यहूदा 1 - Surgujia Bible

जोहार

¹ ए चिट्ठी हर तो यहूदा कती ले हवे, जेहर ईसू मसीह कर दास अऊ याकूब कर भाई लागे, ए चिट्ठी ला मंए ओमन कर नांव में लिखत हवों, जेमन ला दाऊ परमेस्वर हर अपन मईनसे होए बर चुईन लेहीस अऊ मया करीस अऊ मसीह ईसू बर बचाए के राखीस हवे।

² तुमन के परमेस्वर कर दया अऊ सांती अऊ मया ढेरेच बगरा मिलत रहे।

परमेस्वर झूठा गुरू मन ला दंड देही

³ ए दुलरुवा भाई-बहिन मन, हमन सब झेला मिलल उद्धार कर बारे में तुमन ला लिखे बर मंए ढेरेच ईछा करत रहें, बकिन अब मंए तुमन के ए उपदेस ला देके लिखे बर जरूरी समझें कि तुमन ओ बिस्वास ला धियान देके बचाए के राखा, जेला परमेस्वर हर अपन मईनसे मन ला, हमेसा बर सोंएप देहीस हवे।

⁴ काबरकि तनिक मईनसे मन तुमन कर मंझारे कले-कस आए के मेराए गईन हवें, एमन बिगर भक्ति कर मईनसे लागें, एमन हमर परमेस्वर कर किरपा ला भोग-बिलास, मनेकि गलत रिस्ता में पड़े रहे बर काम में लानथें। एमन हमर एकेच ठन मालिक अऊ परभू ईसू मसीह कर इनकार करथें। एमन कर दंड कर अगियां हर पबितर किताब में ढेरेच पहिले ले लिखल हवे।

⁵ तुमन तो ए सब बात मन ला आगुवे ले जानत हवा, तबो ले मंए तुमन के ए बात मन कर सुरता देवाए बर चाहथों कि परभू हर अपन मईनसे मन ला मिसर देस ले छोंड़ाईस, बकिन पाछू ओमन कर नास कएर देहीस, जेमन बिस्वास नई करीन।

⁶ जे सरगदूत मन अपन अधिकार कर पद में बने नई रहीन अऊ सरग में अपन रहे कर जघा ला छोंएड़ देहीन, ओमन ला परमेस्वर हर नियाओ कर बड़खा दिन बर, अंधार में हमेसा बरीक संखडी में बाएंध के राखीस हवे।

⁷ ए सरगदूत मन परमेस्वर कर बिरोध में काम करीन। एही कस सदोम, अमोरा अऊ ओकर अगल-बगल कर सहर कर मईनसे मन बेभिचारी होए गए रहीन। परमेस्वर कर द्वारा मना करल सबंध में पएड़ गए रहीन, मनेकि आने झेमन कर सरीर कर पाछू लएग गए रहीन। तेकर ले ओमन आगी में अमर जुग कर दंड भोगत हवें। एहर हमर चेतावनी बर हवे।

⁸ ओही कस तुमन कर मझार में, जे मईनसे मन कलेकस मेराए गईन हवें, ओमन अपन-आप ला असुध करथें अऊ कथें कि परमेस्वर हर ओमन ला अईसना करे बर सपना में अगियां देहीसे। ओमन परमेस्वर कर अधिकार कर इनकार करथें अऊ सरगदूत मन ला बदनाम करथें।

⁹ बकिन परधान सरगदूत मीकाईल हर, जब सैतान कर संगे अगमजानी मूसा कर लास कर बारे में बहस करत रहीस, त ओहर सैतान ला बुरा भला कहिके, दोस लगाए कर हिमेत नई करीस, बकिन ओहर एतनेच कहीस, “परभू तोके डांटे।”

¹⁰ बकिन ए मईनसे मन, जे बात मन ला नई जानें, ओकर बिरोध में खराब गोएठ गोठियाथें, जानवर मन कस सब कुछ सुभाव ले ही करथें अऊ बिना सोंचे समझे करथें, ए बात मन कर चलते, एमन परमेस्वर ले दंड पाथें।

¹¹ एमन ढेरेच दंड पाहीं! काबरकि एमन कैन नांव कर मईनसे कस चाल चलथें अऊ बिलाम नांव कर मईनसे कस, धन कर लालच कर चलते भटेक गईन हवें अऊ कोरह नांव कर मईनसे कस बिरोध करथें। एकरे चलते एमन परमेस्वर ले दंड पाथें।

