Tito 3 - Samoan Contemporary New Testament

O le Amio Kerisiano

¹ ‘Ia e fa‘amanatu ia i latou ia latou usiusita‘i i ali‘i sili ma faipule, ia usiusita‘i, ia nofo sauni mo galuega lelei uma lava,

² ‘aua ne‘i ‘upuleaga i so o se isi, ‘aua ne‘i fa‘amisa, a ‘ia agamalū, ma ‘ia fa‘aali atu le amio fa‘aaloalo i tagata uma lava.

³ Auā o i tatou fo‘i sa valea, lē usiusita‘i ma sesē. Sa fa‘apologaina i tatou i tu‘inanau ma mea fa‘afiafia ‘ese‘ese, sa nonofo ma le loto leaga ma le matau‘a, ma le ‘inosia, ma le feitaga‘i.

⁴ ‘Ae peita‘i, ‘ina ‘ua fa‘aalia mai i tagata le agalelei ma le alofa o le Atua lo tatou Fa‘aola,

⁵ ‘ona fa‘aolaina ai lea o i tatou e ia. E lē ‘ona o ni galuega lelei na faia e i tatou, a o lona lava alofa mutimutivale na fa‘aolaina ai i tatou e ia, i le fa‘amamāina i le toe fānaufouina ma le ola fou e le Agaga Pa‘ia,

⁶ ‘ua na fa‘amaligi tele mai i o tatou luga ‘ona o Iesu Keriso lo tatou Fa‘aola.

⁷ ‘Ina ‘ia ta‘uamiotonuina i lona alofa tunoa, ia fai ai i tatou ma suli e tusa ma le fa‘amoemoe i le ola e fa‘avavau.

⁸ O le ‘upu moni lenei. ‘Ou te loto ia e matuā tausisi i ia mea, ‘ina ‘ia faia galuega lelei e i latou o ē e fa‘atuatua i le Atua. O mea lelei ia ma le aogā mo tagata.

⁹ A ‘ia tāofia fesili valea, ma tala i gafa, ma femisaa‘iga ma fefinaua‘iga e uiga i le Tulafono, auā o ‘upu lē aogā ia ma le fa‘atauva‘a.

¹⁰ ‘Ia lapata‘iina fa‘alua le tagata o lē e fa‘atupu fevaevaea‘iga, a maea lea ‘aua ne‘i e toe amana‘ia o ia.

¹¹ ‘Ia e iloa o le tagata fa‘apenā ‘ua liliu ‘ese o ia ma ‘ua agasala, ‘ua fa‘asalaina fo‘i o ia e ia lava.

O Toe Fa‘atonuga

¹² A ‘ou ‘auina atu ‘iā te oe Aretima po o Tuiko, ia e taumafai ‘e te sau ‘iā te a‘u i Nikopoli; auā ‘ua tonu i lo‘u manatu ‘ou te nofo ai i le tau malūlū.

¹³ ‘Ia e taumafai e fesoasoani i le malaga a Sena le loia ma Apolo; va‘ai pe i ai se mea e matitiva ai i lā‘ua.

¹⁴ ‘Ia a‘oa‘oina fo‘i o tatou tagata ia tu‘uina atu o latou taimi i le faia o galuega lelei, e maua ai mea e manana‘o ai i latou; ‘ina ‘ia lē maumau o latou olaga.

¹⁵ O lo‘o alolofa atu ‘iā te oe i latou uma o lo‘o fa‘atasi ma a‘u. ‘Ou te alofa atu fo‘i ia i latou o ē o lo‘o alolofa mai ‘iā te i matou i le fa‘atuatua. ‘Ia ‘iā te ‘outou uma lava le alofa tunoa.