लूका 1 - Surgujia Bible

चिन्हारी

¹ ए सीरीमान थियुफिलूस, जे काम हर हमर मझारे होईसे, ओकर बारे में ढेरे झेमन लिखीन हवें।

² ए सब जाएत ला जेमन आगुवे ले देखे रहीन, ओमन जग ले हमरे सुनेन। ओमन बचन कर बतोईया, परमेस्वर कर सेवक मन रहीन।

³ जे बात ला ओमन लिखीन अऊ कहे रहीन ओ बात मन ला मंए खुद बढ़िहां ले तजबीजें। एहर मोके बढ़िहां लागीस कि एकर बारे में मंए तोर बर ओरे-ओर लिखों।

⁴ तेकर ले तंए ए बात ला जाएन ले, कि जे सिक्छा हर एकर बारे में तोके मिलीस हे, ओहर अटल हवे।

बतिस्मा देवईया यूहन्ना कर जनम कर घोंसना

⁵ ए सब बात कर ओर एगोट यहूदी याजक जकरयाह ले होईस, जेहर एहूदिया जिला कर राजा हेरोदेस कर घनी में जीयत रहीस। ए जकरयाह हर अबियाह कर दल कर रहीस, अऊ ओकर परानी हर, हारून कर घराना कर रहीस, जेकर नांव इलीसीबा रहीस।

⁶ ओमन दुनो झन परमेस्वर कर देख में, सुघर जिनगी जीयत रहीन अऊ परभू कर सब अगियां अऊ नियम मन में निरदोस चलोईया रहीन।

⁷ बकिन ओमन कर एकोठे लईका नई रहीस, काबरकि इलीसिबा बांझ रहीस, अऊ ओमन दुनो झन ढेरेच बुढ़ाए गए रहीन।

⁸ एक दिन जकरयाह हर अपन दल कर पारी ले, परमेस्वर कर मंदिर में याजक कर काम करत रहीस,

⁹ त याजक मन कर रीती कर अनुसार, ओकर नांव में चिट्ठी निकलीस, कि ओहर परभू कर मंदिर कर पबितर जघा में जाए के धूप जलाए।

¹⁰ धूप जलाए कर जुआर, अराधना करे बर जेमन आए रहीन, ओ सब मईनसे मन, बाहरी कती पराथना करत रहीन।

¹¹ ओही जुआर परभू कर एगोट दूत हर, धूप कर बेदी कर जवनी कती, ओके ठड़होवल देखार देहीस।

¹² जकरयाह हर देख के घबराए गईस, अऊ ढेरेच डराए गईस।

¹³ बकिन ओ सरगदूत हर ओके ला कहीस, “ए जकरयाह, झईन डराओ, काबरकि तंए एगोट बेटा पाए बर जे पराथना ला करत रहे, ओला परमेस्वर हर सुईन लेहीस हवे अऊ तोर परानी इलीसीबा हर, तोर बर एगोट बेटा ला जनम देही, अऊ ओकर नांव तंए यूहन्ना धरबे।

¹⁴ ओ लईका हर तोके आनंद अऊ खुसी देही, अऊ ढेरे मईनसे मन ओकर जनमे कर खुसी में आनंद मनाहीं।

¹⁵ काबरकि ओहर परभू कर देख में महान होही, अऊ ओहर अंगूर कर रस अऊ दारू कभों नई पीही, अऊ अपन दाई कर पेटेच ले, पबितर आत्मा ले भरल पूरल रही।

¹⁶ जे घनी ओहर बाएढ़ जाही, त अपन परचार कर जरिए, इसराएल कर ढेरे झेमन ला, ओमन कर परभू परमेस्वर कती फिराए के ले लानही।

¹⁷ परमेस्वर कर तईहा जुग कर अगमजानी एलीयाह कर, आत्मा कर अगुवाई अऊ सक्ति ले, ओहर परभू कर आगु-आगु रेंगही, तेमेकि परभू कर आए कर आगू, ओकर लाएक एगोट परजा ला तियार करही। ओहर दाई-दाऊ मन कर हिरदय ला, अपन लईका मन कती फिराही, अऊ अगियां नई मनोईया मन ला, अगियां ला माने कर सिक्छा ला देही।”

¹⁸ जकरयाह हर सरगदूत जग पूछीस, “एला मंए कईसे जानहूं? मंए तो बुढ़ाए गए हों, अऊ मोर परानीयोच हर सियानीन होए गईसे।”

