Tito 2 - Samoan Contemporary New Testament

O le A‘oa‘oga e Ola ai

¹ ‘Ia e tautala atu i le a‘oa‘oga e ola ai.

² ‘Ia fai atu i toeaina ia fa‘autauta, ia mataala, ia pulea lelei le amio, ia fa‘amaoni i le fa‘atuatua ma le alofa ma le ‘onosa‘i.

³ ‘Ia fa‘apenā fo‘i i lo‘omatutua, ia ola i latou i se olaga pa‘ia. ‘Aua ne‘i fa‘atuaupua pe fa‘apologaina i uaina; a ‘ia fai ma a‘oa‘o i mea lelei;

⁴ ‘ina ‘ia latou a‘oa‘o atu i fafine laiti, ia alolofa ‘iā latou tane ma a latou fānau,

⁵ ia pulea lelei a latou amio, ma ‘ia mamā, ia ‘avea ma fafine e tausia lelei o latou ‘āiga, o ē e usiusita‘i ‘iā latou lava tane, ‘ina ‘ia lē ‘upuvaleina le afioga a le Atua.

⁶ ‘Ia fa‘apea fo‘i ‘ona apoapoa‘i atu i taulele‘a ‘ia fa‘autauta i latou.

⁷ ‘Ia ‘avea oe ma fa‘aa‘oa‘o o galuega lelei uma; ia fa‘amaoni ma fa‘atoeaina i au a‘oa‘oga.

⁸ ‘Ia fa‘aaogā ‘upu e lē mata‘uleagaina, ‘ina ‘ia fa‘amāina ai lou fili, ‘ina ‘ua lē maua e ia se mea leaga e fai mai ai ‘iā te i tatou.

⁹ ‘Ia apoapoa‘i atu i pologa ia usiusita‘i i o latou lava matai, ia taumafai i latou e fa‘afiafia ‘iā te ia i mea uma lava, ‘aua ne‘i tali atu i ai i se ‘upu,

¹⁰ pe gaoi ‘iā te i latou, a ‘ia fa‘aalia e i latou ‘ua matuā fa‘amaoni i latou, ‘ina ‘ia vi‘ia ai le a‘oa‘oga a le Atua lo tatou fa‘aola i mea uma lava.

¹¹ Auā o le alofa tunoa o le Atua ‘ua aumai ai le fa‘aolataga, ‘ua fa‘aalia lea i tagata uma lava.

¹² O lo‘o a‘oa‘o mai ‘iā te i tatou ia lafoa‘i le amio fa‘alēmata‘u, ma tu‘inanau fa‘alelalolagi. A ‘ia tatou nonofo fa‘autauta ma le amiotonu ‘atoa ma le amioatua i lenei lalolagi,

¹³ fa‘apei ‘ona tatou fa‘atalitali i le aso o le manuia ‘ua tatou fa‘amoemoe i ai, o le fa‘aalia lea o le mamalu o le Atua silisili, ma lo tatou fa‘aola o Iesu Keriso.

¹⁴ O lē na foa‘iina mai o ia e ia mo i tatou, ‘ina ‘ia togiolaina ai i tatou i solitulafono uma lava, ma fa‘amamā mai e ia e fai ma ona tagata, ia mā‘elegā i galuega lelei.

¹⁵ ‘Ia e tautala atu ma apoapoa‘i atu i nei mea, ma a‘oa‘i atu ma le pule uma lava. ‘Aua ne‘i ‘inosia oe e se isi.