मरकुस 1 - Surgujia Bible

यूहन्ना बतिस्मा देवईया कर सेवकाई

¹ परमेस्वर कर बेटा ईसू मसीह कर सुघर खभेर कर सुरू।

² जईसने यसायाह अगमजानी कर किताब में लिखल हवे, “सुना, मंए अपन खभरीहा ला, तोर आगू भेजत हों, जेहर तोर बरीक डगर बनाही।

³ सुनसान जघा में एक झे खभरीहा हर चीकरत हवे, कि परभू ला आए बरीक डगर ला तियार करा अऊ ओकर डगर ला सोज करा।”

⁴ एही खभरीहा हर बतिस्मा देवईया यूहन्ना रहीस, जेहर सुनसान जघा में रहत रहीस अऊ सिखावत रहीस, कि पाप कर छमा मिले बर, अपन मन ला परमेस्वर कती फिराए के बतिस्मा लेआ।

⁵ यरूसलेम सहर अऊ यहूदी जिला कर सब झेमन निकेल के ओकर जग गईन अऊ अपन-अपन पाप ला माएन के, एरदन नदी में ओकर जग बतिस्मा लेहीन।

⁶ यूहन्ना हर ऊंट कर रांवा कर बनल ओढ़ना ला पहिने अऊ अपन कनिहां में चाम कर बनल पटा ला पहिने रहत रहीस। ओहर फंफा अऊ जंगली मधुरस खात रहीस।

⁷ ओहर एकस परचार करत रहीस कि मोर पाछू एक झन अवईया हवे, जेहर मोरोच ले अऊ महान हवे, मंए एकर लाएक नई हों कि नीहूर के ओकर पनहीं कर पहिरल डोर ला छोरों।

⁸ मंए तो तुमन ला पानी ले बतिस्मा देहथों, बकिन ओहर तुमन ला पबितर आत्मा ले बतिस्मा देही।

ईसू कर बतिस्मा अऊ परीछा

⁹ ओही घनी में ईसू हर गलील जिला कर, नासरत गांव ले आए के एरदन नदी में यूहन्ना जग बतिस्मा लेहीस।

¹⁰ जे घनी ईसू पानी ले निकेल के ऊपरे आईस, त तुरतेंच ओहर सरग ला ऊघरत देखीस अऊ परमेस्वर कर आत्मा ला परेंवा कस, अपन ऊपरे उतरत देखीस।

¹¹ अऊ परमेस्वर कर अवाज हर सरग ले एकस आईस कि तंए मोर दुलरुवा बेटा लागस, तोर ले मंए ढेरेच खुस हों।

¹² तब पबितर आत्मा हर तुरतेंच ओके सुनसान जघा जाए बर अगुवाई करीस।

¹³ ओजग सैतान हर चालीस दिन ले ओकर परीछा लेहीस, ऊहां जंगली जानवर मन रहत रहीन, बकिन सरगदूत मन ओकर सेवा-जतन करत रहीन।

¹⁴ जे घनी यूहन्ना ला जेहल में हुरकल गए रहीस, त ईसू हर गलील जिला में जाए के, परमेस्वर कर सुघर खभेर कर परचार करीस;

¹⁵ अऊ कहीस, “निचट घरी हर आए पहुंचीस हवे अऊ परमेस्वर कर राएज करे कर घनी हर लिघे हवे, अपन पाप मन ले, मन फिरावा अऊ सुघर खभेर में बिस्वास करा।”

ईसू हर चेला मन ला बलाथे

¹⁶ एक दिन ईसू मसीह गलील जिला कर बड़खा दह कर धरी-धरी जात रहीस, तब ओहर समोन अऊ ओकर भाई अंदरियास ला जाल फेंकत देखीस, काबरकि ओमन मछुवारा रहीन।

¹⁷ ईसू हर ओमन ला कहीस, “मोर पाछू आवा, मंए तुमन ला मछरी ला नई बकिन मईनसे मन ला मोर जग लनोईया बनाहूं।”

¹⁸ ओमन तुरतेंच जाल मन ला छोंएड़ के, ओकर पाछू होए लेहीन।

¹⁹ बकिन तनिक आगू जाए के, ओहर जबदी कर बेटा याकूब अऊ ओकर भाई यूहन्ना ला डोंगा में जाल सुधारत देखीस।

²⁰ ईसू हर तुरतेंच ओमन के बलाईस अऊ ओमन अपन दाऊ जबदी ला, बनिहार मन कर संगे डोंगा में छोंएड़ के ओकर पाछू चएल देहीन।

दुस्टआत्मा धरल मईनसे मन ला ईसू चंगा करथे

²¹ ओमन कफरनहूम सहर में गईन अऊ ईसू पबितर दिन में, यहूदी मन कर धरम सभा कर घर में जाए के, उपदेस देहे लागीस।

²² सबेच मईनसे मन ओकर उपदेस ला सुईन के, अचमहों होवत रहीन, काबरकि ओहर यहूदी कानहूंन कर सिखोईया मन कस नहीं, बकिन अधिकार कर संगे मईनसे मन ला उपदेस देहत रहीस।