¹² ए मईनसे मन तुमन कर मया भोज में बिगर मया कर संगे भाग लेथें। एमन समुंदर में छिपल नास करोईया, चट्टान मन कस ढेरेच खतरनाक हवें। एमन तुमन कर मया सभा में बेसरम मन कस खाथें-पीथें अऊ सिरीप अपन-आप कर खियाल राखथें। एमन बिगर पानी कर बदरी कस हवें, जेमन ला बईहर हर उड़ाए के ले जाथे। एमन पतझड़ कर ओ रूख कस हवें, जेकर ऊपरे फर नई लगे, जेमन दुई दाएर मएर गईन हवें अऊ जएर ले उखेड़ गईन हवें।

¹³ एमन समुंदर कर जबरजस लहरा कस हवें, जेमन अपन लाज कर फेन ला निकालथें। अऊ ओमन इते-उते किंदरत तरईया कस हवें, जेमन बर परमेस्वर हर अमरकाल बर जिलकिट अंधार ठहराईस हवे।

¹⁴ हनोक नांव कर मईनसे, जेहर आदम कर सातवां पीढ़ी कर रहीस, एमन कर बारे में ए अगमबानी करे रहीस, “देखा, परभू हर अपन लाखों सरगदूत मन कर संगे आवत हवे,

¹⁵ ताकि सब झन कर नियाओ करही, भक्ति नई करोईया मन जेतना गलत काम करीन हवें अऊ भक्ति नई करोईया पापी मईनसे मन परमेस्वर कर बिरोध में जेतना कठोर बात गोठियाईन हवें, परभू ओ सब बात मन बर ओ हर एक झन ला दोसी ठहराही।”

¹⁶ ए मईनसे मन तो, कुडकुड़ावत अऊ दूसर कर ऊपरे दोस लगावत रथें, एमन अपन खराब ईछा कर अनुसार चलथें, अपन मूंह ले घमंड कर गोएठ गोठियाथें, अऊ एमन अपन फयदा बर मूंह देखी बड़ाई करथें।

बिस्वास में बने रहा

¹⁷ बकिन ए मयारू भाई बहिन मन, तुमन ओ बात मन ला सुरता राखीहा, जेला हमर परभू ईसू मसीह कर परेरीत मन आगुवे ले कहीन हवें।

¹⁸ ओमन तुमन जग कहत रहीन, “आखरी समय में मजाक करोईया मन होहीं, जेमन परमेस्वर ला फुरमा नई करोईया, खराब ईछा कर अनुसार चलहीं।”

¹⁹ एमन तो ओ मईनसे लागें, जेमन तुमन कर मझार में फूट डालथें, एमन अपन मन कर ईछा कर अनुसार चलथें अऊ एमन जग पबितर आत्मा नईए।

²⁰ बकिन ए मयारू भाई-बहिन मन, तुमन अपन-आप ला अपन सबले पबितर बिस्वास में बढ़ावा अऊ पबितर आत्मा कर सामर्थ में पराथना करत रहा।

²¹ अपन-आप ला परमेस्वर कर मया में बनाए राखा अऊ अमर जिनगी पाए बर, हमर परभू ईसू मसीह कर दया कर बड़खा असरा कर डगर जोहत रहा।

²² अऊ जेमन बिस्वास में बजर नईएं, ओमन ऊपरे दया करा।

²³ तनिक झेमन ला आगी ले झपेट के निकाला अऊ तनिक झेमन कर उपरे दया करे घनी सवाचेती रहा, इहां तक कि ओ ओढ़नोच ला घिनांवा, जेमें ओमन कर देंह कर बुरा ईछा कर दाग लगीस हवे।

²⁴ परमेस्वर तुमन ला गिरे ले बचाए के राखे में सामर्थी हवे अऊ तुमन ला निरदोस अऊ आनंद कर संगे, ओकर महिमा कर भरपूरी ला देखायोच में सामर्थी हवे,

²⁵ ओहर हमर परभू ईसू मसीह कर जरिये हमके ला उद्धार देथे, ओहीच एकेच झन परमेस्वर कर महिमा अऊ बड़ाई, सक्ति अऊ अधिकार, जेकस सनातन काल ले हवे, ओहीच कस अझरो ले होए अऊ जुग-जुग ले होवत रहे। आमीन।