2 तीमुथियुस 1 - Surgujia Bible

परेरीत पौलुस कर जोहार

¹ मंए परेरीत पौलुस, परमेस्वर कर इछा ले ईसू मसीह कर परेरीत बने हों। ईसू मसीह में बिस्वास करे ले जे अमर जिनगी हर हमके ला मिलथे, परमेस्वर कर ओ बात जबान कर बारे में, परचार करे बर ओहर मोके चुनीस हे। मोर मयारू बेटा तीमुथियुस, तोके ए चिट्ठी ला लिखथों।

² दाऊ परमेस्वर अऊ हमर परभू ईसू मसीह कती ले तोके ला किरपा, दया अऊ सांती मिलत रहे।

पौलुस हर तीमुथियुस ला उकसाथे

³ मंए अपन पराथना में, राएत दिन तोके सुरता कईर-कईर के, परमेस्वर कर धनबाद देथों, जेकर सेवा ला मंए अपन पूरखा मन कस सुद्ध मन ले करथों।

⁴ मंए तोर भेजत घनी कर आंसू ला सुरता कएर के, तोर जग भेंटाए बर ढेरेच घोंखत हों, तेमेकि मंए आनंद कर मारे झुईम उठों।

⁵ मोके तोर ओ बिगर कपट कर बिस्वास कर सुरता आथे, जेहर आगू तोर नानी लोईस में अऊ तोर दाई यूनीके में रहीस अऊ मोके पका बिस्वास हवे कि एहीच बिस्वास तोरोच में हवे।

⁶ एकरले मंए तोके सुरता देवावथों कि जे बरदान ला, तोर ऊपर मोर हाथ ला राखे ले परमेस्वर हर देहे रहीस, ओला ढेरेच काम में लानत रह।

⁷ काबरकि जे आत्मा ला परमेस्वर हर हमके देहीसे, ओहर हमके डरपोकवा नई बनाए, बलकि ओहर सामर्थ अऊ मया अऊ माढ़ल जीव ला देथे।

⁸ एकरले हमर परभू कर गवाही देहे बर अऊ मोर बर तंए झईन लजाओ, जेहर परभू बर जेहल में हों, बकिन परमेस्वर कर सक्ति ला पाए के, सुघर खभेर कर परचार करे में मोर संगे दुख उठा।

⁹ ओही परमेस्वर हर हमर उद्धार करीस हे अऊ हमके ला पबितर जिनगी जीए बर बलाईस हे। एहर हमर करम कर चलते नहीं, बलकि अपन योजना अऊ किरपा कर चलते एकस करीस हे। ओहर ए किरपा ला अगास-पताल बनाए कर ढेरे आगू ले, ईसू मसीह कर जरिये हमन ला देहीस हवे।

¹⁰ बकिन ए किरपा हर हमर उद्धार करोईया ईसू मसीह कर आए कर चलते परगट होईस हवे, ओहर मिरतु कर सक्ति ला नास करीस अऊ अपन सुघर खभेर कर जरिये अमर जिनगी देहीस।

¹¹ मंए एही सुघर खभेर कर परचार करोईया, परेरीत अऊ सिक्छा देहे बर गुरू ठहराल गए हों।

¹² एकरे चलते मंए ए दुख मन ला सहत हों। बकिन मंए नई लजाओं, काबरकि मंए जेकर ऊपर भरोसा करे हों, ओके मंए जानथों अऊ मोके पका आसा हवे कि जे सुघर खभेर कर सेवा ला, परमेस्वर हर मोके देहीस हवे, ओला ओहर परभू ईसू कर दुबारा आए कर दिन ले, समहाएर के राखही।

¹³ जे खर-खर बात मन ला मंए तोके सिखाए हों, ओला अपन जिनगी में एगोट नमूना कर रूप में ले अऊ थामे रह। ओकर संगे-संगे ईसू मसीह कर बिस्वास अऊ मया में बने रह।

¹⁴ जे सुघर खभेर कर सेवा परमेस्वर हर तोके सोंपीसे, ओला एगोट खजाना कस समहाएर के राख अऊ हमर भीतरी में रहोईया, पबितर आत्मा कर मदेत ले एकर पहरा कर।

¹⁵ तंए जानथस कि एसिया इलाका कर सबेच झेमन मोके छोंएड़ देहीन हवें, ओमन में फूगिलुस अऊ हिरमुगिनेस हवें।

¹⁶ उनेसिफुरुस कर परिवार कर ऊपर परभू दया करे, काबरकि ओहर कईयो दाएर मोर जीव ला मड़हाईस अऊ मोर जेहल में रहे कर चलते नई लजाईस।

¹⁷ बकिन जे घनी उनेसिफुरुस रोम सहर में आईस, त ढेरेच जतन कएर के, मोके खोजीस अऊ भेंट करीस।

¹⁸ मंए पराथना करत हों कि परभू ईसू कर आए कर दिन, ओकर ऊपर परभू कर दया होए, ओहर इफिसूस सहर में केतेक बगरा सेवा मोर बर करीसे, ओला तंए बढ़िहां ले जानथस।