2 थिस्सलुनी 1 - Surgujia Bible

परेरीत पौलुस कर जोहार

¹ मंए परेरीत पौलुस, सीलास अऊ तीमुथियुस कर संगे थिस्सलुनीके सहर कर कलीसिया बर; ए चिट्ठी ला लिखत हवन। तुमन हमर दाऊ परमेस्वर अऊ परभू ईसू मसीह कर अपन लोग हवा।

² हमर दाऊ परमेस्वर अऊ परभू ईसू मसीह कती ले तुमन ला किरपा अऊ सांती मिलत रहे।

मसीह कर दुबारा आए घनी में मईनसे मन कर नियाओ

³ ए भाई बहिन मन, हमके मन ला हमेसा तुमन बर परमेस्वर कर धनबाद करे बर चाही अऊ एकस करे बर जरूरी हवे, काबरकि परभू ईसू मसीह में तुमन कर बिस्वास हर बड़हत जात हवे अऊ तुमन सबेच कर मया हर, एक दूसर बर बगरत जात हवे।

⁴ तेकर ले हमन, परमेस्वर कर कलीसिया मन में तुमन बर घमंड करथन, काबरकि सबेच सताव अऊ दुख तकलीफ ला सह के अऊ धीरज धएर के तुमन बिस्वास में बने रथा।

⁵ ए सब हर परमेस्वर कर सही नियाओ कर पका सबूत लागे कि तुमन परमेस्वर कर राएज कर लाएक बएन जावा, जेकर बर तुमन दुखोच ला सहत हवा।

⁶ फूरोंच में परमेस्वर कर देख में, ए नियाओ हवे कि जेमन तुमन ला दुख तकलीफ देथें, ओमन ला परमेस्वर हर पलटा में दुख तकलीफ देही।

⁷ अऊ जेमन अझेर दुख तकलीफ पावत हवा, ओमन ला परमेस्वर हर हमर संगे आराम देही अऊ एहर ओ घनी होही, जे घनी परभू ईसू धधकत आगी अऊ अपन बहंगर दूत मन कर संगे सरग ले उतरही।

⁸ जेमन परमेस्वर ला नई जानीन अऊ परभू ईसू कर सुघर खभेर ला नई मानीन, ओमन ला ओकर पलटा देही।

⁹ ओमन परभू ईसू कर आगू ले अऊ ओकर महिमा कर सक्ती ले दुरीहां होए के, अईसना बिनास कर दंड पाहीं जेहर कभों नई सिराही।

¹⁰ एहर ओ दिन होही, जे घनी परभू ईसू हर बिस्वास करोईया, अपन पबितर मईनसे मन जग ले महिमा पाए बर अऊ मरजाद पाए बर आही, एमे तुंहूच मन मेराए हवा, काबरकि तुमन हमर गवाही में बिस्वास करे हवा।

¹¹ हमरे हमेसा तुमन बर पराथना करथन कि हमर परमेस्वर हर तुमन ला ओ जिनगी कर लाएक समझे, जेला जीए बर तुमन ला बलाईस हवे अऊ तुमन कर सबेच भलाई कर इछा अऊ बिस्वास कर सब काम ला, अपन सक्ती कर जरिये पूरा करे।

¹² एही कस हमर परभू ईसू मसीह कर नांव हर तुमन कर जिनगी कर जरिये, माएन-मरजाद पाए अऊ तुंहू मन ईसू कर संगे जीए कर चलते माएन-मरजाद पावा। ए सब जाएत हर हमर परमेस्वर अऊ ईसू मसीह कर किरपा ले होही।