तीतुस 1 - Surgujia Bible

परेरीत पौलुस कर जोहार

¹ मंए परेरीत पौलुस, जेहर परमेस्वर कर गुलाम सेवक अऊ ईसू मसीह कर परेरीत लागों। परमेस्वर कर चुनल मन कर बिस्वास ला बड़हाए बर अऊ ओमन सत ला चिनके, परमेस्वर ला फुरमा करोईया जिनगी जीए कर बारे में सिखाए बर भेजल गए हों।

² ए सत हर हमके ला अमर जिनगी पाए कर पकका बिस्वास देथे। ए अमर जिनगी कर बात-जबान परमेस्वर, जेहर झूठ नई बोले ओहर संसार ला बनाए कर आगू ले करीस हे।

³ अब परमेस्वर अपन निचट घनी में ए खभेर ला परचार कर जरिये परगट करीस। ए परचार कर जिमेदारी हमर उद्धार करोईया, परमेस्वर कर अगींया ले मोके सोंपल गईस हे।

⁴ ए तीतुस, तोर बरीक मंए ए चिट्ठी ला लिखत हों, तंए फूरोंच में मोर बेटा कस हवस, काबरकि हमरे दुनो झे ईसू मसीह में बिस्वास करथी। परमेस्वर दाऊ अऊ हमर उद्धार करोईया ईसू मसीह कती ले, तोके किरपा अऊ सांती मिलत रहे।

कलीसिया कर अगुवा मन कर चाल-सहूर

⁵ मंए तोके करेते नांव कर टापू में एकर बर छोंएड़ राखे रहें कि तंए बांचल काम ला बढ़िहां ले सूधाएर दे अऊ मोर अगींया कर अनुसार नगर-नगर में कलीसिया कर अगुवा मन ला ठहराए देबे।

⁶ अगुवा हर निरदोस अऊ ओकर एकेच ठन परानी रहे अऊ ओकर लईका-छउआ मन परभू में बिस्वासी रहें अऊ कोनो ओमन ला एकस झईन कहें कि एमन लूचा-लफंगा अऊ अगींया नई मनोईया हवें।

⁷ काबरकि कलीसिया कर अगुवा ला परमेस्वर कर काम कर जिमेदारी रथे, एकर चलते ओला निरदोस होए बर चाही। ओहर जिदहा, गुसा करोईया, मतवार, मार-पीट करोईया अऊ नीच कमाई कर लोभीया झईन रहे।

⁸ बकिन ओहर पहुना मन कर सेवा करोईया, भलाई ले मया करोईया अऊ माढ़ल जीव कर मईनसे रहे। ओहर नियाओ करोईया, परभू कर भगत अऊ अपन जीव जांगर ला अपन बस में करोईया रहे।

⁹ अऊ ओहर सिखावल बिस्वास लाएक उपदेस में माढ़े रहे, तेमेकि ओहर दूसर झेमन ला सही सिक्छा दे सके, अऊ बिरोधी मन कर मूंह ला चुपवाए बर सएक जाए।

¹⁰ काबरकि ढेरे झेमन अगींया नई मनोईया, बतबनवा अऊ ठगलबरा हवें, खास कएर के जेमन यहूदी जाति मन ले हवें।

¹¹ अईसना मन कर मूंह ला चुपवाए बर परही, काबरकि एमन नीच कमाई करे बरीक सिखाथें अऊ घर परिवार ला भटकाए देथें।

¹² करेते टापू कर मईनसे मन कर एगोट अगमजानीयो हर कहीस हवे, “करेते कर रहोईया मन हमेसा ठगलबरा, दुस्ट पसू अऊ कोड़िहा-पेटहा होथें।”

¹³ ओकर ए गवाही हर सच हवे, तेकर ले तंए ओमन के जनावत ले चेताए देबे, तेमेकि ओमन बिस्वास में बजर होए जाएं।

¹⁴ यहूदी मन कर कहनी-किसा अऊ ओ मईनसे मन कर अगींया में धियान झईन देबे, जेमन सत ले भटेक गईन हवें।

¹⁵ जे मईनसे मन कर जिनगी हर परमेस्वर कर देख में सुद्ध हवे, ओमन बर सबेच जाएत हर सुद्ध हवे, बकिन जेमन बेकार हवें अऊ परमेस्वर कर उपरे बिस्वास नई करें, ओमन बर कांही जाएत हर सुद्ध नईए, बकिन ओमन कर बुद्धी अऊ समझ दुनो हर बेकार हवे।

¹⁶ ओमन कथें कि हमन परमेस्वर ला जानथन, बकिन अपन काम मन ले ओकर इनकार करथें। परमेस्वर कर देख में ओमन घिनहा हवें अऊ ओकर अगींया नई मनोईया मईनसे हवें, एकरले ओमन कोनो बढ़िहां काम करे कर लाएक नईए।