Tito 1 - Samoan Contemporary New Testament

O ‘Upu Fa‘afeiloa‘i

¹ O a‘u o Paulo, o le ‘au‘auna a le Atua ma le ‘aposetolo a Iesu Keriso, ‘ina ‘ia fa‘alauteleina le fa‘atuatuaga o ē ‘ua filifilia e le Atua, ma le iloa lelei o le ‘upu moni e i‘u ai i le amio Atua.

² I le fa‘amoemoe i le ola e fa‘avavau, na folafolaina mai e le Atua a o le‘i faia le lalolagi, e lē mafai ‘ona pepelo.

³ Ma ‘ua fa‘aalia mai i le taimi tatau le tala‘iga na tu‘uina mai ‘iā te a‘u, i le poloa‘iga a le Atua lo tatou Fa‘aola.

⁴ ‘Ou te tusi atu ‘iā te oe Tito, o lo‘u atali‘i moni i le fa‘atuatua ‘ua masani ai le to‘atele. ‘Ia ‘iā te oe le alofa tunoa, ma le alofa mutimutivale, ma le manuia mai le Atua le Tamā ma lo tatou Fa‘aola o Keriso Iesu.

O le Galuega a Tito i Kereta

⁵ Na ‘ou tu‘ua oe i Kereta ‘ina ‘ia e fa‘atonuina mea o lo‘o totoe e tatau ‘ona faia; fa‘apei ‘ona ‘ou fai atu ai ‘iā te oe, ma ‘ia e tofia toeaina i lea ‘a‘ai ma lea ‘a‘ai.

⁶ O le toeaina, ia lē mata‘uleagaina; ia tau o le to‘atasi le avā, o lana fānau fo‘i ia ‘avea ma tagata fa‘atuatua, ia lē amio ulavale, po o le lē usiusita‘i.

⁷ Auā e tatau i le epikopo ‘ona lē mata‘uleagaina o ia, a ‘ia pei o le ‘au‘auna a le Atua; ia lē fa‘amaualuga, ia lē itagofie pe inu tele i le uaina, pe fa‘asauā pe mana‘o tele i mea;

⁸ a ‘ia alofa i tagata ‘ese ma ‘ia alofa i ē e amiolelei. ‘Ia fa‘autauta, ma amiotonu, ia pa‘ia, ma amio pulea.

⁹ ‘Ia tāofi mau i le ‘upu moni e pei ‘ona a‘oa‘oina ai o ia, ‘ina ‘ia mafaia e ia ‘ona a‘oa‘o atu i a‘oa‘oga e ola ai, o le fa‘amafanafana atu lea ma a‘oa‘i atu i ē e finau mai.

¹⁰ Auā e to‘atele ē e fouvale, ma ē e tautala i ‘upu lē aogā ma ē e tau fa‘asesē, ‘ae maise lava ē ‘ua peritomeina.

¹¹ E tatau ‘ona punitia o latou gutu, auā ‘ua fa‘aliliu‘eseina e i latou le ‘āiga ‘atoa, ‘ua a‘oa‘oina atu fo‘i ma le lē mamā mea sesē ‘ona o tupe.

¹² O le isi lava o i latou, o la latou lava perofeta, na fai mai, “O tagata Kereta e masani i latou i le tala pepelo, o manu fe‘ai leaga, e paiē ‘ae ‘aitetele.”

¹³ O le molimau fa‘amaoni lea. O le mea lea, ia e matuā a‘oa‘i malosi ia i latou, ‘ina ‘ia tumau i latou i le fa‘atuatua;

¹⁴ ‘aua ne‘i tāofi i tala o le vavau a Iutaia, ma fa‘atonuga a tagata, o ē ‘ua te‘ena e i latou le ‘upu moni.

¹⁵ ‘Ua mamā mea uma ia i latou o ē ‘ua mamā, auā e o‘o lava i o latou mafaufau ma o latou loto fuatiaifo e ‘ele‘elea.

¹⁶ ‘Ua fai mai i latou ‘ua latou iloa le Atua; a ‘ua fa‘afitia o ia ‘iā latou galuega, e ‘inosia ma lē usiusita‘i, e lē fa‘amaoni fo‘i i latou i se galuega lelei e tasi.