कुलुस्सी 1 - Surgujia Bible

जोहार

¹ मंए पौलुस, जेहर परमेस्वर कर ईछा ले मसीह ईसू कर परेरीत लागों, मोर कती ले अऊ हमर भाई तीमुथियुस कती ले, कुलुस्से सहर कर भाई-बहिन मन बर हमरे ए चिट्ठी ला लिखत हवन, जेमन पूरा मन ले मसीह कर ऊपरे बिस्वास करोईया अऊ पबितर मईनसे लागें।

² हमर दाऊ परमेस्वर कती ले तुमन के किरपा अऊ सांती मिलत रहे।

पौलुस कर पराथना

³ हमरे तुमन बर हमेसा पराथना कएर के, अपन परभू ईसू मसीह कर दाऊ परमेस्वर कर धनबाद करथी।

⁴ काबरकि हमरे सुने हवन कि मसीह ईसू कर ऊपरे तुमन कर बिस्वास हवे अऊ तुमन परमेस्वर कर सब पबितर मईनसे मन जग मया करथा।

⁵ ए सुघर खभेर जेहर सत बचन लागे, जब ओहर तुमन जग पहुंचीस, त तुमन ओ आसा कर बारे में सुना, जेला ओ सुघर खभेर हर लानथे। एकरले तुमन कर बिस्वास अऊ मया हर, तुमन जेकर आसा करथा, ओमे टिकीस हवे अऊ ओहर सरग में राखल हवे

⁶ ओ सुघर खभेर हर तुमन जग पहुंचीस हवे, ओहर दुनिया में बढ़त जाथे, एहर वइसने फर लानथे, जेकस तुमन कर मझारे ओहीच घरी ले फर लानत रहीस, जे दिन ले तुमन ओ सुघर खभेर कर बारे में सुना अऊ सचाई ले परमेस्वर कर किरपा कर बारे में समझा।

⁷ तुमन ए सुघर खभेर ला मोर संगे, सेवा करोईया संगता इपफरास जग ले पाए हवा, जेहर हमर कती ले मसीह कर बिस्वास लाएक सेवक हवे।

⁸ ओहर हमन ला तुमन कर मया कर बारे में बताईस हवे, जेला पबितर आत्मा कर द्वारा देहल गईस हे।

आत्मिक जिनगी में बढ़े बर पराथना

⁹ एकर बर जे दीन ले हमरे तुमन कर बारे में एला सुने हवन, ओ दिन ले हमरे तुमन बर पराथना अऊ बिनती परमेस्वर जग करतेच रथी कि तुमन सबेच आत्मिक बुद्धि अऊ समझ कर संगे परमेस्वर कर ईछा ला पहिचान जावा।

¹⁰ तेमेकि तुमन कर चाल-सहूर हर, परभू कर लाएक होए जाए अऊ सब कती ले तुमन परभू ला हमेसा खूस करा अऊ तुमन में सबेच सुघर काम कर फर फएर के, तुमन परमेस्वर कर पहिचान में बढ़त जावा।

¹¹ अऊ ओकर महिमा कर सक्ति कर अनुसार, सबेच सामर्थ ले बजर होवत जावा, तेमेकि तुमन खुसी कर संगे सब मधे कर धीरज अऊ सहन सक्ति देखाए सका।

¹² अऊ दाऊ परमेस्वर कर धनबाद करते रहा, जेहर हमन के एकर लाएक बनाईसे कि तुमन इंजोर कर राएज में, पबितर लोग मन कर संगे हकदार होए जावा।

¹³ ओही परमेस्वर हर हमके, अंधार कर सक्ति ले छोंड़ाए के, अपन दुलरुवा बेटा कर राएज में लानीस।

¹⁴ ओ दुलरुवा बेटा कर चलते हमके ला पाप ले छुटकारा, मनेकि पाप मन कर छमा मिलथे।

मसीह कर महानता

¹⁵ ओही मसीह हर परमेस्वर कर सही रूप हवे, जेला कोनो नई देख सके; ओहर सब सिरिस्टी ले महान हवे।

