1 थिस्सलुनी 1 - Surgujia Bible

परेरीत पौलुस कर जोहार

¹ मंए परेरीत पौलुस, सीलास अऊ तीमुथियुस कर संगे थिस्सलुनीके सहर कर कलीसिया बर ए चिट्ठी ला लिखत हन। तुमन हमर दाऊ परमेस्वर अऊ परभू ईसू मसीह कर अपन लोग हवा। तुमन ला किरपा अऊ सांती मिलत रहे।

थिस्सलुनीके मन कर बिस्वास

² हमरे पराथना में तुमन के सुरता करथन अऊ तुमन सबेच झन बर सगर दिन परमेस्वर ला धनबाद देथन।

³ जे-जे काम ला तुमन दाऊ परमेस्वर में बिस्वास अऊ दूसर कर ऊपरे, मया करे कर चलते करत हवा अऊ हमर परभू ईसू मसीह कर अवाई कर असरा में धीरज धरे हवा, ए बात मन ला हमरे सबेच घनी सुरता करथी।

⁴ ए परमेस्वर कर दुलरुवा भाई-बहिन मन, हमरे जानथी कि परमेस्वर हर तुमन ला चुनीस हवे।

⁵ काबरकि जे सुघर खभेर ला हमरे परचार करेन, ओहर तुमन जग सिरीप गोएठ में नहीं, बकिन सामर्थ अऊ पबितर आत्मा अऊ पका भरोसा कर संगे पहुंचीस हे। तुमन एहू ला जानथा कि हमरे तुमन कर भलाई बर तुमन कर मझारे कईसे रहे लागेन।

⁶ तुमन ढेरेच दुख सहेहा, तबो ले पबितर आत्मा कर आनंद कर संगे बचन ला मानेहा। तुमन हमर अऊ परभू कस चाल चले लागे हवा।

⁷ एकरले तुमन मकिदुनिया अऊ आखया इलाका कर सब बिस्वासी मन बर एगोट नमूना बएन गए हवा।

⁸ तुमन जग ले परभू कर बचन हर, सिरीप मकिदुनिया अऊ आखया इलाका में सूनाल नई गईस, बलकि परमेस्वर कर ऊपर तुमन कर बिस्वास कर खभेर ला, सबेच जघा में जाएन गईन हवें, तेकर ले हमके ला कांही गोठियाए कर कोनोच जरूरत नईए।

⁹ काबरकि सबेच जघा कर मईनसे मन खुद तुमन कर बारे में बताथें कि तुमन कईसना हमर सवागत करे हा अऊ तुमन मूरती कर पूजा ला छोंएड़ के परभू कती फिरे हा, तेमेकि जीयत अऊ सचा परमेस्वर कर सेवा करा।

¹⁰ अऊ तुमन ओकर बेटा ईसू ला, सरग ले आए कर डगर देखत रहा। परमेस्वर हर ओके ला मरल में ले जीयाईस हवे। ओही ईसू हर हमके ला परमेस्वर कर अवईया बड़खा गुसा ले बचाही।