1 कुरिन्थी 1 - Surgujia Bible

जोहार

¹ मंए पौलुस जेहर परमेस्वर कर ईछा ले, ईसू मसीह कर परेरीत होए बर ठहराल गए हों अऊ हमर भाई सोसथिनेस कर संगे ए चिट्ठी ला लिखत हों।

² मंए ए चिट्ठी ला कुरिन्थ सहर कर परमेस्वर कर कलीसिया बर लिखत हों, जेमन ला परमेस्वर हर ईसू मसीह कर जरिए पबितर करीसे। ओ पबितर करल मईनसे मन सब जघा, हमर परभू ईसू मसीह कर नांव लेवईया मन कर संगे, परमेस्वर कर अपन होए बर बलावल गईन हवें। परभू ईसू मसीह हमर अऊ ओमन कर परभू लागे।

³ हमर दाऊ परमेस्वर अऊ हमर परभू ईसू मसीह कती ले तुमन ला किरपा अऊ सांती मिलत रहे।

पौलुस हर परमेस्वर कर धनबाद करथे

⁴ मंए तुमन बर हमेसा अपन परमेस्वर कर धनबाद करथों, काबरकि ईसू मसीह कर जरिए तुमन ला परमेस्वर कर किरपा देहल गईस हवे।

⁵ ईसू मसीह कर जरिए परमेस्वर हर तुमन ला हर एक बात में, मनेकि गोठियाए में अऊ हर एक गियान में धनी करीसे।

⁶ मसीह कर बारे में हमरे जे गवाही देहे हन, ओहर तुमन कर मझार में पका होए गईसे।

⁷ एकरे चलते जब तुमन हमर परभू ईसू मसीह कर परगट होए कर बाट जोहत हा, त तुमन में कोनो आत्मिक बरदान कर घटी नईए।

⁸ ओहर तुमन ला आखरी तक बिस्वास में बजर बनाए के राखही, ताकि तुमन हमर परभू ईसू मसीह कर दिन में बेकसूर ठहरिहा।

⁹ परमेस्वर हर बिस्वास कर लाएक हवे, अऊ ओहर तुमन ला अपन बेटा हमर परभू ईसू मसीह कर हिसेदार होए बर बलाईस हवे।

गुटबाजी करे बर छोड़ा

¹⁰ ए भाई-बहिन मन, मंए तुमन ठे हमर परभू ईसू मसीह कर नांव में बिनती करत हों, कि तुमन जमो झन एक दूसर कर बात में सहमती रखा, ताकि तुमन कर मझार में फूट झईन पड़े, बकिन तुमन एक मन अऊ एक बिचार कर संगे आपस में मिले रहा।

¹¹ काबरकि ए मोर भाई-बहिन मन, खलोए कर परिवार कर तनीक झेमन मोके बताईन हवें, कि तुमन कर मझार में झगरा होवथे।

¹² मोर कहे कर मतलब ए हवे, कि तुमन में ले कोई ए कथे, “मंए पौलुस कर चेला लागों,” त कोई कथे, “मंए अपुलोस कर चेला लागों,” त कोई कथे, “मंए पतरस कर चेला लागों,” अऊ कोई कथे, “मंए मसीह कर चेला लागों।”

¹³ का मसीह हर बंटाए गईसे? का पौलुस हर तुमन बर कुरूस में मरीस? का तुमन पौलुस कर नांव में बतिस्मा लेहे हा?

¹⁴ मंए परमेस्वर कर धनबाद करत हों कि, किरिस्पुस अऊ गयुस भाई मन कर छोंएड़ मंए तुमन में ले कोनोच के बतिस्मा नई देहे हों।

¹⁵ तेकर ले कोई ए नई कह सके कि तुमन मोर नांव में बतिस्मा लेहे हवा।

¹⁶ (अऊ हां, मंए इस्तिफनुस भाई कर परिवारोच ला बतिस्मा देहे हों, एकर छोंड़ मोके सुरता नईये कि मंए अऊ कोई के बतिस्मा देहे हों)।