¹⁹ फेर सरगदूत हर ओके कहीस, “मंए जिबराईल लागों, जेहर परमेस्वर कर आगू में ठड़होए रथों, मंए तोर जग गोठियाए बर, अऊ ए सुघर खभेर ला सुनाए बर भेजल गए हों।

²⁰ सुईन ले, जे दिन ले ए गोएठ हर पूरा नई होए जाही, ते दिन ले तंए कोंदा रहबे, अऊ तंए गोठियाए नई सकबे, काबरकि तंए मोर गोएठ में बिस्वास नई करे, जेहर सही जुआर में पूरा होही।”

²¹ ओही घनी मईनसे मन जकरयाह ला अगुरत रहीन, अऊ अचमहों होए लागीन, कि ओके ला पबितर जघा में एतना अबेर काबर होवथे।

²² आखरी में जे घनी जकरयाह हर बाहरी आईस, त ओमन जग गोठियाए नई सकीस, ओहर इसारा करत रहीस, त ओमन जाएन गईन कि ओहर मंदिर में कांही दरसन पाईस हवे, अऊ ओ कोंदा होए गए रहीस।

²³ जे घनी ओकर सेवा कर दिन पूईर गईस, त फेर ओहर अपन घरे फिर गईस।

²⁴ तनिक दिन कर पाछू, ओकर परानी इलीसिबा हर आसापती होईस, अऊ पांच महीना ले ए कहिके, अपन-आप ला लुकाए रहीस,

²⁵ “मईनसे मन जग ले मोर लाज ला हटाए बर, परभू हर मोर ऊपरे किरपा कएर के, एकस करीसे।”

ईसू मसीह कर जनम कर घोंसना

²⁶ जे घनी एलीसीबा कर आसापती होए ले, छठवां महीना होए गए रहीस, ते घनी परमेस्वर कती ले, जिबराईल नांव कर एगोट दूत ला, गलील जिला कर नासरत गांव में,

²⁷ मरियम नांव कर एगोट कुंवारी जग भेजल गईस, जेकर मंगनी यूसुफ नांव कर एगोट सवांग जग होए रहीस। ओहर दाऊद राजा कर, बंस कर रहीस।

²⁸ जिबराईल सरगदूत हर मरियम कर आगू में परगट होईस अऊ ओके जोहाएर के कहे लागीस, “परमेस्वर कर किरपा तोर ऊपर होईसे, परभू हर तोर संगे हवे।”

²⁹ मरियम ओ गोएठ ला सुईन के ढेरेच घबराए गईस, अऊ सोंचे लागीस कि ए सब जाएत कर का मतलब हवे?

³⁰ सरगदूत हर ओके कहीस, “ए मरियम तंए झईन डराओ, काबरकि परमेस्वर कर किरपा तोर ऊपरे होईसे।

³¹ सुन, तंए आसापती होए जाबे, अऊ एगोट बेटा ला हलूकाबे, अऊ ओकर नांव ईसू धरबे।

³² ओहर महान होही, अऊ सबले ऊंच में रहोईया परमेस्वर कर बेटा कहाही, अऊ परभू परमेस्वर हर, ओकर पूरखा दाऊद राजा कस, ओके राजा बनाही।

³³ अऊ ओहर याकूब कर घराना में, मनेकी इसराएल मन कर ऊपरे, जुग-जुग राएज करही, अऊ ओकर राएज हर कभों नई सिराही।”

³⁴ मरियम हर सरगदूत जग कहीस, “ए कईसे होए सकथे, मंए तो कुंवारी हों मंए ककरो जग नई गए हों?”

³⁵ सरगदूत हर ओके जबाब देहीस, “तोर ऊपरे पबितर आत्मा उतरही, अऊ सबले ऊंच में रहोईया परमेस्वर कर सक्ति हर, तोर ऊपर काम करही, एकरे बर ओ पबितर लईका, जेहर जनम लेही, ओहर परमेस्वर कर बेटा कहाही,

³⁶ अऊ सुन, तोर जाएत-सागा इलीसीबोच हर, बूड़हत काल में आसापती होईसे। मईनसे मन ओके बांझ कहत रहीन, बकिन आसापती होए ले ओके छव महीना होवथे,

