इफिसियों 1 - Surgujia Bible

¹ मंए पौलुस, जेहर परमेस्वर कर ईछा ले ईसू मसीह कर परेरीत लागों। जेमन ला परमेस्वर हर हिगारीस हवे (पबितर) अऊ मसीह ईसू कर उपरे पूरा मन ले बिस्वास करथें, ओमन बर मंए ए चिट्ठी ला लिखत हों, जेमन इफिसूस सहर में रथें।

² हमर दाऊ परमेस्वर अऊ परभू ईसू मसीह कती ले तुमन के किरपा अऊ सांती मिलत रहे।

मसीह में आत्मिक आसीस

³ परमेस्वर कर इस्तुती होए, जेहर हमर परभू ईसू मसीह कर दाऊ लागे, कि मसीह में हमर जे रिस्ता हवे, तेकर चलते परमेस्वर हर हमन ला सरग कर जघा में, सब मधे कर आत्मिक आसीस देहीस हवे।

⁴ काबरकि परमेस्वर हर संसार बने कर आगूवेच ले हमके मया करीस अऊ ओहर मसीह में हिगाएर लेहीस, कि ओकर नजेर में हमरे पबितर अऊ निरदोस बनल रही।

⁵ परमेस्वर हर आगूवेच ले फईसला करीस कि हमरे ईसू मसीह कर जरिए, ओकर गोद लेहल लईका बएन जाई। एही हर ओकर इछा अऊ सुघर योजना रहीस

⁶ परमेस्वर हर एकर बर अईसना करीस कि हमरे ओकर महिमा ले भरल किरपा कर बड़ाई करी। परमेस्वर हर हमर बर, जेमन ओकर दुलरुवा बेटा कर अपन लागन, तेमन बर ए किरपा ला सेंथिया झराए देहीस।

⁷ ओहर मसीह कर लहू कर द्वारा हमर बर आजादी खरीदिस मनेकि ओहर अपन भरपूर किरपा कर मुताबिक हमर अपराध ला छमा करीस।

⁸ ओहर ओ किरपा कर संगे सब मधे कर गियान अऊ समझ हमके ला हकभेर देहीस हवे,

⁹ अऊ एकर चलते परमेस्वर हर अपन सुघर योजना, जेहर मसीह में हवे ओ योजना कर मुताबिक अपन लुकावल ईछा ला हमर जग परगट करीस।

¹⁰ ओकर सुघर योजना एहर हवे कि जब सही समय हर आही, त सरग अऊ धरती कर सब जाएत ला मसीह कर अधीन में करे बर जूटाही।

¹¹ परमेस्वर जेहर अपन योजना कर अनुसार सब जाएत ला करथे, ओहर हमके मन ला ईसू में जोड़ीस हवे, एकर बर हमन ला हकदार बनाईसे काबरकि ओहर हमके मन ला आगूवेच ले चुईन लेहीस हवे।

¹² ओकर योजना एहर हवे कि आगू हमीच मन मसीह में असरा लगाए रहेन, अब ओकरेच महिमा कर बड़ाई कर कारन बएन जाई।

¹³ तुंहूच मन सत कर बचन ला सुना, जेहर तुमन ला बचाए कर सुघर खभेर लागे अऊ जब तुमन मसीह में बिस्वास करा, त परमेस्वर हर तुमन ऊपरे पबितर आत्मा कर मोहर लगाईस, जेकर बात-जबान हमर बर करीस हवे।

¹⁴ जब तक परमेस्वर हर अपन जन मन ला, पूरा छुटकारा नई देही, तब तक ए पबितर आत्मा हर हमर जमानत लागे, कि परमेस्वर हर जे हक ला देहे कर बात-जबान करीस हवे ओला हमके देही। एकर चलते हमरे परमेस्वर कर महिमा अऊ इस्तुती करबो।

पौलुस कर पराथना

¹⁵ तेकर ले जब मंए परभू ईसू कर ऊपरे तुमन कर बिस्वास अऊ सब पबितर मईनसे मन बर तुमन कर मया ला सुईन के।

¹⁶ तुमन बर मंए परमेस्वर ला धनबाद देहे बर नई भुलाओं अऊ अपन पराथना में तुमन कर सुरता करत रथों,

¹⁷ कि हमर परभू ईसू मसीह कर परमेस्वर, जेहर महिमा ले भरल दाऊ लागे, तुमन के आत्मिक गियान अऊ परकासन कर आत्मा दे, तेमेकि तुमन परमेस्वर ला अऊ जानत जईहा।

¹⁸ मंए पराथना करथों कि तुमन कर हिरदय कर आंएख हर जगमगावत रहे, तेमेकि तुमन जाएन जईहा कि ओ असरा का लागे, जेकर बर परमेस्वर हर तुमन के बलाईस हवे। ए असरा हर पबितर मईनसे मन बर अचमहों होए जवाऊ धन कर हक लागे।

¹⁹ तुमन एहू ला जाएन ला कि हमरे जेमन बिस्वास करथी, ओमन बर परमेस्वर कर सामर्थ केतना बड़खा हवे अऊ एला ककरो संगे बरोबर नई करे सखीहा।

²⁰ परमेस्वर हर एहीच सामर्थ ला, मसीह कर उपरे काम में लानीस कि ओके ला मरल में ले जीयाए के, सरग में अपन जवनी कती बईठारीस।

²¹ अब ओके सब मधे कर हाकीम, अधिकारी, सामर्थ रखोईया अऊ राएज करोईया अऊ एही कस कोनोच मधे कर पद ले बड़खा नांव देहीस, जेहर सिरीप एही लोक में नहीं, बलकि अवईया लोक में भी लेहल जाही।

²² अऊ परमेस्वर हर सब जाएत ला मसीह कर गोड़ तरी कएर देहीस अऊ ओके सब जाएत कर ऊपरे कलीसिया बर मुखिया ठहराईस,

²³ अऊ ए कलीसिया हर ओकर देंह लागे अऊ ओकर भरपूरी मसीह कती ले आथे, जेहर अपनेच ले सबेच चीज ला पूराथे।