1 पतरस 1 - Surgujia Bible

जोहार

¹ ए चिट्ठी ला मंए पतरस, जेहर ईसू मसीह कर परेरीत लागों; मोर कती ले परमेस्वर कर चुनल, ओ अनगंईहा मन कर नांव में लिखत हों, जेमन पुंतुस, गलातिया, कपदुकिया, एसिया अऊ बिथुनिया, ए सब जिला मन में इते-ऊते होए गईन हवें।

² तुमन के दाऊ परमेस्वर हर आगू ले जानत रहीस अऊ ओकर आत्मा हर चुनीस, तेकर ले तुमन ईसू मसीह कर हुकूम ला मानथा अऊ तुमन ओकर लहू कर छिंटे ले, पबितर करल गए हवा। तुमन के ढेरेच बगरा किरपा अऊ सांती मिलत रहे।

अमर जिनगी कर असरा

³ हमर परभू ईसू मसीह कर दाऊ, परमेस्वर कर इस्तुती होए, जेहर ईसू मसीह ला मरल में ले जीयाए कर द्वारा, अपन बड़खा दया ले हमके ला नांवा जनम अऊ जीयत आसा देहिस हवे।

⁴ परमेस्वर हर तुमन बर वारिस कर हक सरग में राखीस हवे, जेहर कभों नास नई होए, खराब नई होए अऊ मुरझाबो नई करे।

⁵ तुमन कर बिस्वास कर चलते, परमेस्वर कर सामर्थ ले ओ उद्धार बरीक, तुमन के समहाएर के राखीस हवे अऊ ओ उद्धार हर आखरी घरी में परगट होए बर तियार हवे।

⁶ एमें तुमन ढेरेच आनंद मनावा, भले ही अब तनीक जुआर बर तुमन के कईयो मधे कर परीछा कर चलते, दुख सहे बर परत हवे।

⁷ एहर एकर बर होईस कि तुमन कर बिस्वास कर असली परख होए सके। तुमन कर ए बिस्वास हर, ओ सोना, जेहर आगी में परखे जाए कर पाछूवोच नास होए जाथे, ओकरो ले बगरा किमती हवे अऊ जब ईसू मसीह हर परगट होही, त तुमन कर ए बिस्वास कर परख कर चलते, तुमन बर इस्तुती, बड़ाई अऊ आदर कर कारन ठहरही।

⁸ तुमन तो ओके नई देखेहा, तबोले तुमन ओके मया करथा, तुमन ओके अझेर नई देखत हा, तबोले ओकर उपरे बिस्वास करथा अऊ आनंद मनावत हा, जेकर बखान करे बर नई सकाए, जेहर महिमा ले भरल हवे,

⁹ काबरकि तुमन अपन आत्मा कर उद्धार पावत हा, जेहर तुमन कर बिस्वास कर फल लागे।

¹⁰ एही उद्धार कर बारे में ओ अगमजानी मन, ढेरेच खोजीन अऊ सवांचेती होए के पता लगाईन अऊ ओमन ओ उद्धार कर बारे में जेहर किरपा ले तुमन जग अवईया रहीस, ओकर अगमबानी करे रहीन।

¹¹ मसीह हर कईसे दुख उठाही अऊ ओकर पाछू, जे महिमा ओके मिलही ओकर बारे में, मसीह कर आत्मा, जेहर ओमन में हवे, आगूवेच ले इसारा करत रहीस। एकरले ओमन ओ समय अऊ हालत ला जाने कर कोसिस करत रहीन।

¹² ओमन ऊपरे एला परगट करीस कि ओमन कर परचार हर खुद अपन बर नई रहीस, बकिन ओहर तुमन बर रहीस। अझेर तो तुमन ए सुघर खभेर ला ओमन जग ले सुने हा, जेमन सरग ले भेजल पबितर आत्मा कर द्वारा, परचार करीन अऊ सरगदूत मन ए बात मन ला देखे कर ईछा करथें।

पबितर बना

¹³ एकरे ले अपन-अपन मन ला, तियार करा अऊ अपन जीव ला मड़हाए के रहा अऊ ओ किरपा कर ऊपरे पूरा आसा राखा, जेहर तुमन के ईसू मसीह कर परगट होए कर घरी देहल जाही।

¹⁴ परमेस्वर कर अगियां ला मनोईया मन कस जियत रहा अऊ जब तुमन बिना गियान कर रहत रहा, ओ घरी कर खराब ईछा कर अनुसार अपन-आप ला अब झईन बनावा।

¹⁵ बकिन जेहर तुमन के बलाईस हवे ओहर पबितर हवे, ओही कस तुंहूच मन अपन सबेच काम में पबितर बना।

¹⁶ काबरकि परमेस्वर कर किताब में ए लिखल हवे: “पबितर बना, काबरकि मंए पबितर हवों।”

¹⁷ कहों तुमन, “ए दाऊ” कहिके ओकर जग पराथना करथा, जेहर बिगर मूंह देखी करे सबेच मईनसे कर काम कर अनुसार नियाओ करथे, त तुमन इहां अपन अनगंईहा होए कर समय ला भय में बितावा।

¹⁸ काबरकि तुमन जानथा कि तुमन कर बेकार चाल-सहूर, जेहर तुमन कर पूरखा मन ले चलत आथे, ओकर ले तुमन कर उद्धार, सोना या चांदी नियर नास होवईया चीज कर द्वारा नई होईस हे,

¹⁹ बकिन तुमन कर जिनगी कर उद्धार एगोट निरदोस अऊ बिगर कसूर कर भेंड़ी छउवा, मनेकि मसीह कर किमती लहू कर द्वारा होईस हे।

²⁰ ओहर संसार कर सिरजे कर पहिले ले चुनल गए रहीस, बकिन तुमन बरीक ए आखरी घरी में परगट होईस।

²¹ तुमन ओकर जरिये, ओ परमेस्वर कर ऊपरे बिस्वास करथा, जेहर ओके मरल में ले जीयाईस अऊ ओकर महिमा करीस, एकरे ले तुमन कर बिस्वास अऊ असरा परमेस्वर कर ऊपरे हवे।

²² अब सत ला माने कर चलते, तुमन अपन-आप ला सुद्ध करे हवा, एकर चांडहे तुमन में अपन भाई मन बर बिगर कपट कर मया हवे, त अपन पूरा हिरदय ले एक दूसर ला ढेरेच बगरा मया करा।

²³ काबरकि तुमन नास होवईया बिहन ले नहीं, बकिन नास नई होए, ओ बिहन ले परमेस्वर कर जीयत अऊ हमेसा ठहरोईया बचन कर द्वारा नांवा जनम पाए हवा।

²⁴ काबरकि सबेच मईनसे मन, घांस नियर हवें अऊ ओमन कर सबेच महिमा हर, घांस कर फूल नियर हवे। घांस हर झुराए जाथे अऊ फूल हर झएर जाथे।

²⁵ बकिन परभू कर बचन हर हमेसा बने रथे अऊ एहर ओही सुघर खभेर कर बचन लागे, जेहर तुमन के सुनाल गईस हवे।