³⁷ काबरकि परमेस्वर हर सबेच जाएत कएर सकथे।”

³⁸ मरियम हर कहीस, “सुन, मंए परभू कर दासी लागों, मोके ला तोर बचन कर अनुसार होए।” तेकर सरगदूत हर ओकर जग ले चईल देहीस।

मरियम हर इलीसीबा जग भेंटाए बर जाथे

³⁹ थोरोक दिन कर पाछू मरियम हर उईठ के, तुरतेंच पहार राएज में, यहूदा जिला कर एगोट सहर में चएल देहीस।

⁴⁰ अऊ जकरयाह कर घरे जाए के, ओहर इलीसीबा ला जोहारीस।

⁴¹ जे घनी इलीसीबा हर, मरियम कर जोहार ला सुनीस, ओहीच घनी ओकर पेट कर लईका हर जोर से कुल-बूलाए लागीस अऊ ओही घनी ले इलीसीबा हर, पबितर आत्मा ले भरपूर होए गईस।

⁴² अऊ ओहर ढेरेच खुस होए के जोर से चिकेर के कहीस, “तंए सवांगीन भेर ले धन्य हवस, अऊ तोर पेट कर लईकोच हर धन्य हवे।

⁴³ एहर केतेक आदर कर बात हवे, कि मोर परभू कर दाई हर मोर जग आईस हवे?

⁴⁴ सुन, ना जे घनी मंए तोर जोहार ला सुनें, तेही घनी मोर पेट कर लईका हर, खुसी कर मारे जोर से कुल-बूलाईस।

⁴⁵ तंए धन्य हस, काबरकि तंए बिस्वास करे हस, कि जे बात हर परभू कती ले कहल गईसे, ओहर पूरा होही।”

मरियम कर इस्तुती कर गीत

⁴⁶ तब मरियम हर कहीस, “मोर परान हर परभू कर बड़ाई करथे,

⁴⁷ अऊ मोर मन हर, मोर उद्धार करोईया, परमेस्वर में खुस होए गईस,

⁴⁸ काबरकि ओहर, अपन दासी कर दीन हालत ला देख के, दया करीसे, एकरले सुना, अब ले सब जुग कर मईनसे मन, मोके धन्य कहीं।

⁴⁹ काबरकि ओ सबले सक्तिमान परमेस्वर हर, मोर बर बड़े-बड़े काम करीसे, अऊ ओकर नांव पबितर हवे।

⁵⁰ अऊ जेमन परमेस्वर ला डराथें, ओकर दया ओमन कर ऊपरे, जुग-जुग ले बनल रही।

⁵¹ ओहर ढेरेच सक्ति कर संगे काम करीसे, अऊ जेमन अपन-आप ला, बड़खा समझत रहीन, ओमन ला छितिर-छान कएर देहीस हे।

⁵² ओहर बलवान राजा मन ला, ओमन कर राएज गदी ले उताएर देहीस, अऊ नरम सुभाव कर मईनसे मन ला, ऊपरे उठाए देहीस।

⁵³ ओहर भूखा मन ला बढ़िहां-बढ़िहां चीज ले अघुआए देहीस, अऊ धनी मन ला, दुछा हाथ निकाएल देहीस।

⁵⁴ ओहर हमर पूरखा मन ला, देहल जबान कर अनुसार अपन सेवक इसराएल कर, मदेत करे बर आईस।

⁵⁵ ओहर हमर पूरखा अबराहम, अऊ ओकर लईका मन जग जबान करीस कि ओकर दया ओमन कर ऊपरे, जुग-जुग बने रही।”

⁵⁶ मरियम करीबन तीन महीना ले, इलीसिबा कर संगे रहीस, तेकर पाछू अपन घरे फिर गईस।

बतिस्मा देवईया यूहन्ना कर जनम कर बात

⁵⁷ तेकर इलीसीबा कर, हरू-गरु होए कर दिन हर पूईर गईस, अऊ ओहर एगोट बेटा लईका ला हलूकाईस।

⁵⁸ ओकर परोसी अऊ जाएत-सागा मन, ए बात ला सुनीन कि ओकर ऊपरे परभू हर ढेरेच दया करीसे, तेकर फेर ओमन ओकर संगे खुसी मनाईन।

⁵⁹ अऊ एकस होईस कि ओमन आठेच दिन में, ओ लईका कर खतना करे बर आईन, अऊ ओ लईका कर नांव ओकर दाऊ कर नांव कस, जकरयाह धरे बर चाहत रहीन।

⁶⁰ बकिन ओकर दाई इलीसिबा हर कहीस, “नहीं, बल्कि एकर नांव यूहन्ना राखल जाही।”

⁶¹ ओमन इलीसिबा ला कहीन, “तोर जाएत-सागा में ककरो नांव तो एकस नईए ना?”

