फिलिप्पी 3 - Surgujia Bible

गलत काम करोईया मन ले सवाचेती रईहा

¹ तेकर ले ए मोर भाई-बहिन मन, परभू में खुस रहा, तुमन के ओहीच बात ला बार-बार लिखे में, मोके तो कोनो दुख नई होए अऊ एमे तुमन कर भलाई हवे।

² ओ कुकूर मन ले सवाचेती रईहा, एमन तो गलत काम करोईया अऊ झूठा खतना करोईया मन लागें।

³ काबरकि सही खतनादार तो हमरे लागी, जेमन परमेस्वर कर अराधना पबितर आत्मा कर द्वारा करथी अऊ मसीह ईसू कर ऊपरे घमंड करथी अऊ देंह कर काम उपरे भरोसा नई करी।

⁴ बकिन मंए तो देहों कर ऊपरे भरोसा कएर सकथों, अगर कोनो अऊ झन ला देंह कर उपरे भरोसा करे कर बिचार हवे, त मंए ओकरोच ले बएड़ के भरोसा कएर सकथों।

⁵ जनम कर बाद आठ दिन में मोर खतना होईस, इसराएल कर बंस अऊ बिनयामीन कर गोती कर लागों, मंए इबरानी दाई-दाऊ मन ले जनमल एगोट इबरानी लागों, मूसा कर कानहूंन कर अनुसार जीवईया एगोट फरीसी लागों।

⁶ अगर परमेस्वर बर उतसाह करे कर बारे में कईहा, त कलीसिया कर सतोईया रहें अऊ मूसा कर कानहूंन कर धरमीपन कर बारे में कईहा, त मंए निरदोस रहें।

⁷ बकिन जे-जे बात हर मोर फयदा कर रहीस, ओही मन ला अब मंए मसीह कर चलते हानी समेझ लेहे हों।

⁸ एकरोच ले बईड़ के, मंए अपन परभू ईसू मसीह कर गियान कर बात ला सबले सुघर जाएन के, सब बात मन ला बेकार जानथों। ओकर चलते मंए सब जाएत ला छोंड़ देहें अऊ ओमन ला कचरा समझथों, तेमेकि मसीह ला पाए सकों।

⁹ अऊ मंए मसीह कर संगे एक होए जाओं, एहर मोर खुद कर धरमीपन ले नहीं, जेहर मूसा कर कानहूंन कर पालन करे ले आथे, बलकि ओ धरमीपन ले जेहर मसीह ईसू में बिस्वास करे ले भेंटाथे, मनेकि परमेस्वर ला फुरमा करे बर सिरीप मसीह कर ऊपर बिस्वास करे बर हवे।

¹⁰ मंए मसीह ला अऊ ओकर ओ सक्ति ला जाने बर चाहथों, जेकर चलते ओहर जी उठे रहीस, मंए ओकर दुखोच में भागी होए बर चाहथों अऊ ओकर सहींक बने बर चाहथों, जेला ओहर अपन मरे कर चलते पाए रहीस।

¹¹ तेमेकि कईसनोच कएर के मंहू मरल में ले जी उठों।

निसाना कती कूदे बर हवे

¹² मंए ए नई कहों कि सब जाएत ला पहिले पाए चुके हवों, आखिर सिद्ध होए गए हवों; बकिन ओ इनाम ला पाए बर आगू बढ़त हों, जेकर बर मसीह ईसू हर मोके अपन बनाए लेहीस हवे।

¹³ ए भाई मन मंए ए नई सोंचो कि ओला पाए दारे हों, बकिन एक काम करथों, पाछू कर बात मन ला बिसेर के आगू कर चीज मन ला पाए बर बढ़त जाथों।

¹⁴ निसाना कती मंए कुदत चएल जाथों, तेमेकि सरग कर इनाम ला पाओं, जेकर बर परमेस्वर हर मोके मसीह ईसू में बलाईस हवे।

¹⁵ हमर में ले जेतना झेमन सिद्ध हवन, ए बिचार करा अऊ अगर ककरो बात में तुमन कर आने बिचार हवे, त परमेस्वर ओहूच ला तुमन के बढ़िहां ले समझाए देही।

¹⁶ एकरले जेतना सिक्छा हमरे पाए हवन, ओकरे अनुसार जिनगी जीयत रही।

¹⁷ ए भाई मन, तुमन सब झे मिल के मोर कस चाल चला। जे नमूना हमरे तुमन कर आगू में राखे हन, ओकर अनुसार जेमन जीयत हवें, ओमन कर ऊपरे धियान देआ।

¹⁸ काबरकि ढेरे झेमन एकस चाल चलथें, जेमन कर चरचा मंए तुमन जग कईयो दाएर करे हवों अऊ अझरो ले रोए-रोए के तुमन के कहथों कि ओमन अपन चाल-सहूर ले, मसीह कर कुरूस कर बैरी हवें।

¹⁹ ओमन कर आखरी बिनास हवे, ओमन कर ईसवर ओमन कर पेट हवे, ओमन अपन लाज कर गोएठ में घमंड करथें अऊ धरती कर चीज में मन लगाए रथें।

²⁰ बकिन हमर देस तो सरग में हवे, उहां ले हमर अपन उद्धार करोईया परभू ईसू मसीह कर, आए कर डगर ला देखत हवन।

²¹ ओहर अपन सामर्थ कर द्वारा सबो जाएत ला अपन अधीन कएर सकथे, एही सामर्थ ले ओहर हमर नासवान देंह ला बदेल के, अपन महिमामय देंह कस बनाए देही।