2 यूहन्ना 1 - सरगुजिया बाइबिलप्राचीन मन कती ले चुनल मन ला नमस्कार 1 मुझ प्राचीन कती ले ओ चुनल महिला अउ ओकर लईका मन कर नाव, जेमन ले मैहर सच्चा प्रेम रखथो, अउ केबल मैहर ही नही, बरन ओ सबेच भी प्रेम रखथे, जेमन सत्य ला जानथे। 2 ओ सत्य जेमन हर हमन मे स्थिर रहथे, अउ हमेसेच बर हमर संग अटल रही; 3 परमेश्वर दाऊ, अउ दाऊ कर बेटा यीशु मसीह कती ले अनुग्रह, अउ दया, अउ शान्ति, सत्य अउ प्रेम सहित हमर संग मे रही। मसीह कर हुकूम मे चलई 4 मैहर ढेरेच आनन्दित होए कि मैहर हर तोर कुछ लईका मन ला ओ हुकूम कर अनुसार, जेला हमन ला दाऊ कती ले मिले रहिस, सत्य पर रेंगत पाएन। 5 अब हे महिला, मैहर तोला कोनो नावा हुकूम नही, पर ओहिच जेला शुरू ले हमर लिघे है, लिखथो; अउ तोर ले बिनती करथो, कि हमन एक दूसर ले प्रेम रखी। 6 अउ प्रेम ये है कि हमन ओकर हुकूम कर अनुसार चली: ये ओहिच हुकूम है, जेला तुमन मन शुरू ले सुने रहा, अउ तुमन ला एमे चले बर भी चाही। मसीह कर बिरोधी मन कर धोखा ले चवकन्ना 7 काबर कि ढेरेच झन एसन भरमाए बाला जगत मे हिकेल के अईन हे, जेमन मन एला नी माने कि यीशु मसीह हर देह मे होए के अईस है; भरमाए बाला अउ मसीह कर बिरोधी एहिच मन है। 8 अपन बिषय मे चवकस रहा; कि जे मेहनत ला हमन मन करे हन, ओला तुमन गवाए झिन दा, बरन ओकर पूरा प्रतिफर ला पावा। 9 जे कोनो हर मसीह कर शिक्षा ले आगू बईढ़ जाथे, अउ ओमे बने रहे बर नी रहे, ओकर लिघे परमेश्वर नी है। जे कोनो ओकर शिक्षा मे स्थिर रहथे, ओकर लिघे दाऊ भी है, अउ बेटा भी है। 10 अगर कोनो हर तुमन कर लिघे आही, अउ एहिच शिक्षा ला नी देही, ओला न त घर मे आए दा अउ न नमस्कार करा। 11 काबर कि जे कोनो हर एसन जन ला नमस्कार करथे, ओहर ओकर बुरा बुता मन मे भी साझी होथे। आखरी नमस्कार 12 मोला ढेरेच अकुन गोएठ मन ला लिखे बर हे, पर कागज अउ स्याही ले लिखे बर नी चाहथो; पर आसरा है, कि मैहर तुमन कर लिघे आहू, अउ आमने-सामने गोठियाहू: जेकर कारन तुमन कर आनन्द पूरा होए जाए। 13 तोर चुनल बहिन कर लईका मन ला तोला नमस्कार कहथे। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation