1 तीमुथियुस 1 - Surgujia Bible

परेरीत पौलुस कर जोहार

¹ मंए पौलुस, हमर उद्धार करोईया परमेस्वर अऊ हमर पकका असरा देवईया ईसू मसीह कर अगियां ले ईसू मसीह कर परेरीत बने हों।

² ए तीमुथियुस, तोके मंए ए चिट्ठी ला लिखत हों, तंए फूरोंच में मोर बेटा कस हवस, काबरकि मंए तोके बिस्वास में लाने हों। मंए बिनती करत हों कि दाऊ परमेस्वर अऊ हमर परभू ईसू मसीह कती ले तोके ला किरपा, दया अऊ सांती मिलत रहे।

झूठा सिक्छा कर बिरोध में चेतावनी

³ मंए मकिदुनिया इलाका जात घनी तोके ला इफिसूस सहर में रहे बर बिनती करे रहें। काबरकि तंए उहां जाए के ओजग कर गलत सिक्छा देवईया मन ला मना कएर दे।

⁴ अऊ ओमन ला चेताए दे कि ओमन कहनी-किसा अऊ पीढ़ी-पीढ़ी कर पूरखानी बात में मन झईन लगाएं। काबरकि ओमे बेकार कर बंहसा-बंहसी होथे। एकस कएर के परमेस्वर कर उद्धार कर उपाय ला पाए बर नई सकें, काबरकि एहर सिरीप बिस्वास कर जरिये मिलथे।

⁵ बकिन हमर सिक्छा कर मतलब एकस हवे कि मईनसे मन अपन मझार में एक दूसर ले मया करें, जेहर सफा हिरदय अऊ बढ़िहां सोंच अऊ बिगर कपट कर बिस्वास ले उभरथे।

⁶ ए बात मन ला छोंएड़ के, थोरोक झन मन बेकार कर बात में भुलाए गईन हवें।

⁷ ओमन परमेस्वर कर कानहूंन कर सीखोईया तो बने बर चाहथें, बकिन जे बात ला ओमन कथें अऊ जोर देके गोठियाथें, ओला ओमन समझबों नई करें।

⁸ बकिन हमरे जानथी कि अगर कोनो मईनसे हर परमेस्वर कर कानहूंन ला ठीक रीती ले काम में लानही, त ओहर बढ़िहां हवे।

⁹ हमरे एहू ला जानथन कि ए कानहूंन हर परमेस्वर कर देख में सुघर जिनगी जीवईया मन बर ना लागे, बलकि एहर कानहूंन कर टोरोईया, मनमानी करोईया, जेमन भक्ति नई करें, पापी, अपबितर अऊ अधरमी, दाई-दाऊ कर जीव लेवईया, जनमरवा,

¹⁰ एक झन ले बगरा घरदारीन चाहे घरदार रखोईया, पुरुसगामी करोईया, मईनसे मन ला गुलाम बने बर बेंचोईया, ठगलबरा, झूठा किरिया खवईया अऊ खर-खर उपदेस कर बिरोध करोईया मन बर लागे।

¹¹ ए खर-खर उपदेस हर सुघर खभेर कर अनुसार हवे, जेहर परमेस्वर कर महिमा ला परगट करथे, जेला धन्य परमेस्वर हर मोके सोंपीसे।

परेरीत पौलुस बरीक परभू कर किरपा

¹² मोके बल देवईया परभू ईसू मसीह कर मंए धनबाद करथों। काबरकि मोके बिस्वास लाएक समझ के, ओहर अपन सेवा बरीक ठहराईसे।

¹³ मंए तो पहिले ओकर निंदा करत रहें, ओकर लोग मन ला सतावत रहें अऊ कसरीहा रहें, तबोले ओकर दया मोर ऊपर होईस, काबरकि ओ घनी मंए बिस्वास नई करत रहें, तेकर ले मंए बिगर जाने समझे ए काम ला करत रहें।

¹⁴ हमर परभू कर किरपा हर, ढेरेच अकन मोके मिलीस हे। ओकर उपरे बिस्वास करे बर अऊ मया करे बर मसीह ईसू हर मोके मदेत करीस, काबरकि ओकर संगे मोर बढ़िहां रिस्ता हवे।

¹⁵ ए गोएठ हर सचा अऊ सब कती ले माने लाएक हवे कि ईसू मसीह पापी मन कर उद्धार करे बर संसार में आईस हे, जेमन में ले सबले बड़खा पापी मंए लागों।

¹⁶ बकिन मोर ऊपर एकर बर दया करीस कि मंए जेहर सबले बड़खा पापी लागों, ईसू मसीह हर अपन पूरा सहनसीलता मोर में देखाईस। तेमेकि जेमन अमर जिनगी पाए बर, ओकर ऊपर बिस्वास करहीं, ओमन बर मंए एगोट नमूना बनो।

¹⁷ अब हमेसा कर राजा जेहर कभों नई मरही, जेहर नई दिखे, जेहर सिरीप एकेच ठन परमेस्वर लागे, ओकर आदर अऊ महिमा जुग-जुग होवत रहे। आमीन।

¹⁸ ए मोर बेटा तीमुथियुस, जे अगमबानी हर आगूवेच ले तोर बारे में करल गए रहीस, ओकरे अनुसार मंए तोके अगींया देहत हों कि तंए ओला काम में लाएन के, बिस्वास अऊ सही सोंच में बने रहिके, एगोट बढ़िहां योद्धा कस जिनगी जीयत रह।

¹⁹ बकिन केतनो झेमन एला नई मानीन, तेकर ले ओमन कर बिस्वास हर पूरा टुईट गईस।

²⁰ ओमन में ले हुमिनयुस अऊ सिकंदर हवें, जेमन ला मंए सैतान कर हाथ में सोंएप देहे हों, तेमेकि ओमन परमेस्वर कर निंदा करे बर झईन सीखें।