2 पतरस 1 - Surgujia Bible

परेरीत पतरस कर जोहार

¹ ए चिट्ठी ला मंए समोन पतरस, जेहर ईसू मसीह कर दास अऊ परेरीत लागों, मोर कती ले लिखल हवे। ए चिट्ठी ला ओमन कर नांव में लिखथों, जेमन हमर परमेस्वर अऊ उद्धार करोईया ईसू मसीह कर धरमीपन कर चलते, हमरेच कस किमती बिस्वास ला पाईन हवें।

² तुमन परमेस्वर अऊ हमर परभू ईसू मसीह ला अऊ ढेर जानत जावा, तेकर बर परमेस्वर कर किरपा अऊ सांती ढेरेच बगरा मिले।

परमेस्वर हर हमके सब जाएत देहिस हवे

³ अपन जिनगी अऊ परमेस्वर कर सेवा बरीक जे जाएत हमके चाही, ओ सब जाएत ला परमेस्वर हर, अपन सामर्थ कर जरिये हमके देहिस हवे। काबरकि हमरे ओके जानथी, जेहर अपन खुद कर महिमा अऊ भलाई कर चलते हमके बलाईस हवे।

⁴ एकर चलते ओहर हमके ला अपन ढेरेच महान अऊ किमती बात-जबान देहीस हवे, ताकि ओकर जरिये तुमन खुद परमेस्वर कर सुभाव कस होए जावा अऊ संसार कर ओ बुराई कर काम ले बांएच जावा, जेहर घिनक ईछा ले आथे।

⁵ एकरे चलते तुमन सब मधे कर कोसिस कएर के, अपन बिस्वास में भलाई अऊ भलाई में गियान,

⁶ अऊ गियान में संयम अऊ संयम में धीरज अऊ धीरज में भक्ति,

⁷ अऊ भक्ति में भाई-चारा कर दया अऊ भाई-चारा कर दया में मया बढ़ाते जावा।

⁸ काबरकि कहों ए गुन तुमन में रथे अऊ बढ़त जाथे, त तुमन ला हमर परभू ईसू मसीह कर पूरा गियान में निकम्मा अऊ हारे नई देही।

⁹ बकिन जेमन में ए गुन नईए, ओहर अंधा हवे, अऊ धुंधरा देखथे अऊ ओहर भुलाए गईस हे कि ओहर अपन आगू कर पाप ले धोवाए के सफा होए गईस हे।

¹⁰ एकरे चलते ए भाई-बहिन मन, अपन बलाए जाए अऊ चुनल जाए ला, पका करे बर अऊ बढियां ले उत्सुक रहा, काबरकि अगर तुमन एकस करीहा, त तुमन अपन बिस्वास ले कभों पाछू झईन घुंचीहा,

¹¹ अऊ एही कस हमर परभू अऊ उद्धार करोईया ईसू मसीह कर, अमरकाल कर राएज में तुमन कर आदर संगे जोरदार सवागत होही।

परमेस्वर कर वचन में धियान लगाईहा

¹² एकरे बर, मंए तुमन ला हमेसा ए गोएठ मन कर सुरता करुवात रहूं, फुरोंच में तुमन एमन ला जानथा अऊ ओ सत, जेहर तुमन के मिलीस हवे, ओमे तुमन बजर होए गए हवा।

¹³ मंए सोंचथों कि एहर मोर बर ठीक हवे कि जब तक मंए ए देंह कर डेरा में हवों, तब तक तुमन के एकर सूरता देवात रहूं।

¹⁴ काबरकि मंए एला जानथों कि मोर ए डेरा ला छोंड़े कर घरी हालू आए पहूंचिस हे, जेकस कि हमर परभू ईसू मसीह हर मोके बताईस हवे।

¹⁵ एकरे ले मंए ए बात कर कोसिस करहूं कि मोर ए संसार ले जाए कर पाछू, तुमन ए सब बात मन ला हमेसा सूरता करीहा।

¹⁶ जब हमरे तुमन ला, हमर परभू ईसू मसीह कर सामर्थ अऊ अवाई कर बारे में बताएन, त हमरे चतुराई ले गढ़ल कहनी मन कर नकल नई करेन, बलकि हमरे ईसू कर महिमा ला अपन आंखी ले देखे रहेन।

¹⁷ जब ओहर दाऊ परमेस्वर ले आदर अऊ महिमा पाईस, त ओ सबले बड़खा महिमा ले ए अवाज आईस, “एहर मोर दुलरुवा बेटा लागे, एकरले मंए ढेरेच खूस हवों।”

¹⁸ जब हमरे पबितर पहाड़ कर ऊपरे ओकर संगे रहेन, त हमरे खुद ए अवाज ला सुनेन, जेहर सरग ले आवत रहीस।

¹⁹ अऊ हमर जग अगमजानी मन कर बचन हवे, ए सब बात ले हमरे फुरोंच में जाएन गएन कि अगमजानी मन कर बचन हर ठीक हवे। तुमन एकर ऊपर धियान देके बढ़ियां करथा। काबरकि एहर एगोट ढेबरी कस हवे, जेहर एगोट अंधार जघा में चमकत हवे अऊ एहर तब तक चमकथे, जब तक कि दिन नई होए जाए अऊ तुमन कर हिरदय में बिहान कर तरईया नई निकेल आए।

²⁰ बकिन सबले आगू, तुमन ए बात ला जरूर जाएन लेआ कि पबितर किताब में बतावल अगमबानी हर, कोनो अगमजानी कर अपन खुद कर बिचार ले नई आईस हवे।

²¹ काबरकि कोनो अगमबानी हर, मईनसे मन कर ईछा ले कभों नई होईस, बकिन मईनसे मन पबितर आत्मा कर अगुवाई ले, परमेस्वर कर कती बोलत रहीन।