2 यूहन्ना 1 - Surgujia Bible

जोहार

¹ मंए यूहन्ना कलीसिया कर अगुवा लागों, मंए ए चिट्ठी ला परमेस्वर कर चुनल सवांगीन अऊ ओकर लईका मन बर लिखत हवों। ओमन ला मंए सचा मया करथों, सिरीप मंहीच नहीं, बलकि ओ सबेच झन मया करथें, जेमन सत ला जानथें।

² हमरे तुमन जग मया करथी, काबरकि सत हर हमर में रथे अऊ हमर संगे जुग-जुग ले बनल रही।

³ दाऊ परमेस्वर कती ले किरपा, दया अऊ सांती हमर संगे बनल रही, अऊ ओकर बेटा ईसू मसीह कती ले भी सत अऊ मया हमर संगे बने रही।

सत अऊ मया में चलिहा

⁴ मंए ए जाएन के ढेरेच आनंद मनावत हों कि जेकस दाऊ परमेस्वर हर हमके अगींया देहीस हवे, ओकर अनुसार तोर तनिक लईका मन सत में चलत हवें।

⁵ ए मयारू सवांगीन, मंए तोके कोनो नांवा अगियां नई लिखत हों, बकिन ओहीच अगींया ला लिखत हों, जेहर हमके सुरू में मिले रहीस। मंए तोर जग बिनती करत हों कि हमरे एक दूसर ले मया करी।

⁶ मया कर मतलब ए हवे कि हमरे परमेस्वर कर अगींया कर अनुसार चली। एही अगींया ला तंए सुरू में सुने रहे। एकरे अनुसार तोके मया कर संगे जिनगी जीए बर चाही।

⁷ काबरकि ढेरे झन धोखा देवईया मन ए संसार में आईन हवें। ओमन एला नई मानें कि ईसू मसीह मईनसे कर देंह धएर के आईस। अईसना मईनसे मन दूसर झेमन ला धोखा देथें, अऊ मसीह कर बिरोध करथें।

⁸ अपन बारे में सवाचेती रहा, हमरे जेकर बरीक मेहनत करे हन, ओला तुमन झईन गंवईहा, बलकि तुमन के ओकर पूरा फल मिले।

⁹ जे कोनो हर मसीह कर उपदेस ले भटेक जाथे अऊ ओमें बने नई रहे, त ओकर जग परमेस्वर नईए; अऊ जे कोनो हर ओकर उपदेस में बने रथे, ओकर जग दाऊ परमेस्वर अऊ ओकर बेटा दुनो हवे।

¹⁰ कहों कोनो हर तुमन जग आथे अऊ ए सिक्छा नई दे, त ओके अपन घरे आए झईन देईहा, अऊ ओकर सवागत झईन करीहा।

¹¹ काबरकि जे कोनो हर अईसना मईनसे कर सवागत करथे, ओहर ओकर बुरा काम मन में सझियारा होथे।

आखरी जोहार

¹² मोर जग तुमन ला लिखे बर ढेरेच अकन बात हवे, बकिन मंए कागज अऊ सियाही में लिखे बर नई चाहथों। मोके आसा हवे कि मंए तुमन जग आहूं अऊ तुमन संगे बईठ के गोएठ-बात करहूं, ताकि हमर आनंद हर पूरा होए जाही।

¹³ परमेस्वर कर द्वारा चुनल तोर बहिन कर लईका मन तोके जोहार करत हवें।