फिलेमोन 1 - Surgujia Bible

¹ मसीह ईसू कर कएदी पौलुस अऊ हमर भाई तीमुथियुस कती ले, हमर मयारू भाई अऊ संगे सेवा करोईया फिलेमोन, तोके हमरे ए चिट्ठी लिखत हन।

² तोर अलावा ए चिट्ठी हर बहिन अफफिया अऊ हमर संगे मसीह कर सेवा में लड़ोईया अरखिपुस अऊ तोर घर कर कलीसिया बर हवे।

³ हमर दाऊ परमेस्वर अऊ परभू ईसू मसीह कती ले तुमन के किरपा अऊ सांती मिलत रहे।

पौलुस फिलेमोन बर परमेस्वर कर धनबाद करथे

⁴ ए मोर भाई फिलेमोन, जब मंए अपन पराथना में तोर सुरता करथों, तब हमेसा परमेस्वर कर धनबाद करथों,

⁵ काबरकि परभू ईसू कर ऊपरे तोर बिस्वास अऊ सबेच बिस्वासी मन जग, तोर मया कर बारे में सुनत रथों।

⁶ मोर पराथना ए हवे कि बिस्वासी कर रूप में तोर संगे हमर संगती कर चलते, हमरे ओ आसीस कर बारे में गहराई ले समझबो, जेहर हमके मसीह कर संगे एकता में जीवन बिताए ले मिलथे।

⁷ ए भाई, तंए परमेस्वर कर मईनसे मन कर चोला ला हरियर कएर देहे हवस। तेकर ले मोके तोर मया ले ढेरेच आनंद अऊ उत्साह मिलीस हवे।

उनेसिमुस बरीक पौलुस कर बिनती

⁸ तेकर ले मंए मसीह भाई होए कर चलते, हिमेत कर संगे तोके अगियां दे सकत हों कि तोके का करे बर सही हवे।

⁹ तबोले मया कर चलते मंए तोर जग बिनती करत हों। मंए पौलुस एगोट सियान मईनसे लागों अऊ अब मसीह ईसू बरिक एगोट कैदी भी हवों।

¹⁰ मंए तोर जग अपन बेटा उनेसिमुस बर बिनती करत हों। जब मंए जेहल में रहें, तब ओहर मोर द्वारा ईसू मसीह कर ऊपरे बिस्वास करीस।

¹¹ उनेसिमुस तो पहिले तोर कांहीच काम कर लाएक नई रहीस, बकिन अब फुरोंच में ओहर तोर अऊ मोर, दुनो झन बर ढेरेच काम कर हवे।

¹² ओहीच के मंए ढेरेच मया करथों अऊ मंए ओके तोर जग वापिस भेजत हवों।

¹³ अब मंए इहां सुघर खभेर कर परचार करे कर चलते जेहल में हवों। तब उनेसिमुस ला मंए मोर जग राखे बर चाहत रहें, ताकि ओहर तोर बदले में मोर मदेत कएर सके।

¹⁴ बकिन मंए तोर मरजी कर बिना कांहीच करे बर नई चाहत हवों, ताकि जे भलाई तंए करथस, ओहर कोई दबाव ले नहीं, बलकि तोर ईछा ले होए जाए।

¹⁵ सायद उनेसिमुस हर थोंरहे समय बर, तोर जग ले अलगे होए रहीस, ताकि ओहर हमेसा तोर संगे रहे।

¹⁶ बकिन अब ले ओहर सिरीप एगोट गुलाम ना हवे, बलकि गुलामोच ले बएड़ के एगोट मयारू भाई हवे। उनेसिमुस हर मोर ढेरेच मयारू हवे। बकिन तंए ओके ला ढेरेच मया करबे, सिरीप एगोट मईनसे कर रूप में नहीं, बकिन परभू में एगोट भाई कर रूप में ओहर तोर मयारू लागे।

¹⁷ एकरे ले अगर तंए मोके परमेस्वर कर काम में अपन साझीदार समझथस, त ओहू के एही कस अपनाए ले, जेकस तंए मोके अपनाथस।

¹⁸ अगर ओहर तोर कुछ गलती करीस होही, चाहे ओहर तोर जग ले तनिकोच करजा लेहीस होही, त मोर नांव में लिख ले।

¹⁹ मंए पौलुस अपन हाथ ले लिखत हवों कि मंए ओ सब ला खुद भएर देहूं, मोके तोर जग ए कहे कर जरूरत नईए कि मोर करजा जेहर तोर ऊपरे हवे, ओहर तंहीच लागस।

²⁰ ए भाई, परभू में हमर रिस्ता कर चलते, तोर कती ले मोके कुछ फयदा होए। तंए मसीह में मोर चोला ला हरियर कएर दे।

²¹ मंए पूरा भरोसा करत हों कि तंए मोर बात ला मानबे। जे बात ला मंए कहत हों, तंए ओकरो ले बगरा करबे, एला जाएन के मंए तोके लिखत हवों।

²² अऊ हां, एगोट बात अऊ हवे, मोर रहे कर जघा तियार राख, काबरकि मोके आसा हवे कि तुमन कर पराथना मन कर जबाब में, परमेस्वर हर मोके तुमन जग लानही।

आखरी जोहार

²³ इपफरास, जेहर मसीह ईसू कर चलते मोर संगे कएदी हवे, तोके अपन जोहार कहथे।

²⁴ अऊ वइसने मोर संगे सेवा करोईया मरकुस, अरिसत्रखुस, देमास अऊ लूका तोके जोहार कहथें।

²⁵ हमर परभू ईसू मसीह कर किरपा तुमन कर आत्मा कर संगे रहे।