गलातियों 1 - Surgujia Bible

पौलुस कर जोहार

¹ मंए परेरीत पौलुस, कोनो मईनसे मन कर जरिए, न तो ककरो अधिकार ले ठहराल नई गए हों, बकिन ईसू मसीह अऊ दाऊ परमेस्वर कर जरिए, जेहर ईसू ला मरल में ले जीयाईस, ओमन कती ले मंए परेरीत ठहराल गए हों।

² सबेच भाई मन कती ले जेमन मोर संगे हवें, गलातिया इलाका कर कलीसिया मन बर ए चिट्ठी ला लिखत हों।

³ दाऊ परमेस्वर अऊ परभू ईसू मसीह कती ले तुमन के किरपा अऊ सांती मिलत रहे।

⁴ जे संसार में हमरे जीयत हन, ओहर एगोट बुरा संसार हवे अऊ ओमे ले हमके ला छोंड़ाए बर हमर दाऊ परमेस्वर कर इछा कर अनुसार, ईसू हर हमर पाप बरीक अपन जीव ला दे देहीस।

⁵ ओ परमेस्वर कर इस्तुती अऊ बड़ाई जुग-जुग होवत रहे। आमीन।

एकेच ठन सुघर खभेर हवे

⁶ मोके अचमहों होथे कि परमेस्वर जग ले तुमन एतेक हालू मूकेर गया, जेहर तुमन के मसीह कर किरपा में बलाईस हे। तुमन अलगेच मधे कर सुघर खभेर ला सुईन के, ओकरेच कती चले लागे हवा।

⁷ बलकि अऊ दूसर मधे कर सुघर खभेर तो हलेच नईए, बकिन एकरले मंए ए गोएठ ला तुमन के बताथों कि कोनो मन एकस हवें, जेमन तुमन के भरमुवाए देहत हवें, अऊ मसीह कर सुघर खभेर ला बिगाड़े बर चाहत हवें।

⁸ अगर हमू मन आखिर सरग ले कोनो दूत हर भी आए के, जे सुघर खभेर ला हमरे तुमन के सुनाए हवन, एला छोंएड़ के कोनो दूसर मधे कर सुघर खभेर ला सुनाही, त परमेस्वर ओके सराप देही।

⁹ जेकस हमरे आगूवेच ले कहे दारे हन अऊ ओईसनेच अझरो ले फेर मंए कहत हों कि अगर कोनो हर, जे सुघर खभेर ला तुमन अपनाए हवा, ओला छोंएड़ के दूसर मधे कर सुघर खभेर सुनाथे, त परमेस्वर ओके सराप देही।

¹⁰ का मंए अब मईनसे मन ला मनाथों कि परमेस्वर ला? अगर मंए मईनसे मन ला फुरमा करोईया रहतें, त अझेर तक मसीह कर दास नई रहतें।

पौलुस कईसे सुघर खभेर ला पाईस

¹¹ ए भाई बहिन मन, मंए बताथों कि जे सुघर खभेर ला तुमन जग मंए परचार करे हों, ओहर कोनो मईनसे कर बुद्धी ले नहीं।

¹² काबरकि ए सुघर खभेर हर मोके कोनो मईनसे कती ले नई मिलीस हे, अऊ कोनो हर नई सिखाईस हवे, बलकि एकर परकासन हर, ईसू मसीह कती ले मोके मिलीस हवे।

¹³ मोर आगू कर चाल-सहूर कर बारे में तुमन सुईन दारे हवा, कि जब मंए यहूदी मत में रहें, त परभू ईसू ला नई जानत रहें अऊ परमेस्वर कर कलीसिया ला ढेरे सतात रहें अऊ नास करे कर कोसिस करत रहें।

¹⁴ मोर जाएत-खानी कर ढेरेच झेमन मोर उमर कर रहीन, ओमन में ले मंए यहूदी रीती-रीवाज ला सबले बएड़-चएड़ के माने में उत्साहित रहें।

¹⁵ बकिन परमेस्वर हर मोर दाई कर पेट भितरी ले मोके चुईन लेहीस अऊ अपन किरपा ले मोके बलाए लेहीस

¹⁶ अऊ जब ओकर इछा होईस, त मोर ऊपरे अपन बेटा ला परगट करीस कि मंए गैर यहूदी मन में ओकर सुघर खभेर ला सुनाओं, त सुनाए बर कोनो मईनसे मन कर मंए सलाव नई लेहें,

¹⁷ अऊ यरूसलेम सहर में ओमनो जग नई गएं, जेमन मोर ले आगू परेरीत रहीन, बकिन मंए तुरतेंच अरब देस में चएल देहें अऊ ऊहां ले दमिसक सहर में फिर आएं।

¹⁸ तेकर तीन बछर कर पाछू, मंए पतरस ठन मिले बर यरूसलेम सहर में गएं अऊ ओकर जग पंदरा दिन ले रुके रहें।

¹⁹ बकिन सबेच परेरीत मन में ले परभू कर भाई, याकूब कर छोंएड़ अऊ ककरो जग नई मिलें।

²⁰ मंए परमेस्वर ला हाजीर जाएन के, कहत हों कि जे बात ला मंए तुमन के लिखत हों, ओ बात हर झूठ नईए।

²¹ तेकर पाछू मंए सीरिया अऊ किलिकिया कर ईलाका में गएं।

²² बकिन एहूदिया इलाका कर कलीसिया मन कर बिस्वासी मन मोके कभों नई देखे रहीन।

²³ बलकि ओमन एतना सुनत रहीन कि “जेहर बिस्वासी भाई बहिन मन ला आगू सतात रहीस, अब ओही हर ए बिस्वास कर सुघर खभेर ला सुनात हवे, जेला आगू नास करे कर कोसिस करत रहीस”

²⁴ अऊ ओमन मोर चलते परमेस्वर कर महिमा करत रहीन।