¹⁷ काबरकि मसीह हर मोके बतिस्मा देहे बर नहीं, बलकि सुघर खभेर कर परचार करे बर भेजीस हवे, अऊ ए सुघर खभेर कर परचार, मंए चतुराई कर बात बताए के नई करें, ताकि मसीह कर कुरूस कर सक्ति हर अनभनिया झईन होए जाए।

मसीह हर परमेस्वर कर गियान अऊ सामर्थ लागे

¹⁸ काबरकि नास होवईया मन बर कुरूस कर खभेर हर मूरखता बात लागे, बकिन हम उद्धार पवईया मन बर एहर परमेस्वर कर सामर्थ लागे।

¹⁹ काबरकि पबितर किताब में लिखल हवे परमेस्वर हर कथे, “मंए गियानी मन कर गियान ला नास करहूं, अऊ होसियार मन कर होसियारी ला मंए बेकार कएर देहूं।”

²⁰ कहां हवें गियानी मन? कहां हवें मुसा कर कानहूंन कर जानकार मन? अऊ ए संसार कर बाद बिवाद करोईया मन कहां हवें? का परमेस्वर हर संसार कर गियान ला मुरुख नई ठहराईस हवे?

²¹ काबरकि परमेस्वर कर गियान कर अनुसार, ए बात हर सही हवे कि मईनसे हर अपन गियान कर द्वारा परमेस्वर ला नई जानीस, त परमेस्वर ला एहर बढ़ीहन लागीस कि हमर ए परचार कर मुर्खता कर द्वारा, बिस्वास करोईया मन ला उद्धार दे।

²² यहूदी मन तो चिन्ह चमत्कार कर मांग करथें, अऊ गैर यहूदी मन गियान कर खोज में रथें।

²³ बकिन हमरे तो मसीह कर परचार करथी, जेहर कुरूस में चघाल गए रहीस, एहर एक अईसना उपदेस लागे, जेहर यहूदी मन ला ठोकर कर कारन अऊ गैर यहूदी मन बर मुर्खता लागे।

²⁴ बकिन जेमन ला परमेस्वर हर बलाईसे, चाहे ओमन यहूदी होएं चाहे गैर यहूदी, ओमन बर मसीह हर परमेस्वर कर सामर्थ अऊ परमेस्वर कर गियान लागे।

²⁵ काबरकि परमेस्वर कर मुरखता हर मईनसे मन कर गियान ले ढेर बूईधमान हवे, अऊ परमेस्वर कर कमजोरी हर मईनसे मन कर बल ले ढेर बलवान हवे।

²⁶ ए भाई-बहिन मन, जब परमेस्वर हर तुमन ला बलाईस, ओ घरी कर हालत कर बारे में सोंचा। ओ समय तुमन में ले ढेरे झेमन, मईनसे मन कर नजर में बूईधमान नई रहीन, अऊ ढेरे बलवान नई रहीन, अऊ ढेरे झेमन ऊंच घराना कर नई रहीन।

²⁷ बकिन परमेस्वर हर संसार कर मुरुख मन ला चुईन लेहीस, ताकि गियानी मईनसे मन ला लज्जित करे, अऊ परमेस्वर हर संसार कर कमजोर मन ला चुईन लेहीस, ताकि बलवान मन ला लज्जित करे।

²⁸ अऊ परमेस्वर हर ओमन ला चुनीस, जेमन संसार कर मईनसे मन कर नजर में नीच, तुछ, अऊ बिगर काम कर हवें, ताकि ओहर ओमन ला बेकार ठहराए जेमन ला मईनसे मन ढेर खास समझथें।

²⁹ ताकि कोनो मईनसे हर परमेस्वर कर आगू में घमंड झईन करे।

³⁰ परमेस्वर हर तुमन ला मसीह ईसू में जोड़ देहीस, अऊ परमेस्वर हर मसीह ला हमर गियान बनाए देहिस, मसीह हर हमके परमेस्वर कर नजर में बेकसूर अऊ पबितर ठहराए देहीस अऊ ओहर हमके पाप ले अजाद भी कर देहीस।

³¹ जेकस कि पबितर किताब में लिखल हवे, “अगर कोई घमंड करथे, त परभू हर जे काम करीस हवे, ओकर ऊपरे घमंड करे।”