¹⁶ काबरकि ओकरे द्वारा सब जाएत हर बनाल गईसे, ओ सब जाएत जेहर सरग में चाहे धरती में हवे, देखल चाहे बिगर देखल चीज, सिंहासन चाहे राएज, सासन करोईया चाहे अधिकारी, सबेच जाएत हर ओकरे द्वारा बनावल गईसे अऊ ओकरेच बर बनावल गईसे।

¹⁷ ओही हर सब जाएत ला बनाए कर आगू रहीस अऊ ओही में सब जाएत हर टिके रथे।

¹⁸ मसीह हर कलिसीया कर मूड़ी लागे अऊ कलीसिया हर ओकर देंह लागे, ओहीच हर पहिलो लागे अऊ मरल में ले आगू जी उठोईया ओहीच हर लागे, तेमेकि सबेच बात में ओहर मुखिया ठहरे।

¹⁹ काबरकि परमेस्वर ला एही हर बढ़िहां लागीस कि अपन सबेच सुभाव हर ओकर में रहे।

²⁰ परमेस्वर हर मसीह कर कुरूस में बहावल लहू कर चलते, अपन सांती ला देके सबेच जाएत ला चाहे ओहर सरग कर रहे, चाहे धरती कर मसीह कर चलते, अपन संगे मेल-मिलाप कएर लेहीस।

²¹ एक समय रहीस, जे घनी तुमन परमेस्वर ले ढेरेच दुरिहां होए गए रहा। तुमन अपन गलत सोंच अऊ गलत काम मन कर चलते, ओकर बैरी होए गए रहा।

²² तबोले मसीह हर अपन देंह कर मिरतु कर द्वारा, तुमन कर संगे मेल-मिलाप कएर लेहीस, तेमेकि ओहर तुमन के अपन आगू में पबितर, बेकसूर अऊ निरदोस बनाए के हाजीर करे।

²³ एहर तब होही जब तुमन अपन बिस्वास में माढ़े रईहा अऊ अटल बने रईहा अऊ जे आसा तुमन के सुनल सुघर खभेर ले मिलथे, ओला झईन छोड़ीहा। ओ सुघर खभेर कर परचार अगास कर खालहे, सबेच दुनिया में करल गईसे अऊ मंए पौलुस ओकर सेवक बने हों।

पौलुस कलीसिया कर सेवा करथे

²⁴ जे दुख मंए तुमन बर उठाथों, अब मंए ओही दुख में खुसी मनाथों अऊ कलीसिया जेहर मसीह कर देंह लागे, ओकर बर जे दुख ला मसीह हर सहीस, ओमे सामिल होए के ओला मंए अपन देंह में पूरा करथों।

²⁵ परमेस्वर कर देहल जिमा कर अनुसार, मंए ए कलिसीया कर सेवक बने हवों, तेमेकि मंए परमेस्वर कर बचन ला पूरा-पूरा तुमन के बताए सकों।

²⁶ एहर ओ भेद लागे, जेला ओहर जुग-जुग अऊ पीढ़ी-पीढ़ी ले लुकाए के राखे रहीस, बकिन अब एला परमेस्वर हर, अपन पबितर मईनसे मन कर ऊपरे परगट करीसे।

²⁷ ओमन ठे परमेस्वर हर एला देखाए बर चाहत रहीस कि ओ भेद कर महिमा कर कीमत गैर यहूदी मन कर मझारे हवे अऊ ओ भेद एहर लागे कि मसीह तुमन में रथे अऊ परमेस्वर कर महिमा पाए बर, ओही हर हमर एगोट असरा हवे।

²⁸ हमरे सबेच गियान कर संगे हर एक झन ला चेताए के अऊ सिखाए के, मसीह कस परचार करथन; तेमेकि हमरे हर एक झन ला मसीह में सिद्ध बनाए सकी।

²⁹ ए उदेस बर मंए जीव-जहान लगाए के, मसीह कर सामर्थ कर अनुसार, ढेरेच मेहनत करथों अऊ ओ सामर्थ हर मोर भितरी काम करथे।