाए कर बाद भी तुमन मन ये सबेच गोएठ मन ला हमेसेच बर याद कईर सकिहा। यीशु मसीह के महिमा कर दर्शन 16 काबर कि जब हमन मन तुमन ला अपन प्रभु यीशु मसीह के सामर्थ्य कर, अउ आए कर सुसमाचार देहे रहिस, त ओहर चतुराई ले गड़ल कहानी मन ला अनुसरन नी करे रहिन बरन हमन हर अपन ही ओकर प्रताप ला देखे रहेन। 17 काबर कि जब ओहर परमेश्वर दाऊ ले आदर, अउ महिमा पईस अउ ओ प्रतापमय महिमा ले ये गोएठ अईस, “एहर मोर प्रिय बेटा है, जेकर ले मैहर खुश हो।” 18 तब हमन ओकर संग मे पवित्र पहार पर रहेन, अउ स्वर्ग ले एहिच गोएठ ला आत सुनेन। 19 हमर जग जे अगमजानी मन कर बचन है, ओहर ये घटना ले मजबूत ठहरिस। तुमन ये बड़िया करथा, जेहर ये समेझ के ओकर पर ध्यान करथा, कि ओहर एक दीया है, जेहर अन्धार जगहा मे ओ समय तक प्रकाश देथे, जब तक ले कि पौ नी फटही, अउ भोर कर तरई तुमन मन कर हृदय मन मे नी चमेक उठही। 20 पर आगू ये जाएन ला कि पवित्रशास्त्र कर कोनो भी भविष्यद्ववानी कोनो अपन कर बिचार-धारा कर अधार पर पूरा नी होथे, 21 काबर कि कोनो भी भविष्यद्ववानी लोग मन कर इक्छा ले कभो नी होईस, पर भक्त जन पवित्र आत्मा कर द्वारा उभारे जाए के परमेश्वर कती ले बोलथे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation