परेरीत 1 - Surgujia Bible

चिन्हारी

¹ ए थियुफिलूस, मंए अपन पहिलो किताब में ओ सबेच बात मन ला लिखे हों, जेला ईसू अपन सेवकाई कर सुरू ले अऊ सरग में ऊठाए लेहे जाए तक करत रहीस अऊ सिखात रहीस।

² ओहर सरग में ऊठाए लेहे जाए कर आगू, अपन चुनल परेरीत मन ला, पबितर आत्मा कर जरिए अगियां देहे रहीस।

³ ईसू हर दुख उठाए कर पाछू, ढेरेच अकन पका सबूत ले, ए परेरीत मन जग अपन-आप ला परगट करीस कि ओहर जीयत हवे अऊ चालीस दिन तक ओमन के देखार देहत रहीस, अऊ परमेस्वर कर राएज कर बारे में बात करत रहीस।

⁴ फेर एक दिन जब ओहर, अपन चेला मन कर संगे खात रहीस, त ओमन ला अगियां देहीस कि यरूसलेम ला झईन छोंड़ीहा, बकिन मोर दाऊ कर बात जबान ला पूरा होए बर अगुरत रईहा, जेला तुमन मोर जग ले सुने हवा।

⁵ काबरकि यूहन्ना हर तो पानी ले बतिस्मा देहीस हवे, बकिन थोरहें दिन कर पाछू, तुमन पबितर आत्मा ले बतिस्मा पईहा।

ईसू हर सरग में ऊठावल जाथे

⁶ जे घनी ओमन ईसू कर संगे जूटे रहीन, तब ओकर जग पूछीन, “ए परभू, का तंए एही जुआर इसराएली मन ला, ओमन कर राएज ला फिराबे?”

⁷ तेकर ईसू हर ओमन ला जबाब देहीस, “राएज फिराए कर दिन, आखिर ओ घरी ला जाने कर काम तुमन कर ना लागे, जेला दाऊ हर अपन अधिकार में ठहराईस हवे।

⁸ बकिन जब पबितर आत्मा हर तुमन ऊपरे आही, त तुमन सामर्थ पईहा, अऊ यरूसलेम, अऊ सब एहूदिया, अऊ सामरिया, अऊ धरती कर आखरी तक मोर गवाह होईहा।”

⁹ ए सब बात ला कहे कर पाछू, ओमन कर देखते-देखत ईसू ला सरग में उपरे उठाए लेहल गईस, अऊ बदरी हर ईसू ला ओमन कर आंएख ले लुकाए लेहीस।

¹⁰ ओकर जात घनी ओमन अगास कती ला एकढींट देखत रहीन, त ओमन देखीन कि दुई झन मईनसे मन उजर ओढ़ना पहिरल, ओमन कर लिघे ठड़होईन हवें,

¹¹ अऊ ओमन जग कहे लागीन, “ए गलील कर सवांग मन, तुमन काबर ठड़होए के सरग कती ला देखत हा? एही ईसू, जेहर तुमन कर आगू ले सरग में उठाए लेहल गईस हवे, जेकस तुमन ओके सरग में जात देखत हा, ओही कस ओहर फेर आही।”

मतियाह ला यहूदा इसकरोती कर जघा में चूनथें

¹² तब परेरीत मन जैतून नांव कर पहार ले, यरूसलेम सहर में फिरीन। ए जैतून पहार हर यरूसलेम सहर ले, एक पबितर दिन कर दुरीहां में रहीस।

¹³ ओमन में पतरस, यूहन्ना, याकूब, अंदरियास, फिलीपुस, थोमा, बरतुलमे, मत्ती, हलफई कर बेटा याकूब, समोन जेलोतेस अऊ याकूब कर बेटा यहूदा रहीस। ओमन सहर ले आए कर पाछू, ऊपर बईंगरा में गईन, जिहां रहत रहीन।

¹⁴ एमन कर संगे तनिक सवांगीन मन, अऊ ईसू कर दाई मरियम, अऊ ओकर भाई मन रहीन, अऊ एमन सब कोनो एक मन होए के पराथना में लगे रहत रहीन।

¹⁵ एक दिन करीब एक सौ बीस झन बिस्वासी मन जूटे रहीन, त पतरस हर ओमन कर मझारे ठड़होए के कहे लागीस,

¹⁶ “ए भाई-बहिन मन, ईसू ला धरोईया मन कर अगुवा, यहूदा कर बारे में, पबितर किताब कर ओ लिखल बचन हर, पूरा होए बर जरूरी रहीस। ओ बचन ला पबितर आत्मा हर, दाऊद राजा कर मूंह ले ढेरेच आगू ले कहे रहीस।

¹⁷ यहूदा हर तो हमर संग में गनल गए रहीस, अऊ ए सेवा कर कामोच में हमर सझीयारा रहीस।

¹⁸ ओहर पाप कर कमाई ले एगोट खेत बेसाईस, अऊ मूड़ कर बल गिरीस, अऊ ओकर पेट हर फाएट गईस, अऊ ओकर पोटा भेर हर निकेल गईस।

¹⁹ ए बात ला यरूसलेम कर सब रहोईया मन जाएन गईन, एकरले ओमन ओ खेत कर नांव अपन भासा में ‘हकलदमा’ राखीन, ओकर मतलब हवे, ‘लहू कर खेत।’

²⁰ काबरकि भजन संहिता में लिखल हवे, ‘ओकर घर हर उजेर जाही, अऊ ओमे रहे बर कोनो नई बांचहीं, अऊ ओकर पद ला दूसर झन ले लेहीं।’

²¹ तेकर ले यहूदा इसकरोती कर पलटा में, हमन के अब एक झन ला चुने बर परही, यूहन्ना हर मईनसे मन ला बतिस्मा देहे बर सुरू करीस, ते घनी ले लेके परभू ईसू ला हमर जग ले सरग में उठाल जाए तक, जेमन हमर संगे सगर दिन रहीन, ओमे ले एक झन ला चुने बर परही।

²² काबरकि ओ मईनसे हर हमर संगे, ओकर जी उठे कर गवाह होए जाए।”

²³ तब ओमन दुई झन के ठड़हुवाईन, एक झन यूसुफ जेके ला बरसबा कथें, अऊ ओहर यूसतुस नांव ले जानल जाथे, अऊ दूसर कर नांव मतियाह रहीस।

²⁴ तेकर ओमन पराथना करीन, “ए परभू, तंए सब झन कर मन ला जानथस। हमके ला ए देखाए दे कि तंए दुनो में ले काके चुने हस,

²⁵ कि ओहर परेरीत मन कर सेवकाई कर पद ला ले ले, जेला यहूदा हर छोंएड़ के अपन जघा में चएल देहीस।”

²⁶ त ओमन चिट्ठी डालीन, अऊ चिट्ठी हर मतियाह कर नांव में निकलीस, तेकर ले ओहर ओ गियारहो परेरीत मन कर झूंड में मेराए गईस।