²³ ओही घनी ओमन कर सभा घर में एक झन मईनसे रहीस, जेकर भीतरी एगोट असुध आत्मा रहीस।

²⁴ ओहर किरलाए के कहीस, “ए ईसू, नासरत गांव कर रहोईया, हमर काम में अड़ंगा झईन डाल, का तंए हमके नास करे बर आए हस? हमरे जानथी कि तंए कोन लागस? तंए परमेस्वर कर पबितर जन लागस।”

²⁵ ईसू हर ओके ला घुड़काए के कहीस, “कले रह, अऊ ओकर भीतरी ले निकेल जा।”

²⁶ तब असुध आत्मा हर ओके ला मुरकेट के, किरलात ओकर भीतरी ले निकेल गईस।

²⁷ एला देख के सब मईनसे मन अकबकाए के एक दूसर जग पूछत रहीन कि एहर का बात हवे? एहर तो कोनो नांवा उपदेस लागे! ओहर अधिकार कर संगे गोठियाथे अऊ असुध आत्मा मन ला भी अगियां देथे अऊ ओमन ओकर गोएठ ला मानथें।

²⁸ एकरे चलते गलील जिला कर सब जघा में, ओकर नांव कर चरचा तुरतेंच फईल गईस।

ईसू ढेरेच बेमरीहा मन ला चंगा करथे

²⁹ तेकर ईसू हर यहूदी मन कर सभा घर ले निकेल के याकूब अऊ यूहन्ना कर संगे, समोन अऊ अंदरियास कर घरे गईस।

³⁰ समोन कर सास ला ढेरेच जर लेहत रहीस, त ओमन तुरतेंच ईसू ला ओकर बारे में बताईन।

³¹ ईसू ओकर जग गईस अऊ ओकर हाथ ला धएर के उठाईस। त ओकर जर हर ओतनेच में उतेर गईस अऊ ओहर ओमन कर सेवा-सतकार करे लागीस।

³² सांझ जुआर, जे घनी बेर हर बूईड़ गईस, तब मईनसे मन ईसू जग बेमरीहा अऊ जेमन ला दुस्टआत्मा धरे रहीस, ओमन ला लानीन।

³³ ओ सहर कर सब मईनसे मन, ओ घर कर दुरा कर आगू में झुमेट गईन।

³⁴ ईसू हर ढेरेच झन कर, कईयो मधे कर बेमारी ला चंगा करीस अऊ ढेरेच दुस्टआत्मा मन ला निकालीस। बकिन दुस्टआत्मा मन ला गोठियाए नई देहीस, काबरकि ओमन ईसू ला जानत रहीन।

सुनसान जघा में ईसू पराथना करथे

³⁵ बड़े बिहाने बेर उगे कर आगू, ईसू हर उईठ के सुनसान जघा में गईस अऊ ओजग पराथना करे लागीस।

³⁶ तेकर समोन अऊ ओकर संगता मन ओके खोजे बर गईन।

³⁷ जे घनी ओहर मिल गईस, त ओकर जग कहीन कि सब कोनो तोके ला खोजत हवें।

³⁸ ईसू ओमन ला कहीस, “आवा, हमरे ठांवें-ठांवें कर गांव में जाई कि मंए उहोंच ला परचार करहूं, काबरकि मंए एकरे बर निकले हों।”

³⁹ तेकर ओहर गलील जिला में जाए के, यहूदी मन कर सबेच सभा घर में परचार करत रहीस अऊ दुस्टआत्मा मन ला निकालत रहीस।

कुड़गा रोगी ला ईसू चंगा करथे

⁴⁰ एगोट कुड़गा बेमरीहा हर ईसू जग आईस अऊ ठेहुनाए के बिनती करीस, “अगर तंए चाहबे, त मोके सुध कएर सकथस।”

⁴¹ ईसू हर ओकर ऊपरे सोगे होईस तेकर ले अपन हाथ ला लमाए के ओके छुईस अऊ कहीस, “मंए चाहथों, तंए सुध होए जा।”

⁴² त ओहीच घनी ओकर कुड़गा बेमारी हर हएट गईस अऊ ओहर सुध होए गईस।

⁴³ तेकर ईसू हर ओला बढ़िहां ले चेंताए के झट के भेज देहीस;

⁴⁴ अऊ ओके ला कहीस, “सुन, ककरो जग कांही झईन कहबे, बकिन तंए जाए के अपन-आप ला याजक ला देखाओ अऊ कुड़गा बेमारी ले चंगा होए कर बारे में, जेला मूसा अगमजानी हर ठहराईसे, ओही कस भेंट ला चघा कि सब कोनो समेझ जाएं कि तंए सुध होए गए।”

⁴⁵ बकिन ओहर बाहरी जाए के, ए बात कर ढेरेच चरचा करे लागीस अऊ एहर एतना फईले लागीस, कि ईसू मसीह ककरो देखत कोनो सहर में जाए नई सकत रहीस। तेकर ले ईसू हर बाहरी सुनसान जघा में रहत रहीस, तबो ले चाएरो कती ले मईनसे मन ओकर जग आवत रहीन।