2 कुरिन्थी 1 - सरगुजिया बाइबिलस्वागत 1 पौलुस कती ले जेहर परमेश्वर कर इक्छा ले मसीह यीशु कर प्रेरित है, अउ भाई तीमुथियुस कती ले परमेश्वर कर ओ कलीसिया कर नाव, जेहर कुरिन्थुस नगर मे है, अउ सबेच अखाया परदेस कर सबेच पवित्र मैनसे मन कर नाव मे: 2 हमर दाऊ परमेश्वर अउ प्रभु यीशु मसीह कती ले तुमन मन ला अनुग्रह अउ शान्ति मिलत रहे। शान्ति कर परमेश्वर 3 हमर प्रभु यीशु मसीह कर परमेश्वर, अउ दाऊ कर धन्यवाद होए, जेहर दया कर दाऊ अउ सबेच जाएत मन के शान्ति कर परमेश्वर है। 4 ओहर हमर सबेच क्लेश मन मे शान्ति देथे; ताकि हमन मन ओ शान्ति कर कारन जेला परमेश्वर हर हमन मन ला देथे, ओमन मन ला भी शान्ति देहे सकही, जेमन कोनो नियर कर क्लेश मे होही। 5 काबर कि जईसन मसीह कर दुख मन मे हमन मन ढेरेच सहभागी होथी, ओहिच कस हमन मन शान्ति मे भी मसीह कर द्वारा ढेरेच सहभागी होथन। 6 अगर हमन मन क्लेश पातेन, त ये तुमन मन कर शान्ति अउ उद्धार बर है; अउ अगर शान्ति पातेन, त ये तुमन मन कर शान्ति बर है; जेकर प्रभाव ले तय धीरज कर संग ओ क्लेश मन ला भी सह लेथा, जेला हमन मन हर भी सहथी। 7 हमर आशा तुमन मन कर बिषय मे मजबूत है; काबर कि हमन मन जानथन कि तुमन मन जईसन हमर दुख मे, ओहिच कस शान्ति मे भी सहभागी हवा। दुख ले बचईस 8 हे भाई मन, हमन मन नी चाहथन कि तुमन मन हमर ओ क्लेश ले अनजान रहा, जेहर एसिया देश मे हमर पर पड़िस; हमन मन एसन भारी बोझ ले दईब गए रहेन, जेहर हमर सामर्थ्य ले बाहर रहिस, हिया तक कि हमन मन जीवन ले भी हाथ धोए बईठे रहेन। 9 बरन हमन मन अपन मन मे समेझ लेहे रहेन कि हमन मन पर मृत्यु कर सजा होए गिस है, ताकि हमन मन भरोसा झिन रखी बरन परमेश्वर कर जेहर मरल मन ला जीलाथे। 10 ओहिच हर हमन मन ला मृत्यु कर एसन बड़खा संकट ले बचईस, अउ बचाही; अउ ओकर पर हमर आशा है कि ओहर आगू कती भी बचात रही। 11 तुमन मन भी मिल के प्रार्थना कर द्वारा हमर सहायता करिहा कि जे बरदान ढेरेच झन कर द्वारा हमन मन ला मिलिस आहे, ओकर कारन ढेरेच मैनसे मन हमर कती ले धन्यवाद करे। साफ बिवेक 12 काबर कि हमन मन अपन बिवेक कर ये गवाही पर घमण्ड करथन, कि जगत मे अउ बिशेष कईर के तुमन मन कर मांझा मे हमर चरित्र परमेश्वर कर लाएक एसन पवित्रता अउ सच्चाई सहित रहिस, जेहर देह कर ज्ञान ले नही लेकिन परमेश्वर कर अनुग्रह कर संग मे रहिस। 13 हमन मन तोला अउ कुछ नी लिखथन, केबल ओ जेला तय हर पड़हत अउ मानत भी हस, अउ मोला आशा है कि आखरी तक ले भी मानत रहबे। 14 जईसन तुमन मन ले केतेक झन मन माएन लेहिन है कि हमन तुमन मन के घमण्ड कर कारन हन, ओहिच कस तुमन मन भी प्रभु यीशु कर दिन हमर बर घमण्ड कर कारन ठहरिहा। सफर मे बदलाव 15 एहिच भरोसा ले मैहर चाहत रहे कि आगू तुमन मन कर लिघे अउ कि तुमन मन ला एक अउ दान मिलही। 16 अउ तुमन मन कर लिघे ले होए के मकिदुनिया ला जाहू, अउ फिर मकिदुनिया ले तुमन मन कर लिघे आहू; अउ तुमन मन मोला यहूदिया परदेस कती के कुछ दुरिहा तक ले पहुचाए देईहा। 17 एकरे बर मैहर ये इक्छा करे रहे त का मैहर चंचलता दिखाए? या जेला करे बर चाहथो का देह के अनुसार करो कि मैहर गोएठ मे “हा, हा” भी करो अउ “नही, नही” भी करो? 18 परमेश्वर हर सच्चा गवाह है कि हमर ओ बचन मे जेला तुमन मन ले कहे हन “हा” अउ “नही” दोनो मन नी पाल जाथे। 19 काबर कि परमेश्वर कर बेटा यीशु मसीह जेकर द्वारा मने कि मोर अउ सिलवानुस अउ तीमुथियुस कर द्वारा तुमन मन कर मांझा मे प्रचार होईस, ओमे “हा” अउ “नही” दोनोच हर नी रहिस, लेकिन ओमे “हा” ही “हा” होईस। 20 काबर कि परमेश्वर कर जेतेक भी प्रतिज्ञा है, ओमन मन सबेच हर ओहिच मे “हा” कर संग मे है। एकरे बर ओकर द्वारा आमीन भी होईस कि हमर द्वारा परमेश्वर कर महिमा होए। 21 अउ हमन मन ला तुमन मन कर संग मसीह मे मजबूत करथे, अउ जेहर हमर अभिषेक करिस ओहिच हर परमेश्वर है, 22 जेहर हमर पर छाप भी कईर देहिस है अउ बयाना मे आत्मा ला हमर मन मे देहिस। 23 मैहर परमेश्वर ला गवाह कईर के कहथो कि मैहर अब तक ले कुरिन्थुस नगर मे एकरे बर नी आए, कि मोला तुमन मन पर तरस आथे। 24 ये नही कि हमन मन बिश्वास कर बिषय मे तुमन मन पर प्रभुता जताए बर चाहथी; लेकिन तुमन मन कर आनन्द मे सहायक है, काबर कि तय बिश्वास ही ले जमे रहथा। |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation