1 कुरिन्थी 1 - सरगुजिया बाइबिलनमस्कार 1 पौलुस कती ले जेहर परमेश्वर कर इक्छा ले यीशु मसीह कर प्रेरित होए बर बुलाल गिस है, अउ भाई सोस्थिनेस कती ले। 2 परमेश्वर कर ओ कलीसिया कर नाव जेहर कुरिन्थुस नगर मे है, मने कि ओमन मन कर नाव मे जेमन मसीह यीशु मे पवित्र करल गईन है, अउ पवित्र होए बर बुलाल गईन है; अउ ओ सबेच कर नाव भी जेहर सबेच जगहा हमर अउ अपन प्रभु यीशु मसीह कर नाव ले प्रार्थना करथे। 3 हमर दाऊ परमेश्वर अउ प्रभु यीशु मसीह कती ले तुमन मन ला अनुग्रह अउ शान्ति मिलत रहे। पौलुस कर परमेश्वर ला धन्यवाद 4 मैहर तुमन मन कर बिषय मे अपन परमेश्वर कर धन्यवाद हमेसेच करथो, एकरे बर कि परमेश्वर कर ये अनुग्रह तुमन मन पर मसीह यीशु मे होईस है। 5 कि ओमे होए के तुमन मन हर गोएठ मे, मने कि सबेच बचन अउ सबेच ज्ञान मे धनी करल गए हन। 6 कि मसीह कर गवाही तुमन मन मे पक्का हिकले। 7 हिया तक कि कोनो बरदान मे तुमन मन ला घटी झिन होए, अउ तुमन मन हमर प्रभु यीशु मसीह कर परगट होए कर बाट जोहत रहथा। 8 ओहर तुमन मन ला आखरी तक ले मजबूत भी करही कि तुमन मन हमर प्रभु यीशु मसीह कर दिन मे निर्दोष ठहरिहा। 9 परमेश्वर हर सच्चा है, जेहर तुमन मन ला अपन बेटा हमर प्रभु यीशु मसीह कर संगति मे बुलईस आहे। कुरिन्थुस कर कलीसिया मे बिभाजन 10 हे भाई मन, मैहर तुमन मन ले हमर प्रभु यीशु मसीह कर नाव मे बिनती करथो कि तुमन मन सबेच झन एक ही गोएठ कहा अउ तुमन मन मे फुट झिन होए, लेकिन एक ही मन अउ एक ही मत मे होए के मिले रहा। 11 काबर कि हे मोर भाई मन, खलोए कर घराना मन कर मैनसे मन हर मोला तुमन मन कर बिषय मे बतईन है, कि तुमन मन मे झगरा होथे। 12 मोर कहे कर मतलब ये है, कि तुमन मन मे कोनो त अपन ला “पौलुस कर,” कोनो हर “अपुल्लोस कर,” कोनो हर “कैफा कर,” त कोनो “मसीह कर” कहथे। 13 का मसीह हर बईट गईस है? का पौलुस हर तुमन मन बर क्रूस मे चड़हाल गईस या तुमन मन ला पौलुस कर नाव मे बपतिस्मा मिलिस आहे? 14 मैहर परमेश्वर कर धन्यवाद करथो, कि क्रिस्पुस अउ गयुस ला छोएड़, मैहर तुमन मन मे ले कोनोच ला भी बपतिस्मा नी देहे हो। 15 कहो एसन झिन होए, कि कोनो कही, कि तुमन मन ला मोर नाव मे बपतिस्मा मिलिस। 16 अउ मैहर स्तिफनास कर घराना ला भी बपतिस्मा देहे हो; एमन ला छोएड़, मैहर नी जानथो कि मैहर अउ कोनो ला बपतिस्मा देहे हो। 17 काबर कि मसीह हर मोला बपतिस्मा देहे बर नही, बरन सुसमाचार सुनाए बर भेजिस आहे, अउ एला भी शब्द मन के ज्ञान कर अनुसार नही, एसन झिन होए कि मसीह कर क्रूस हर ब्यर्थ ठहरही। मसीह कर शक्ति अउ परमेश्वर कर ज्ञान 18 काबर कि क्रूस कर कथा नाश होए बाला मन बर मूर्खता है, लेकिन हम उद्धार पाए बाला मन बर परमेश्वर कर सामर्थ्य है। 19 काबर कि लिखल आहे, “मैहर ज्ञान-बान मन कर ज्ञान ला नाश करहू, अउ समझदार मन कर समझ ला तुच्छ कईर देहू।” 20 कहा रहिन ज्ञान-बान मन? कहा रहिन शास्त्री मन? कहा रहिन ये संसार कर बिवादी मन? का परमेश्वर हर संसार कर ज्ञान ला मूर्खता नी ठहरईसे? 21 काबर कि जब परमेश्वर के ज्ञान कर अनुसार संसार हर ज्ञान ले परमेश्वर ला नी जानिस, त परमेश्वर ला ये बड़िया लागिस कि ये प्रचार कर मूर्खता कर द्वारा बिश्वास करे बाला मन ला उद्धार देहे। 22 यहूदी मन त चिन्हा चाहथे, अउ यूनानी मन ज्ञान कर खोज मे है; 23 लेकिन हमन मन त ओ क्रूस पर चड़हाल मसीह कर प्रचार करथन, जेहर यहूदी मन बर ठोकर कर कारन अउ दूसर जाएत मन बर मूर्खता है; 24 लेकिन जेमन मन बुलाल गईन है, का यहूदी का यूनानी, ओमन मन कर लिघे मसीह परमेश्वर कर सामर्थ्य अउ परमेश्वर कर ज्ञान है। 25 काबर कि परमेश्वर कर मूर्खता मैनसे मन कर ज्ञान ले ज्ञानवान है, अउ परमेश्वर कर कमजोर मैनसे मन कर बल ले ढेरेच बलवान है। केबल प्रभु मे घमण्ड 26 हे भाई मन, अपन बुलाए जाल ला त सोचा कि न देह कर अनुसार ढेरेच ज्ञानवान, अउ न ढेरेच सामर्थी, अउ न ढेरेच कुलीन बुलाल गए हन। 27 लेकिन परमेश्वर हर जगत कर मूर्ख मन ला चुईन लेहिस कि ज्ञानवान मन ला लज्जित करी अउ परमेश्वर हर जगत कर कमजोर मन ला चुईन लेहिस कि बलवान मन ला लज्जित करही; 28 अउ परमेश्वर हर जगत कर नीच अउ तुच्छ मन ला, बरन जेमन मन कुछ है भी नही ओमन मन ला भी चुईन लेहिस कि ओमन जेमन है, ब्यर्थ ठहराही। 29 तले कोनो प्रानी मन परमेश्वर कर आगू मे घमण्ड झिन करे पाए। 30 लेकिन ओहिच कती ले तुमन मन भी मसीह यीशु मे हा, जेहर परमेश्वर कती ले हमर बर ज्ञान ठहरिस, मने कि धर्म, अउ पवित्रता, अउ छुटकारा; 31 ताकि जईसन लिखल आहे, ओहिच कस होही, “जे घमण्ड करे ओहर प्रभु मे घमण्ड करे।” |
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.
Beyond Translation