3 यूहन्ना 1 - Surgujia Bible

जोहार

¹ मंए यूहन्ना जेहर कलिसीया कर अगुवा लागों, मंए ए चिट्ठी ला अपन मयारू संगता गयुस ला लिखत हों, जेकर जग मंए फुरोंच में मया करथों।

² ए मयारू संगी, मंए पराथना करत हों कि जेकस तंए आत्मिक जीवन में बढ़त जात हस, ओहीच कस तंए सबेच बात में बढ़त जा अऊ भला चंगा रह।

³ तनिक भाई मन आए के, ए गवाही देहींन कि तंए फुरोंच में परमेस्वर कर सत बचन में चलत हस, त मंए एला सुईन के ढेरेच खुस होएं।

⁴ एकरले बएढ़ के मोर जग अऊ कोनो आनंद कर बात नई होए सके कि मंए एला सुनों कि मोर लईका मन सत में चलत हवें।

गयुस ला उपदेस देथे

⁵ ए मयारू संगता, तंए हमर भाई मन बर जे जाएत करत हस, ओमें तंए बिस्वास कर लाएक ठहरे हवस, खास कएर के जब ओमन तोर बर अनजान हवें।

⁶ ओमन कलीसिया कर आगू में, तोर मया कर बारे में बताईन हवें। अगर तंए ओमन के ओही कस बिदा करबे, जेकस परमेस्वर कर लोग मन बर ठीक हवे, त तंए बढ़िहां करबे।

⁷ काबरकि ओमन मसीह कर सेवा बर निकलीन हवें। ओमन मसीह कर ऊपरे बिस्वास नई करें, तेमन जग ले कांही जाएत नई लें।

⁸ एकरे ले हमके ला अईसना मईनसे मन कर मदेद करेक चाही, ताकि हमू मन सत बरीक एक संगे काम कएर सकी।

दियुत्रिफेस हर कलीसिया में अड़ंगा डालथे

⁹ मंए कलीसिया ला चिट्ठी लिखे हों, बकिन दियुत्रिफेस, जेहर ओमन में मुखिया बने बर चाहथे, ओहर मोर बात ला नई माने।

¹⁰ एकरे ले जब मंए आहूं, त ओकर काम मन कर सुरता देवाहुं, जेला ओ करत हवे; ओहर हमर बईदनामी करत हे; ओके एतनोच में संतोस नई होईस, त ओहर भाई मन ला अपनाबो नई करीस, अऊ जेमन भाई मन ला अपनाए बर चाहथें, ओहर ओहू मन ला मना करथे अऊ ओमन ला कलीसिया ले निकाएल देथे।

¹¹ ए मयारू संगता, बुराई कर नहीं, बकिन भलाई कर पीछा कर। जेहर भलाई करथे, ओहर परमेस्वर कती ले हवे, बकिन जेहर बुराई करथे, ओहर परमेस्वर ला नई जाने।

दिमेतिरीयुस कर बारे में बढ़िहां गवाही

¹² दिमेतिरीयुस कर बारे में सबेच झन गवाही देहींन हवें अऊ खुद सत हर ओकर बारे में गवाही देहीस हवे। हमू मन ओकर बारे में गवाही देथी अऊ तंए जानथस कि हमर गवाही हर सही हवे।

आखरी जोहार

¹³ मोर जग तोके ला लिखे बर ढेरे ढेरेच अकन बात हवे, बकिन मंए सियाही अऊ कलम ले लिखे बर नई चाहत हों।

¹⁴ मोके आसा हवे कि मंए तोर जग हालूच भेंटाहूं, तब हमरे एक संगे बईठ के गोठियाबो।

¹⁵ तोके सांती मिले। इहां कर संगता मन तोके जोहार कहत हवें। उहां कर संगता मन ला तंए नांव ले लेके मोर जोहार कएह देबे।