इबरानी 1 - Surgujia Bible

परमेस्वर हर अपन-आप ला परगट करीस हवे

¹ तईहा जुग में परमेस्वर हर, केतनो दाएर अऊ कई मधे ले अगमजानी मन कर द्वारा हमर पूरखा मन ले गोठियाईस,

² बकिन ए आखरी दिन में, ओहर हमर जग अपन बेटा कर जरिये गोठियाईस अऊ ओहीच के सब जाएत कर ऊपरे वारिस ठहराईस। ओहीच बेटा कर जरिये ओहर पूरा संसार ला बनाईस।

³ ओ बेटा हर परमेस्वर कर महिमा कर इंजोर लागे अऊ ओकर सुभाव कर बिलकुल सही छाप लागे अऊ ओहर अपन सामर्थी बचन कर द्वारा सब जाएत मन ला समहार के राखथे। ओहर मईनसे मन कर पाप ला सुद्ध करके, सरग में महान परमेस्वर कर जवनी कती बईठ गईस।

⁴ एकर चलते बेटा हर सरगदूत मन ले, ढेरेच बढ़िहां ठहरीस, काबरकि जे नांव हर ओके हक में मिलीस, ओहर सरगदूत मन कर नांव ले ढेर बढ़िहां हवे।

परमेस्वर कर बेटा सरगदूत मन ले महान हवे

⁵ परमेस्वर अपन बेटा जग कहीस, “तंए मोर बेटा लागस, अब मंए तोर दाऊ बन गए हवों” अऊ फेर ओहर कहीस, “मंए तोर दाऊ होहूं, अऊ तंए मोर बेटा होबे।” परमेस्वर हर कोनो सरगदूत ला कभों अईसना नई कहीस।

⁶ फेर जब परमेस्वर हर अपन पहिलोठा बेटा ला संसार में लानथे, त कथे, “परमेस्वर कर सब सरगदूत मन ओकर अराधना करें।”

⁷ अऊ सरगदूत मन कर बारे में, परमेस्वर कर किताब में एकस लिखल हवे, “परमेस्वर अपन सेवा करोईया दूत मन ला हवा कस, अऊ धधकत आगी कस बनाथे, जेमन बदलथें।

⁸ बकिन बेटा कर बारे में ओहर कथे” “ए परमेस्वर, तोर सिंहासन हर जुग-जुग तक रही, अऊ तोर राएज कर सासन, तंए नियाओ कर संगे करबे।

⁹ तंए सही काम करोईया मन ला पसंद करे हस अऊ बुराई ले बैर करे हस तेकर ले, मंए तोर परमेस्वर, तोर संगी मन ले बएढ़ के आनंद कर तेल ले तोर अभिसेक करे हों।”

¹⁰ अऊ एहू कस कथे, “ए परभू, सब जाएत ला सिरजे कर आगू तंए धरती कर नेंव राखे, अऊ तंए अपन हाथ मन ले अगास मन ला भी बनाए।

¹¹ ओमन तो नास होए जाहीं, बकिन तंए बने रहबे अऊ ओमन कपड़ा सहींक जूनहा होए जाहीं।

¹² तंए ओमन ला चदर कस संथीयाबे अऊ ओमन ओढ़ना कस बदेल देहल जाहीं, बकिन तंए कभों नई बदलस अऊ तोर बछर मन कभों खतम नई होंही।”

¹³ परमेस्वर हर कभों कोनो सरगदूत ला एकस नई कहीस, “जब तक मंए तोर बईरी मन ला तोर गोड़ कर तरी नई कएर देहूं तब तक मोर जवनी कती में बईठ।”

¹⁴ सब सरगदूत मन परमेस्वर कर सेवा करोईया आतमा मन लागें। एमन ला उद्धार कर हकदार मन कर सेवा करे बर भेजल गईन हवें।