2 कुरिन्थी 1 - Surgujia Bible

जोहार

¹ मंए पौलुस, जेहर परमेस्वर कर ईछा ले ईसू मसीह कर परेरीत बने हवों अऊ हमर भाई तीमुथियुस कर संगे, ए चिट्ठी ला लिखत हवन। ए चिट्ठी ला परमेस्वर कर कलीसिया बरिक जेहर कुरिन्थ सहर में हवे अऊ परमेस्वर कर सब मईनसे मन, जेमन आखया इलाका में हवें ओमनोच बर लिखत हवन;

² हमर दाऊ परमेस्वर अऊ परभू ईसू मसीह कती ले, तुमन के किरपा अऊ सांती मिलत रहे।

सांती देवईया परमेस्वर कर धनबाद

³ हमर परभू ईसू मसीह कर दाऊ परमेस्वर कर धनबाद होए, जेहर ढेरेच दयालु दाऊ अऊ सब मधे ले सांती देवईया परमेस्वर लागे।

⁴ ओहर हमके ला सब दुख तकलीफ में दिलासा देथे, ताकि ए दिलासा कर चलते, जेहर परमेस्वर जग ले हमके ला मिलथे, ओमन ला भी दिलासा दे सकी, जेमन कईयो मधे कर तकलीफ में परीन हवें।

⁵ हमरे मसीह कर दुख में केतना भागीदार होथी, ओकरे अनुसार परमेस्वर हर, मसीह कर जरिए हमर उपरे दिलासा देते रही।

⁶ अगर हमरे दुख सहथी, त एहर तुमन कर दिलासा अऊ उद्धार बरीक हवे अऊ अगर हमके दिलासा मिलथे, त एहर तुमन कर दिलासा बरीक हवे, ताकि तुमन ओ दुख ला धीरज धएर के सहे सखिहा, जेला हमू मन सहथी।

⁷ हमर आसा हर तुमन कर बारे में बजर हवे, काबरकि हमरे जानथी कि जेकस तुमन हमर दुख-तकलीफ में भागीदार हवा, वईसने तुमन हमर दिलासोच में भागीदार हवा।

⁸ ए भाई-बहिन मन, हमन चाहथी कि तुमन हमर ओ दुख कर बारे में जरूर जानिहा, जेहर हमर ऊपरे एसिया परदेस में पड़े रहीस, ओहर ढेरेच बड़खा अऊ हमर सहे ले बाहरी होए गए रहीस अऊ हमरे जीए कर असरो ला छोएड़ देहे रहेन।

⁹ फुरोंच में हमरे एकस समझत रहेन कि हमर मिरतु कर सजा होए चुकीसे, बकिन एहर एकरले होईस, ताकि हमरे अपन ऊपर भरोसा नई राखी, बलकि ओ परमेस्वर कर ऊपरे भरोसा राखी, जेहर मरल मन ला फेर जियाथे।

¹⁰ ओहर हमके ला अईसन बड़खा मिरतु कर संकट ले बचाईस अऊ ओहर हमके ला आगूओच बचाही अऊ ओकर ऊपरे हमर भरोसा हवे कि ओहर अवईया दिनोच में हमके ला बचाही।

¹¹ तुमन पराथना कर द्वारा हमर मदेत करे। परमेस्वर हर अपन किरपा ले, ढेरेच झन कर पराथना ला सुईन के हमर मदेत करीस हवे, एकर बर ढेरे झेमन हमर कती ले परमेस्वर ला धनबाद देहीं।

पौलुस कर यातरा कर योजना में बदलाव

¹² काबरकि हमरे पूरा बिस्वास अऊ बिवेक कर संगे ए गवाही ला दे सकथी कि संसार में अऊ खास कएर के तुमन कर मझार में, हमर चाल-चलन हर परमेस्वर कर फभऊ, पबितरता अऊ सचाई कर संगे रहीस, अईसना हमरे संसारिक बुद्धि ले नई करे हवन, बलकि परमेस्वर कर किरपा ले करे हवन।

¹³ हमरे तुमन ला अईसना कांही नई लिखन, जेला तुमन पढ़े चाहे समझे नई सखिहा,

¹⁴ अऊ हमके ला भरोसा हवे कि तुमन हमके ला अझेर पूरा-पूरा नई समझथा, आखरी में पूरा तरह ले हमके ला समेझ जईहा, एही कस हमरे तुमन कर चलते ढेरेच खुस होथी, ओईसनेच तहूंच मन परभू ईसू कर दिन, हमर चलते ढेरेच खुस होए जईहा।

¹⁵ एही भरोसा ले मंए चाहत रहें कि आगू तुमन जग आहूं, ताकि तुमन दुई दाएर हमर जग भेंटाए सखिहा।

¹⁶ मोर ए योजना रहीस कि तुमन कर मदेत ले मकिदुनिया सहर में जाहूं, ओही घरी तुमन जग आहूं अऊ मकिदुनिया ले फिरोच घनी तुमन जग फेर आओं, एकर पाछू तुमन मोके ला एहूदिया कती जाए बर मदेत करीहा।

¹⁷ जब मंए ए योजना ला बनाएं, त सोंएच समेझ के नई बनाएं रहें का? का मंए अपन योजना ला संसारिक ढंग ले बनाएं कि एकेच घरी ‘हां, हां’ कहूं, अऊ ‘नहीं, नहीं’ भी कहूं?

¹⁸ जेकस परमेस्वर हर फुरोंच में बिस्वास कर लाएक हवे, ओही कस तुमन बर हमर खभेर हर, ‘हां’ अऊ ‘नहीं’ दूनों ना हवे।

¹⁹ काबरकि परमेस्वर कर बेटा ईसू मसीह, जेकर परचार मंए अऊ सिलवानुस अऊ तीमुथियुस तुमन कर मझार में करेन ओमे कभों ‘हां’ अऊ कभों ‘नहीं’ जईसन बात नई रहीस, बकिन ओमे सिरीप ‘हां’ ही ‘हां’ हवे।

²⁰ काबरकि परमेस्वर कर सब बात जबान हर, मसीह में ‘हां’ ही हवे। एकरले हमरे परमेस्वर कर महिमा बरिक मसीह कर द्वारा ‘आमीन’ कथी।

²¹ एहर परमेस्वर लागे, जेहर हमके अऊ तुमन के मसीह में बजर बनाए के राखथे अऊ एही हर हमर अभिसेक करीस हवे।

²² परमेस्वर हर हमर ऊपरे मालिकाना हक कर मोहर लगाईसे अऊ बयाना कर रुप में अपन आत्मा ला हमर हिरदय में देहिसे।

²³ मंए तुमन ला दुख देहे बर नई चाहत रहें, एकरले मंए अझेर ले कुरिन्थ सहर में नई आएं, ए बात बर परमेस्वर हर गवाह हवे।

²⁴ एकस बात नईए कि हमरे तुमन कर बिस्वास ऊपरे हक जताए बर चाहथी, बकिन तुमन कर आनंद बरीक हमरे ढेरेच मेहनत करथी, काबरकि बिस्वास कर द्वारा ही तुमन बजर बने रथा।