1 यूहन्ना 1 - Surgujia Bible

बचन हर जिनगी देथे

¹ संसार कर सिरजे कर आगू ले जिनगी देवईया बचन हर रहीस, ओला हमरे सुने हन अऊ अपन आंएख मन ले देखे हन अऊ हमरे ढेरेच धियान लगाए के देखे हन अऊ अपन हाथ ले छूए हन। ओ बचन कर बारे में हमरे तुमन के बतावत हन।

² जेहर जिनगी देथे, ओहर परगट होईस अऊ हमरे ओला देखे हन, अऊ ओकर गवाही देथन अऊ तुमन के ओ अमर जिनगी कर बारे में बतावत हन। ओहर दाऊ परमेस्वर कर संगे रहीस अऊ हमर ऊपरे परगट होईस।

³ जेला हमरे देखे हन अऊ सुने हन। अब ओकर बारे में हमरे तुमन के उपदेस देहत हन, ताकि तुहूंच मन ला हमर संगे संगती मिले। हमर ए संगती हर दाऊ परमेस्वर कर संगे अऊ ओकर बेटा ईसू मसीह कर संगे हवे।

⁴ ए बात मन ला हमरे एकर बर लिखत हन कि हमर आनंद हर पूरा होए जाए।

परमेस्वर कर इंजोर में चला

⁵ ओ खभेर, जेला हमरे ओकर बेटा ईसू मसीह ठन ले सुने हन अऊ तुमन के सुनात हन, ओहर ए लागे कि परमेस्वर इंजोर हवे अऊ ओमें तनिकोच अंधार नईए।

⁶ कहों हमरे ए कहबो कि हमर संगती ओकर संगे हवे अऊ हमरे अंधार में चलथन, त हमरे झूठ बोलथन अऊ सच कर अनुसार नई चलन।

⁷ बकिन कहों हमरे इंजोर में चलथन, जेकस परमेस्वर हर खुद इंजोर में हवे, त हमर संगती एक दूसर कर संगे हवे अऊ ओकर बेटा ईसू कर लहू, हमके सब पाप ले सुद्ध करथे।

⁸ अगर हमरे कथी कि हमर में कांहीच पाप नईए, त हमरे अपन आप ला धोखा देथी अऊ हमर में सचाई नईए।

⁹ अगर हमरे अपन पाप मन ला माएन लेबो, त परमेस्वर हर हमर पाप मन ला छमा करही अऊ हमके ला सबेच बुराई ले सुद्ध करही, काबरकि ओहर बिस्वास कर लाएक अऊ धरमी हवे।

¹⁰ अगर हमरे कथी कि हमरे कोनो पाप नई करे हन, त हमरे ओके झूठा ठहराथी अऊ ओकर बचन हर हमर में नईए।