Roma 9 - Samoan Contemporary New Testament

O le Atua ma ‘Ona Tagata ‘ua Filifilia

¹ ‘Ou te tautala atu i le ‘upu moni i luma o Keriso, ‘ou te lē pepelo, e molimau mai ‘iā te a‘u lo‘u loto fuatiaifo i le Agaga Pa‘ia,

² e tele lo‘u fa‘anoanoa, e puapuagātia fo‘i lo‘u loto e lē aunoa,

³ Auā e mafai lava ‘ona ‘ou loto atu ‘ina ‘ia fa‘afanoina a‘u, ma ‘ia vavae ‘ese mai ‘iā Keriso, e fai ma sui o o‘u uso, o lo‘u ‘āiga i le tino.

⁴ O i latou o tagata Isaraelu o ē ‘ua ‘avea ma tamafai, ma ‘ua i ai fo‘i le mamalu, ma feagaiga, ma sauniga o le tulafono, ma le tapua‘iga, ‘atoa ma mea ‘ua folafolaina mai.

⁵ O i latou e ona le augā tamā; o i latou fo‘i na tupu mai ai le Keriso i lona itū i le tino, o le Atua o ia o lē e vi‘ia e fa‘avavau. Amene.

⁶ Peita‘i, e lē fa‘apea ‘ua lē taunu‘u le afioga a le Atua. Auā o tagata na tupuga mai ‘iā Isaraelu e lē ni Isaraelu uma i latou.

⁷ E lē se fānau uma a Aperaamo i latou e ui lava ‘ina sa tupuga mai i latou ‘iā Aperaamo; ‘ae fa‘apea le folafolaga: “E vala‘auina lau fānau ‘iā Isaako.”

⁸ O lona uiga, o le fānau i le tino e lē o le fānau a le Atua i latou; peita‘i o le fānau e tusa ma le folafolaga, e ta‘ua i latou o le fānau.

⁹ Auā o le ‘upu lenei na folafolaina mai: “O le taimi lenei i le tausaga a sau ‘ou te toe sau ai, ‘ona fānaua lea e Sara lana tama tane.”

¹⁰ E lē gata i lea, a ‘ua to fo‘i Repeka ma fānau mai ana tama i le isi tagata, o lo matou tamā lea o Isaako.

¹¹ A o le‘i fānau mai ana tama, a o le‘i faia fo‘i e i lā‘ua se mea lelei po o se mea leaga, ‘ina ‘ia tumau le finagalo o le Atua e tusa ma lana filifiliga, e lē ‘ona o galuega a ‘ona o lē na vala‘au mai.

¹² Sa fetalai mai le Atua ‘iā te ia, “E ‘au‘auna le ulumatua i le ui‘i.”

¹³ Pei ‘ona tusia, “ ‘Ua ‘ou alofa ia Iakopo, a ‘ua ‘ou ‘ino‘ino ia Esau.”

¹⁴ O le ā ‘ea sa tatou ‘upu e fai? E lē amiotonu ‘ea le Atua? E leai lava!

¹⁵ Auā na fetalai atu o ia ‘iā Mose, “ ‘Ou te alofa atu i lē ‘ou te fia alofa atu i ai, ‘ou te alofa mutimutivale fo‘i i lē ‘ou te fia alofa mutimutivale i ai.”

¹⁶ O lenei, e lē mai lē ‘ua mana‘o, e lē mai lē ‘ua tausiniō, ‘ae mai le Atua o lē e alofa mai.

¹⁷ Auā ‘ua fai mai le Tusi ia Farao, “O le mea lava lenei ‘ua ‘ou fa‘atūina ai oe, ‘ina ‘ia ‘ou fa‘aalia lo‘u mana ‘iā te oe, ma ‘ia ta‘ua fo‘i lo‘u igoa i le lalolagi ‘atoa.”