⁶² तेकर ओमन ओ लईका कर दाऊ जग, इसारा कएर के पूछीन कि ओहर एकर नांव, का राखे बर चाहथे।

⁶³ तेकर ओहर एगोट लिखे कर पटी माएंग के लिख देहीस, “एकर नांव यूहन्ना हवे।” अऊ ओला देख के सब झन, अचमहों होए गईन।

⁶⁴ तेकर जकरयाह कर मूंह अऊ जीभ हर तुरतेंच खुईल गईस, अऊ ओहर गोठियाए लागीस अऊ परमेस्वर कर धनबाद करे लागीस।

⁶⁵ एला सूईन के, ओकर सब परोसी मन कर ऊपरे डर भीन गईस, अऊ ए सब गोएठ कर चरचा, एहूदिया जिला कर सबेच पहार इलाका में बगेर गईस।

⁶⁶ अऊ ओ सब सुनोईया मन, अपन-अपन मन में सोंएच के कहत रहीन, “ए लईका हर का बनही?” काबरकि परभू कर सक्ति हर ओकर संगे रहीस।

जकरयाह कर इस्तुती कर गीत

⁶⁷ ओकर दाऊ जकरयाह हर, पबितर आत्मा ले भएर गईस, अऊ ए अगमबानी गोठियाए लागीस।

⁶⁸ “इसराएल कर परभू, परमेस्वर धन्य होए, काबरकि ओहर अपन मईनसे मन ला, मदेत करे बर आईस अऊ ओमन ला छोंड़ाईस।

⁶⁹ अऊ अपन सेवक दाऊद कर बंस में, हमर बर एगोट महान उद्धार करोईया ला ठड़ूहाईस हवे।

⁷⁰ जेकस कि तईहा जुग ले परमेस्वर हर, अपन पबितर अगमजानी मन कर द्वारा कहे रहीस,

⁷¹ कि ओहर हमर दुसमन मन ले, अऊ जेमन हमर बिरोध करथें, ओमन कर हाथ ले हमर उद्धार करीसे,

⁷² परमेस्वर हर अपन करार, जेला ओहर हमर पूरखा मन जग करे रहीस, ओकर सुरता कएर के अपन लोग मन कर ऊपरे दया करीस।

⁷³ अऊ ओ किरिया, जेला ओहर हमर पूरखा, अबराहम जग खाए रहीस,

⁷⁴ कि परमेस्वर हर हमन ला, अपन बईरी मन कर हाथ ले छोंड़ाही तेमेकि हमरे अपन बईरी मन कर सताव ले, निडर होए के परमेस्वर कर सेवा कएर सकी

⁷⁵ अऊ ओकर आगू में पबितरता अऊ ओके फुरमा करके जिनगी भर ओकर सेवा कएर सकी।

⁷⁶ अऊ ए लईका, तंए सरग में रहोईया, परमेस्वर कर अगमजानी कहाबे, काबरकि तंए परभू कर डगर तियार करे बर, ओकर आगु-आगु चलबे,

⁷⁷ तंए ओकर मईनसे मन ला ए बताबे कि ओमन पाप कर छमा कर द्वारा उद्धार ला पाहीं।

⁷⁸ एहर हमर परमेस्वर कर ओही बड़खा दया ले होही, जेकर चलते ऊपर ले बिहान कर इंजोर हर, हमर ऊपरे परही,

⁷⁹ कि अंधार अऊ मिरतु कर छांए में, बईठोईया मन ला इंजोर देहे, अऊ हमर गोड़ ला, सुघर सांती कर डगर में सोज ले चले।”

⁸⁰ अऊ ओ लईका हर बाड़हत गईस अऊ परमेस्वर कर सक्ति ले अपन आत्मा में बजर होवत गईस अऊ जे घनी ले, इसराएल में अपन सेवा ला सुरू नई करे रहीस, ते घनी ले ओहर सुनसान जघा में रहत रहीस।