Roma 7 - Samoan Contemporary New Testament

O le Fa‘atusa i le Fa‘aipoipoga

¹ Uso e, o lo‘o ‘ou tautala atu i ē ‘ua iloa le tulafono, tou te lē iloa ‘ea na o aso e ola ai le tagata e pule ai le tulafono ‘iā te ia?

² Auā o le fafine nofotane, ‘ua noatia o ia e le tulafono i lana tane a o ola o ia; ‘ae a oti loa lana tane, ‘ona tatalaina lea o ia e le tulafono mai lana tane.

³ O lea la, ‘āfai e nofo o ia i se isi tane, a o ola pea lana tane, ‘ona ta‘ua lea o ia o le mulilua. Peita‘i, a oti loa lana tane, ‘ona sa‘oloto lea o ia mai lea tulafono; ma ‘āfai fo‘i e toe nofo o ia i se isi tane, e lē mulilua ai o ia.

⁴ O‘u uso e, e fa‘apenā fo‘i ‘outou o ē ‘ua oti i le tulafono i le tino o Keriso; ‘ina ‘ia ‘outou nonofo i le isi tane, o lē na toetū mai nai ē ‘ua oti, ‘ina ‘ia tatou fua mai ni fua mo le Atua.

⁵ Auā ‘ua galulue mana‘o leaga i o tatou tino talu ai le tulafono, ‘ina o tatou ola i le tino, e fua mai ai fua e oti ai.

⁶ Peita‘i ‘ua tatalaina i tatou nai le tulafono sa tāofia ai i tatou ‘ina ‘ua tatou oti, o lea fo‘i ‘ua tatou ‘au‘auna atu ai i le ola fou mai le Agaga, ‘ae lē o le tusi tulafono tuai.

O le tulafono ma le Agasala

⁷ O le ā ‘ea sa tatou ‘upu e fai? O le agasala ‘ea le tulafono? E leai lava! Peita‘i ana leai le tulafono se manū ‘ou te lē iloa le agasala; auā ana lē fai mai le tulafono, “ ‘Aua ‘e te tu‘inanau,” po ‘ua ‘ou lē iloa le tu‘inanau.

⁸ A ‘ua maua e le agasala le avanoa i totonu o le poloa‘iga, ‘ona fa‘atupuina ai lea ‘iā te a‘u tu‘inanau ‘ese‘ese uma lava. Auā e mate le agasala pe a leai se tulafono.

⁹ Sa ‘ou ola i aso anamua e aunoa ma le tulafono; a ‘ua o‘o mai le poloa‘iga, ‘ona toe ola ai lea o le agasala, a ‘ua ‘ou oti.

¹⁰ O le poloa‘iga na folafolaina mai ai le ola, a ‘ua ‘avea lea ma oti ‘iā te a‘u.

¹¹ Auā na maua e le agasala le avanoa i le poloa‘iga, ‘ona fa‘asesēina lea o a‘u e ia, ma ‘ua fasiotia lava a‘u.

¹² O lenei, e pa‘ia lava le tulafono, e pa‘ia fo‘i ma tonu ma lelei le poloa‘iga.

¹³ O lona uiga ‘ea la, ‘ua ‘avea le mea lelei ma mea ‘ou te oti ai? E leai lava! A o le agasala ‘ua mafua ai. ‘Ua fa‘aaogāina e le agasala le mea lelei e fa‘ao‘o mai ai le oti ‘iā te a‘u, ‘ina ‘ia iloa ai o le galuega moni a le agasala; ma ‘ia ‘avea fo‘i le poloa‘iga ma ala e fa‘aalia manino ai, o le agasala e silisili ‘ona leaga.

O le Tauiviga i Totonu o le Tagata

¹⁴ ‘Ua tatou iloa o le tulafono e fa‘aleagaga, a o a‘u o le tagata fa‘aletino, ‘ua fa‘atauina e fai ma tagata o le agasala.

¹⁵ ‘Ou te lē malamalama i a‘u mea e fai. Auā ‘ou te lē faia le mea ‘ou te mana‘o ai, a o le mea tonu lava ‘ou te ‘ino‘ino ai, o le mea lea ‘ou te faia.

¹⁶ ‘Āfai fo‘i ‘ou te faia le mea ‘ou te lē mana‘o ai, ‘ona iloa ai lea ‘ou te ioe e sa‘o le tulafono.

¹⁷ O lona uiga la e lē o a‘u na faia lea mea, a o le agasala o lo‘o nofo i totonu ‘iā te a‘u.

¹⁸ Auā ‘ua ‘ou iloa e leai se mea lelei o i totonu ‘iā te a‘u, o lo‘u tino lea. E mafai ‘ona ‘ou loto atu e fai le mea lelei, peita‘i e lē mafai ‘ona ‘ou faia lea lava mea lelei.

¹⁹ Auā ‘ou te lē faia le mea lelei ‘ou te mana‘o ai, a o le mea leaga ‘ou te lē mana‘o ai, o le mea lea ‘ou te faia.

²⁰ O lea, ‘āfai ‘ou te faia le mea ‘ou te lē mana‘o ai, e lē o a‘u ‘ua faia lea mea, a o le agasala o lo‘o i totonu ‘iā te a‘u.

²¹ ‘Ua ‘ou iloa nei peiseaī o se tulafono o lo‘o ‘iā te a‘u; a ‘ou mana‘o e fai le mea lelei, ‘ua i ai ‘iā te a‘u le leaga.

²² Auā ‘ou te fiafia i le tulafono a le Atua i lo‘u nei tagata i totonu.

²³ A ‘ua ‘ou iloa le isi tulafono ‘ese i lo‘u tino, o lo‘o fete‘ena‘i ma le tulafono a lo‘u mafaufau, ma ‘ua fa‘apologaina ai a‘u i le tulafono o le agasala o lo‘o i lo‘u tino.

²⁴ O a‘u o le tagata ‘ua malaia! O ai se isi na te lavea‘iina a‘u nai lenei tino o lo‘o ‘ona ‘aveina atu a‘u i le oti?

²⁵ Fa‘afetai lava i le Atua e ala ‘iā Iesu Keriso lo tatou Ali‘i! O lenei, ‘ou te ‘au‘auna atu lava i le tulafono a le Atua i lo‘u mafaufau, peita‘i ‘ou te ‘au‘auna i le tulafono a le agasala i lo‘u tino.