¹⁸ O lenei, e alofa o ia i lē ‘ua finagalo i ai; e fa‘ama‘a‘a fo‘i e ia o lē ‘ua finagalo i ai.

O le To‘asā ma le Alofa o le Atua

¹⁹ A nei ‘e te fai mai ‘iā te a‘u, “O le ā ‘ea le mea ‘ua saga a‘oa‘i mai ai pea o ia? Auā o ai e tete‘e atu i lona finagalo?”

²⁰ Peita‘i, o oe le tagata, o ai ‘ea oe ‘e te fa‘afinau ai i le Atua? E fai atu ‘ea le mea na faia i lē na faia o ia, “O le ā le mea ‘ua e faia ai a‘u fa‘apea?”

²¹ E lē pule ‘ea le faiipu ‘omea i le ‘omea, e fai ai e ia i le paluga e tasi le ipu e lelei, a o le isi ipu e fa‘atauva‘a?

²² ‘Āfai ‘ua ‘onosa‘i le Atua, ma ‘ua matuā fa‘apalepale i ‘upu o le to‘asā ‘ua fa‘atatauina mo le malaia, ‘ina ‘ua finagalo o ia e fa‘aali mai ai lona to‘asā, ma fa‘ailoa mai ai lona mana;

²³ e fa‘ailoa mai ai fo‘i le tele naunau o lona vi‘iga i ‘upu o le alofa, na mua‘i saunia e ia mo le manuia.

²⁴ O i tatou fo‘i ‘ua vala‘auina e ia, e lē gata i tagata Iutaia, ‘ae ‘atoa fo‘i ma tagata o Nu‘u ‘ese.

²⁵ E pei lava ‘ona fetalai mai o ia i le Hosea: “ ‘Ou te ta‘ua o lo‘u nu‘u i latou sa lē ‘avea ma ‘O‘u Nu‘u.’ ‘Ou te ta‘ua fo‘i o ia ‘ua lē alofaina o lē ‘o‘u te alofa i ai.’ ”

²⁶ “O i le mea tonu lava sa ta‘ua ai i latou, ‘E lē so‘u nu‘u,’ o le a ta‘ua ai i latou, o atali‘i o le Atua soifua.”

²⁷ ‘Ua ‘alaga atu fo‘i Isaia ‘iā Isaraelu: “E ui lava ‘ina fa‘apei o le oneone i le sami le to‘atele o tagata Isaraelu, e na o ē ‘ua totoe e fa‘aolaina;

²⁸ auā e fa‘ataunu‘uina fa‘avave e le Ali‘i lana fa‘asalaga mata‘utia i le lalolagi.”

²⁹ E pei ‘ona fai mai ai Isaia anamua, “ ‘Ana lē fa‘atotoeina e le Ali‘i e ona le malosi uma lava ni fānau mo i tatou, po ‘ua ‘avea i tatou e pei o Sotoma, ma faia e pei o Komoro.”

O Isaraelu ma le Tala Lelei

³⁰ O le ā nei sa tatou ‘upu e fai? ‘Ua maua le amiotonu e tagata o Nu‘u ‘ese o ē e le‘i sā‘ili i le amiotonu, o le amiotonu lava lea e maua i le fa‘atuatua.

³¹ A o Isaraelu na sā‘ili i le tulafono o le amiotonu, e le‘i o‘o i latou i le tulafono o le amiotonu.

³² ‘Ua fa‘apea aiseā? ‘Ona ‘ua lē sā‘ilia i le fa‘atuatua, ‘ae peiseaī ‘ua fa‘avae i galuega o le tulafono; auā na ta‘ita‘isesēina i latou i le mea e fa‘asesēina ai.

³³ E pei ‘ona tusia: “Fa‘auta, ‘ou te tu‘uina i Siona le ma‘a e ta‘ita‘isesēina ai, ma le papa e tautevateva ai; e lē ma fo‘i se isi e fa‘atuatua ‘iā te ia.”